Ndị Han Eṅẹn 9 - Ika

Isi Nke Itenẹi Abimẹlẹkị A Kịma Shẹkẹm

¹ Abimẹlẹkị nwa Jeru-Baalụ jẹn Shẹkẹm d'e kunrun umunẹ nnẹ ẹ ikẹnnyẹ, sị wẹ lẹ ndị ile rị ebọn nnẹ ẹ,

² “Jụ nị ndị Shẹkẹm ile: ‘Elee hụn ka ụnụ mma? Nị ikẹnnyẹ iri kwasị ọgụn-ẹtọ ile Jeru-Baalụ mụ kịma ụnụ ra nị onyẹ ohu kịma ụnụ?’ Nyanhankwọ nị nị mmẹ lẹ ụnụ wụ ẹdeke ohu.”

³ Mgbe umunẹ nnẹ ẹ gi gwan'a ndị isi Shẹkẹm ihiẹn ndịnị ile, wẹ nọ kweri ni Abimẹlẹkị kẹ wẹ sikọ d'e sọnmẹ, wẹ sị, makẹni “Nwẹnẹ ẹnyi rọ.”

⁴ Wẹ nọ gha ụlọ-mmọn Baalụ-Bẹriti weye ẹ akpụ siliva iri kwasị ọgụn-ẹtọ. Ọ nọ gi ẹ weri ndị ịkpata chọkọ egho; wẹ nọ sọnmẹ ẹ.

⁵ Ọ nọ shi iwe nẹdi ẹ rị Ọfra, gbuchanrịn umunẹ ẹ ikẹnnyẹ, ụmụ Jeru-Baalụ, iri kwasị ọgụn-ẹtọ, elu ọmụma ohu. Kanị Jọtam, hụn wụ okẹnnyẹ ikpanzụụn Jeru-Baalụ mụ, awanahịnghọ makẹni ọ warị awarị.

⁶ Ya ndị-isi Shẹkẹm ile lẹ ndị Bẹt-Milo nọ zu ẹhụ okẹn-osisi okuu rị ebẹhụ wẹ zumẹ ọmụma wẹ gi a rụa mmọn imẹ Shẹkẹm, nị wẹ hụn ụzọ kin Abimẹlẹkị eze.

Ilu Jọtam Ta

⁷ Ogẹn wẹ gi gwa Jọtam ihiẹnni, ọ nọ wuzo elu Ugu Gẹrizim weshi olu elu sị wẹ, “Gọn ni m ntịn, ụnụ ndị Shẹkẹm, kẹni Osolobuẹ gọn ụnụ ntịn:

⁸ Ụhụọhịn ohu, osisi ile nọ chọ nị wẹ nwọnrin eze; ya wẹ nọ sị osisi olivu, ‘Họnrin eze ẹnyi.’

⁹ Osisi olivu nọ sị wẹ, ‘Nị m mụbehi ezigbo ofigbọn-olivu m, hụn wẹ gi e ye mmọn lẹ mmadụ ọghọ, d'a kịmahụ osisi ndị ọzọ?’

¹⁰ “Ya wẹ nọ sị osisi figi, ‘Bịa d'e họnrin eze ẹnyi.’

¹¹ Kanị, osisi figi nọ sị wẹ, ‘Nị m mịbehi mkpụrụ m rịgbu enwẹn ẹ mma, a sụọgbu enwẹn ẹ, d'a kịmahụ osisi ndị ọzọ?’

¹² “Ya wẹ nọ sị vaịnị, ‘Bịa d'e họnrin eze ẹnyi.’

¹³ Kanị, vaịnị nọ sị wẹ, ‘Nị m mụbehi manya m, hụn e mẹ ẹfọ a sụọ kẹ mmọn kẹ mmadụ ụsụọ d'a kịmahụ osisi ndị ọzọ?’

¹⁴ “Ya osisi ile nọ nwan sị ogun, ‘Bịa d'e họnrin eze ẹnyi.’

¹⁵ “Ogun nọ sị wẹ, ‘Omẹni ezioku-ezioku nị ụnụ chọ nị m wụrụ eze ụnụ, bịa nị nwan d'a nọdị igungun m; kanị, omẹni ẹlẹ ẹrịra, ọkụn ya gha mmẹ wụ ogun pụha d'e ripụ osisi sida alị Lẹbanọnụ!’

¹⁶ “Jọtam nọ nwan sị wẹ: Omẹni ihiẹnni ụnụ mẹ e zinringhọ; omẹni ọ hụghọ mma — ebe ụnụ nọ kin Abimẹlẹkị eze; omẹni ẹkanị ụnụ gi sọn Jeru-Baalụ lẹ ezi-lẹ-ụlọ a hụ mma, omẹni ihiẹn ụnụ mẹ ẹ e furughọ a —

¹⁷ ebe o mẹ ni nẹdi m lụnị ụnụ ọgụn, be isi ẹ ye ọb'ẹka n'ọ zụọpụha ụnụ ẹka ndị Midianị

¹⁸ (kanị, ụnụ e bugụọ nwan nụmanị ikpụlọ nẹdi m tannị, nọ elu ọmụma ohu gbuchanrịn ikẹnnyẹ iri kwasị ọgụn-ẹtọ ọ mụ, weri Abimẹlẹkị, nwa igbọn ẹ mụn'a, kin eze ndị Shẹkẹm makẹni nwẹnẹ ụnụ rọ) —

¹⁹ omẹkwọnị ihiẹn furuni, rị mma, kẹ ụnụ mẹ Jeru-Baalụ lẹ ikpụlọ a tannị, Abimẹlẹkị ya mẹ ụnụ ghọghọ, ụnụ nwẹn e mẹ ẹ ghọghọ!

²⁰ Kanị omẹni ihiẹn ụnụ mẹ arị mma, ọkụn ya gha imẹ Abimẹlẹkị pụha, ripụ ụnụ ndị Shẹkẹm lẹ Bẹt-Milo; ọkụn ya ghazịkwọ imẹ ụnụ ndị Shẹkẹm lẹ Bẹt-Milo pụha, ripụ Abimẹlẹkị.”

²¹ Ya Jọtam nọ gbama ọsọ, gbashi Biẹ d'e biri ebẹhụ, gbapụnị Abimẹlẹkị nwẹnẹ ẹ.

Kẹ Abimẹlẹkị Dọn Dan

²² Ahụa ẹtọ kẹ Abimẹlẹkị kịpụ Izrẹlụ,

²³ Osolobuẹ nọ zihẹ eje-mmọn d'e bu nkebe che ẹgbata Abimẹlẹkị lẹ ndị-isi Shẹkẹm; ndị Shẹkẹm nọ bu Abimẹlẹkị mbubu-azụụn.

²⁴ Osolobuẹ mẹ ihiẹnni makẹ njọ hụ wẹ mẹ ụmụ Jeru-Baalụ iri kwasị ọgụn-ẹtọ, ogbugbu wẹ gbu wẹ. Osolobuẹ mẹ ẹ n'o gi ẹ mẹgwarị nwẹnẹ wẹ wụ Abimẹlẹkị lẹ ndị Shẹkẹm hụn yen'ẹ ẹka gbu umunẹ ẹ.

²⁵ Ebe wẹ rị a lụsọn Abimẹlẹkị ọgụn, ndị isi Shẹkẹm nọ zi ikẹnnyẹ d'a warịsọnmẹ elu-ugu, e zunarịn onyẹ ọwụlẹ ghafekọnị ihiẹn ẹ. Ozi ihiẹn rị e mẹni nọ ru ebe Abimẹlẹkị rị.

²⁶ Gaalụ nwa Ebẹdi lẹ umunẹ ẹ ikẹnnyẹ kwalụa Shẹkẹm, ya ndị Shẹkẹm nọ bu enwẹn wẹ ye ẹ.

²⁷ Ndị Shẹkẹm a ghọgụ vaịnị rị ugbo wẹ ahụa hụ, pịnpụhagụ manya a, wẹ nọ shi ụlọ-mmọn wẹ d'e ri oriri. Ebe wẹ rị e ri, a ra, wẹ nọ kpọma Abimẹlẹkị iyi.

²⁸ Ya Gaalụ nwa Ebẹdi nọ sị, “Onyẹ wụdẹ Abimẹlẹkị?! Elee hụn biri ya lẹ ndị Shẹkẹm, hụn o gi kị ẹnyi? Ẹlẹ nwa Jeru-Baalụ rọ?! Ẹlẹ ya tumẹ Zẹbulu ni ebeni?! Nị ẹnyi feni onyẹ Shẹkẹm kẹti-kẹti, onyẹ ẹbozo Hamọ nẹdi ndị Shẹkẹm!! Kị ẹnyi k'e feni Abimẹlẹkị?

²⁹ K'o furu mmẹ rị a kị ndịnị! Nkẹ m'e gbupụ Abimẹlẹkị; nkẹ m'a sị a, ‘Kpọpụha ndị-agha ị ile, y'a pụha nị ẹnyi lụ agha!’ ”

³⁰ Ogẹn Zẹbulu hụn rị a kị obodo hụ gi nụ ihiẹn ndịnị Gaalụ nwa Ebẹdi rị e ku, olulu nọ bu ẹ ọda-ọda.

³¹ Ọ nọ zi ozi jẹnni Abimẹlẹkị hụn rị Aruma, sị a, “Lekwọ a nị Gaalụ nwa Ebẹdi lẹ umunẹ a bịagụọkwọ Shẹkẹm, wẹ rị a kpasu ndị obodo nị wẹ bunụmanị ị.

³² O ru nwan imẹ uhinhin, yụ lẹ ndị agha ị a bịakwọ d'a warị ibẹka ugbo.

³³ Eki fọn, hụn anwụn gihụ wa, ụnụ a zụnbanhan imẹ obodo. Gaalụ lẹ itu ẹ pụha d'e sọn ụnụ lụ ọgụn, y'e mẹ ẹ ihiẹn i k'a sa ẹka mẹ ẹ.”

³⁴ Ya Abimẹlẹkị lẹ ndị-agha a ile nọ gi imẹ uhinhin buli, shi mkpẹnrẹn Shẹkẹm; e kebe wẹ enwẹn wẹ itu ẹnọ, warịsọnmẹ ebẹhụ.

³⁵ Gaalụ nwa Ebẹdi gha imẹ obodo ahụn pụha d'e wuzohụ ọnụ-mgbọn obodo hụ ogẹn Abimẹlẹkị lẹ ndị agha a gi gha ebe wẹ warịsọnmẹ pụla.

³⁶ Gaalụ a hụn wẹ, ọ nọ sị Zẹbulu, “Lee ẹ, o nwọn ndị ghasọnmẹ elu-ugu hidanla!” Zẹbulu nọ sị a, “Onyinyọn ugu k'ị rị a kpọ ịhịan.”

³⁷ Gaalụ nọzị sị a, “Mba; o nwọnkwọ ndị gha ahanmahan alị lala. Itu ohu ghazị ibẹka Osisi Ndị Agba-ẹfa lala.”

³⁸ Ebẹhụ kẹ Zẹbulu nọ nwan sị a, “Elebe isi nwẹn ile ị rị a nyan rị nwan? Ịyụ hụn sị, ‘Onyẹ kẹ Abimẹlẹkị wụ hụn ẹnyi a nọdị okpuru ẹ?’ Ẹlẹ ndịnị wụ ndị ị rị e kuja oku wẹ? Jẹn nwan d'a lụsọn wẹ ọgụn.”

³⁹ Ya Gaalụ nọ kịpụha ndị Shẹkẹm d'a lụsọn Abimẹlẹkị agha.

⁴⁰ Abimẹlẹkị nọ chụ a; ndị Shẹkẹm bu ọda rụ ẹhụ imẹ agha hụ, a dantọsọnmẹ wẹ ụzọ d'e ru ọnụ-mgbọn obodo hụ.

⁴¹ Omẹgụ, Abimẹlẹkị nọ lakin Aruma d'a nọdị; Zẹbulu nkẹ nọ chụpụ Gaalụ lẹ umunẹ ẹ imẹ Shẹkẹm.

⁴² Eki e fọn, ndị Shẹkẹm nọ kọnrin agha shi ibẹka ugbo, Abimẹlẹkị nọ nụ a.

⁴³ Ya kẹ Abimẹlẹkị nọ weri ndị-agha a, ke wẹ itu ẹtọ, warị imẹ ugbo e che wẹ. Ogẹn o gi hụn wẹ kẹ wẹ gha imẹ obodo pụla, ọ nọ pụha d'a maye wẹ.

⁴⁴ Abimẹlẹkị lẹ itu ya lẹ wẹ wị a zụnpụha, wuzo ẹhụ ọnụ-mgbọn obodo hụ; itu ẹbụọ họdụnị nọ zụnburu ndị rị imẹ ugbo lẹ ọfịa, gbu wẹ.

⁴⁵ Abimẹlẹkị nọ gi ụhụọhịn hụ gbegbegbe lụsọn obodo hụ agha d'e ru n'o weri ẹ, gbu ndị rịn'a. O tikpọ obodo ahụn ru alị, fufe ẹ nnu, wiwipụ alị a.

⁴⁶ Ndị isi ile rị ụlọ-uku Shẹkẹm a nụọlẹ ihiẹn rị e mẹni, gbaban ebẹhụ kachanrịn e ze imẹ ụlọ-mmọn Ẹl-Bẹriti.

⁴⁷ Abimẹlẹkị a nụ nị ndị-isi ile zu ọnụ ebẹhụ.

⁴⁸ Ya lẹ itu ẹ nọ shi Ugu-Zalụmọnụ. Abimẹlẹkị nọ weri anyụn, kwarị agala nkụn, dịda wẹ ye uvun ẹ azụụnnị lẹ azụụnnị. Ya ọ nọ sị ndị ya lẹ wẹ wị, “Ozigbo! Mẹ ni ihiẹn ụnụ hụn m mẹ!”

⁴⁹ Ya wẹ ile nọ kparị nkụn, sọnmẹ Abimẹlẹkị. Wẹ nọ kpọn ẹ ye ẹhụ-ẹjan ebẹhụ zegbu enwẹn ndị ahụn gbaban, bu ọkụn che ẹ. Ya kẹ ndị ile rị ụlọ-nche Shẹkẹm nọ nwụnhụn: ihiẹn nọ kẹ ikẹnnyẹ lẹ ikpoho nnụ-uku.

⁵⁰ Abimẹlẹkị nọzị shi Tẹbẹzi, kehunmẹ ẹ, weri ẹ.

⁵¹ Kanị, ụlọ-nche uku ohu ze ọhụnma-ọhụnma rị imẹ obodo hụ, ikẹnnyẹ lẹ ikpoho ile, ndị obodo hụ ile họdụnị nọ gbaban imẹ ẹ, kpọkin enwẹn wẹ ye, shi ibe elu ẹ.

⁵² Abimẹlẹkị nọ zụnhan ụlọ-nche hụ, kẹn'ọ maye wẹ. Kanị, hụn o gi rumẹ ọnụmụzọ a n'o yi ẹ ọkụn,

⁵³ okpoho ohu nọ tụha ẹka-ọlọ y'ẹ isi, ọ nọ tiwa a okpokomisi.

⁵⁴ Ozigbo, ọ nọ kpọ okorọbịa e bun'ẹ ihiẹn-ọgụn, sị a, “Sepụha ọpịa-agha ị n'ị gbu m, amamgbe wẹ e sị, ‘Okpoho gbu ẹ.’ ” Ya odibo ẹ hụ nọ zu ẹ ọpịa-agha, ọ nọ nwụnhụn.

⁵⁵ Ogẹn ndị Izrẹlụ gi hụn nị Abimẹlẹkị a nwụnhụn, onyẹ-onyẹ nọ la iwe ẹ.

⁵⁶ Ẹrịra kẹ Osolobuẹ dọn kụkin Abimẹlẹkị ụgwọ njọ o mẹ nẹdi ẹ: ebe ọ nọ gbu umunẹ ẹ iri kwasị ọgụn-ẹtọ.

⁵⁷ Osolobuẹ gizikwọ ihiẹnni kụ ndị Shẹkẹm ụgwọ eje-ihiẹn ile wẹ mẹ. Ọnụ Jọtam nwa Jeru-Baalụ bụ wẹ nọ ru wẹ ẹhụ.