Ndị Kọrẹntị Ibuzọ 1 - Ika

Isi Nke Ohu

¹ Mmẹ wụ Pọlụ de Ẹkụkwọ-ozini, mmẹ lẹ nwẹnẹ ẹnyi wụ Sọstẹnẹsi. Kraịstị wụ Jizọsị kpọ m, tumẹ m onyẹ-ozi ẹ pụ-ichẹn makẹni uche Osolobuẹ rọ.

² Ẹnyi rị e dejẹnni ndị ụka Osolobuẹ rị obodo Kọrẹntị, ndị ahụn Osolobuẹ dọn nsọ imẹ Kraịstị wụ Jizọsị, ndị ahụn wẹ kpọ d'a wụrụ ndị-nsọ. Ẹnyi rị e dejẹnni uwẹ lẹ ndị ile rị ebe ọwụlẹ hụn a kpọku ẹfan Di-nwọnni-ẹnyi wụ Jesu Kristi hụn Nwọn ẹnyi lẹ wẹ.

³ Ẹfọma lẹ udọn Osolobuẹ wụ Nẹdi ẹnyi lẹ Di-nwọnni-ẹnyi wụ Jizọs Kraịstị nọyeni ụnụ.

Ngọzi Hụn Rị Imẹ Kraịstị

⁴ M'e gi ufiri ụnụ a kpanmịn Osolobuẹ ogẹn ile yeni ọhụnma o mẹni ụnụ imẹ Kraịstị wụ Jizọsị,

⁵ hụn wụnị ụnụ e nwọngụọ oyiye ile rị ichẹn-ichẹn imẹ Kraịstị: kẹ oyiye ile ya lẹ oku-ọnụ wị kẹ oyiye amamihiẹn ile —

⁶ ẹrịra ozi wẹ zi ụnụ banyeni Kraịstị dọn weri ọnọdị imẹ ụnụ.

⁷ Onwọnzini nwan oyiye Mmọn-nsọ akọnị ụnụ kẹ ụnụ dọn rị e che ọbịbịa Onyẹ-nwọnni-ẹnyi wụ Jizọs Kraịstị.

⁸ Onyẹ-nwọnni-ẹnyi Jizọs Kraịstị k'e mẹ ụnụ turu d'e ru njẹndemẹ, makẹ ụnụ gha e nwọn nkọrịanị Ụhụọhịn Onyẹ-nwọnni-ẹnyi Jizọs Kraịstị.

⁹ Osolobuẹ hụn kpọ ụnụ d'e sọn Nwa a wụ Jizọs Kraịstị Onyẹ-nwọnni-ẹnyi mẹkọ furu wẹ gi e dọn ẹnya.

Ikpe Lẹ Nkebe Imẹ Ụka!

¹⁰ Umunẹ, m gi ẹfan Di-nwọnni-ẹnyi wụ Jesu Kristi a rịọ ụnụ nị ụnụ ile e kuye ọnụ ohu ẹlẹ hụn nkebe e gi a rị imẹ igunrun ụnụ; e nwọnchanrịn nị obi ohu, a chụ nị ihiẹn ohu.

¹¹ Umunẹ m, m rị e ku ẹ makẹni ndị ikpụlọ Klo a gwagụọ m nị ikpe lẹ nkewa rị imẹ igunrun ụnụ.

¹² Ikpe lẹ nkewa m rị e ku oku ẹ wụ nị hụnnị sị, “Pọlụ kẹ m'e sọn;” hụnnị sị, “Apolọsụ kẹ m'e sọn;” hụnnị sị, “Kẹfasị wụ Pita kẹ m'e sọn;” hụnnị sị, “Kraịstị kẹ m'e sọn.”

¹³ Kraịstị kebedẹ nwan ekebe ra? Pọlụ nwụndẹni nwan ụnụ ọnwụn ra? Ẹfan Pọlụ kẹ wẹ gidẹ nwan mẹ ụnụ mirin-Chuku ra?!

¹⁴ A kpanmịn m Osolobuẹ n'o nwọnni onyẹ m mẹ mirin-Chuku imẹ ụnụ mmanị Krispọsụ lẹ Gayọsụ:

¹⁵ onwọnni nwan onyẹ k'a sị wẹ gi ẹfan m mẹ ụnụ mirin-Chuku —

¹⁶ ẹhẹn, e mẹzighọ m ndị ikpụlọ Stẹfanasị mirin-Chuku. Wezụka ndịnị, amazị m kẹ o nwọnghọ onyẹ m mẹ mirin-Chuku.

Kraịstị Kẹ Osolobuẹ E Lee Ẹnya Ihun

¹⁷ Makẹni, ẹlẹ mirin-Chuku kẹ Kraịstị zi m d'e mẹ; oziọma k'ọ sị m d'e zi; ẹlẹ nke onyẹ ma dọnye oku, amamgbe ọ nọ kẹ sị ẹlẹzi oku ọnwụn Kraịstị nwụn elu obe kẹ ẹnyi rị e ku.

¹⁸ Makẹni, ozi ọnwụn hụn Kraịstị nwụn elu obe wụ nzuzu ẹnya ndị lakọ ntikpọ; kanị ebe ẹnyi nwẹn ndị Osolobuẹ rị a zụọpụha rị, ikẹn Osolobuẹ rọ.

¹⁹ Makẹni Ẹkụkwọ-nsọ sị, “M k'e wiwi amamihiẹn ndị marịn ihiẹn; m k'e mẹ akọ-lẹ-uche ndị nwọn uche wụrụ ihiẹn ọlaliwi.”

²⁰ Elebe kẹ onyẹ hụ marịn ihiẹn rị nwan? Elebe kẹ ọka-ẹkụkwọ rị nwan? Elebe kẹ onyẹ hụn kachanrịn ihiẹn e lekpọ rị nwan? Osolobuẹ e mẹgụọnị amamihiẹn ụwanị wụrụ nzuzu?!

²¹ Makẹni ụwa asanị ẹka gi amamihiẹn marịn Osolobuẹ ebe ọ nọ e gi amamihiẹn ẹ e mẹ ihiẹn, ọ sụọ Osolobuẹ n'o gi “nzuzu” rị ozi ẹnyi rị e zi zụọpụha ndị hụn k'e kwerini.

²² Ndị Ju sị wẹ k'a hụnrịrị ihiẹn pụ-ichẹn wẹ kebe kweri; ndị elu Griki sị mmanị ya lẹ amamihiẹn wẹ laye, ekwerikọ wẹ.

²³ Kanị ẹnyi hụ e zisọnmẹ ozi Kraịstị wẹ kpọgbu elu obe: ebe ndị Ju rị, ihiẹn pụ-ichẹn w'a ghọtafie rọ; ebe ndị wụlẹni ndị Ju rị nzuzu rọ.

²⁴ Kanị, nke ndị Osolobuẹ kpọ, kẹ ndị Ju kẹ ndị wụlẹni ndị Ju, Kraịstị wụ ikẹn Osolobuẹ lẹ amamihiẹn Osolobuẹ.

²⁵ Makẹni, “nzuzu” Osolobuẹ ka amamihiẹn ịhịan; “ndụn-ọgụgụ” Osolobuẹ ka ikẹn ịhịan.

²⁶ Umunẹ m, lekpọ nị okuni Osolobuẹ kpọ ụnụ: ndị bu ọda ẹlẹ ndị ụwa a kpọ ndị marịn ihiẹn; ndị bu ọda ẹlẹ ndị okẹn-ịhịan; ndị bu ọda ẹlẹ ụmụ ndị-nze.

²⁷ Kanị, Osolobuẹ họrị ihiẹn wụ nzuzu ẹnya ụwa, kẹni o gi wẹ gbe ifẹnrẹn ye ndị marịn ihiẹn ihun; ọ họrị ihiẹn zelẹni, kẹni o gi wẹ gbe ifẹnrẹn ye ndị zeni ihun.

²⁸ Osolobuẹ họrị ihiẹn mmaka lẹ ihiẹn ụwa e legberi, ọ họrị ihiẹn nwọnlẹni ihiẹn ọ wụ, kẹni o gi wẹ budan ihiẹn wụ ihiẹn.

²⁹ Osolobuẹ mẹ ẹrịra makẹ ịhịan gha a nyan isi ihun Osolobuẹ.

³⁰ Osolobuẹ mẹ ụnụ gi nwan rị imẹ Kraịstị Jizọsị hụn wụ nwan amamihiẹn ẹnyi gha ẹka Osolobuẹ bịa lẹ ezi-omumẹ ẹnyi lẹ onyẹ ẹnyi gi rị nsọ lẹ onyẹ nzụọpụha ẹnyi.

³¹ Ọ rị nwan kẹ Ẹkụkwọ-nsọ dọn ku, “Onyẹ k'a nyan isi, ya gi Di-nwọnni-ẹnyi nyan isi.”