Ndị Han Eṅẹn 8 - Ika

Isi Nke Ẹsatọ Ndị Ifrem Sị Kị Haịn Gidiọnụ Gilẹni Kpọ Wẹ

¹ Ya kẹ ndị Ifrem nọ sị Gidiọnụ, “Kị haịn i gi mẹ ẹnyi ihiẹn nọ ẹnịna? Kị haịn i gilẹni kpọ ẹnyi k'i jẹnkọ d'a lụsọn ndị Midianị agha?” Wẹ nọ du ẹ kpe ọhụnma-ọhụnma.

² Kanị, Gidiọnụ nọ sị wẹ, “Kịnị kẹ m gi nwan mẹkarị ụnụ? Vaịnị ụnụ ndị Ifrem a ghọhọdụ a latọ imẹ ugbo akanị nwan vaịnị ile Abiẹza ẹnyi a rụnpụha?

³ Ụnụ kẹ Osolobuẹ ye nwan Orẹbụ lẹ Zibu ndị-isi agha Midianị mẹri. Kịnị kẹ mmẹ nwẹn s'ẹka mẹ, hụn ru hụn ụnụ mẹ?” O kugụ ẹnịna, olulu wẹ nọ rọ.

Gidiọnụ E Gbu Zẹba Lẹ Zal'muna

⁴ Ya Gidiọnụ lẹ madụ ọgụn mmisẹn ahụn ya lẹ wẹ wị nọ chụsọnmẹ ndị wẹ chụkọ, ọsụọn'a nị ndụn gụ wẹ nwẹn; a chụrụ wẹ wẹ pụha Iyi-jọdanị, fetu ẹ.

⁵ Ya Gidiọnụ nọ sị ndị obodo Sukọtụ, “Dodo ni, ye ni ndị-agha m brẹdi ri, nị ndụn a gụgụọ wẹ, bụ echẹn kẹ m chụkọ Zẹba lẹ Zal'muna, ndị-nze Midianị.”

⁶ Kanị, ndị-isi Sukọtụ nọ sị, “Ụnụ a nwụndọngụọlẹ Zẹba lẹ Zal'muna hụn ẹnyi e gi yemẹ ndị-agha ị brẹdi ri?”

⁷ Ya Gidiọnụ nọ sị, “Ọ hụghọ nwan mma. Osolobuẹ yegụ m Zẹba lẹ Zal'muna mẹri, abị-ogun lẹ mkpalị rị alị ọkpọ-nkụn kẹ m'e gi dọkịka ụnụ ẹhụ.”

⁸ Ọ nọ gha ebẹhụ shi Pẹniẹlụ, rịọzị wẹ ihiẹn ohu ahụn, wẹ nọ shịarịzịkwọ a ihiẹn ohu hụ ndị Sukọtụ shịarị a.

⁹ Ya ọ nọ sị ndị Pẹniẹlụ, “M mẹrigụ, kinhẹn, m jẹnkọ d'e tikpọ ụlọ-nche uku ụnụnị.”

¹⁰ Ogẹn hụ, Zẹba lẹ Zal'muna rị Kakọ, wẹ lẹ ndị agha wẹ rị ihiẹn nọ kẹ madụ nnụ-uku mmisẹn (15,000). Uwẹ sụọ họdụ imẹ igunrun ndị-agha ile ndị ọwụwa-ẹnyanwụn kpọnhẹn, makẹni agha hụ e rigụọ madụ nnụ-uku ọgụn-isin (120,000) gi ọpịa-agha a lụ.

¹¹ Ya Gidiọnụ nọ ghashi ụzọ ndị a kwahunmẹni a gha, ẹbamịn ọwụwa-ẹnyanwụn Noba lẹ Jog'bẹha, zụnburu ndị-agha Midianị hụ họdụnị idẹnmizi ogẹn wẹ gilẹni tụ ẹnya a.

¹² Zẹba lẹ Zal'muna, ndị-nze Midianị, e te gbamaọlẹ ọsọ, kanị ọ nọ chụ wẹ, nwụndọn wẹ, chụzịza ndị agha hụ ile.

Ihiẹn Gidiọnụ Mẹ Ndị-isi Pẹniẹlụ lẹ Sukọtụ

¹³ Gidiọnụ nwa Jụashị nọ ghashi ebe wẹ gha e fetu Ugu Heresi lụa agha hụ.

¹⁴ Gidiọnụ nọ nwụndọn okorọbịa Sukọtụ ohu, jụ a njụ, okorọbịa hụ nọ detun'ẹ ẹfan mmadụ mmẹsa kwasị ọgụn-ẹtọ (77) gi ọkwa imẹ Sukọtụ, ndị-isi obodo hụ.

¹⁵ Ya Gidiọnụ nọ bịa d'e kunrun ndị Sukọtụ, sị wẹ, “Elee ni Zẹba lẹ Zal'muna, ụnụ gi ufiri wẹ mụ m ẹmụ, sị, ‘Y'a nwụndọngụọlẹ nwan Zẹba lẹ Zal'muna? Kị ẹnyi e yeni ndị agha ị ihiẹn-oriri — ọsụọn'a nị ndụn gụ wẹ?!’ ”

¹⁶ Ya ọ nọ weri ndị-isi obodo hụ, gi abị-ogun lẹ mkpalị rị alị ọkpọ-nkụn ye ikẹnnyẹ Sukọtụ ndị ahụn afụnfụn, nị wẹ marịn ihiẹn.

¹⁷ Ọ nọzị kụtu ụlọ-nche uku hụ rị Pẹniẹlụ, gbu ikẹnnyẹ obodo hụ.

¹⁸ Ya Gidiọnụ nọ nwan sị Zẹba lẹ Zal'muna, “Nanị kẹ ikẹnnyẹ ụnụ gbu imẹ Tabọ nọ?” Wẹ nọ sị a, “Wẹ nọ kẹ ịyụ; onyẹ-onyẹ imẹ wẹ nọ kẹ nwa eze.”

¹⁹ Ọ nọ sị wẹ, “Umunẹ m rọ, ụmụ nnẹ-ẹfọ m. Ma Osolobuẹ, omẹni ụnụ ete gbuni wẹ, m'e ke gbu ụnụ.”

²⁰ Ya ọ nọ bu ihun zinmẹ nwa-ibuzọ a wụ Jeta, sị, “Gbu wẹ!” Kanị, egun anịnị Jeta sepụhadẹ ọpịa-agha a, makẹni nwata k'ọ wụhụ.

²¹ Ya Zẹba lẹ Zal'muna nọ sị Gidiọnụ, “Bịa d'e gi ẹka ị gbu ẹnyi, makẹni kẹ ịhịan han, ẹrịra kẹ ikẹn ẹ han.” Ya Gidiọnụ nọ nọzụnhan, gbu wẹ, weri ihiẹn-olu anyịnyan-mkpukpuke wẹ.

Gidiọnụ A Kpụrụ Ẹfọdụ, Ẹwuru Ndị Nchụn-ẹjan

²² Ndị Izrẹlụ sị Gidiọnụ, “Kịma ẹnyi; ị kịgụ, nwa ị a kịsọn i, nwa-nwa ị a kịsọn ẹ, makẹni y'a gbapụhagụọ ẹnyi ẹka ndị Midianị.”

²³ Gidiọnụ nọ sị wẹ, “Akịkọ m ụnụ; nwa m akịkọ ụnụ; Osolobuẹ sikọ d'a kị ụnụ.”

²⁴ Ya ọ nọzị sị wẹ, “Ihiẹn ohuni kẹ m chọ ẹka ụnụ: onyẹ-onyẹ ya ye m ihiẹn-ntịn ohu imẹ ihiẹn ẹnyi kwalụa agha hụn wẹ keye ẹ.” (Ndị Midianị e yi ihiẹn-ntịn goru makẹni wẹ wụ ndị Ishmẹlụ.)

²⁵ Wẹ nọ sị, “Ọ sụọkadẹ ẹnyi nị ẹnyi ye y'ẹ.” Ya wẹ nọ we ẹwuru gbama alị, onyẹ-onyẹ nọ gha ihiẹn o bulụa agha tụ ihiẹn-ntịn ohu-ohu ye imẹ ẹwuru hụ.

²⁶ Ihiẹn-ntịn goru wẹ y'ẹ wụ kilo ọgụn, cheni ihiẹn-olu anyịnyan hụ lẹ ihiẹn-olu lẹ ihiẹn-ntịn ndị ọzọ lẹ ẹwuru pọpụ ṅanrannị ndị-nze Midianị hụ yi lẹ ihiẹn-olu rịsọnmẹ anyịnyan-mkpukpuke wẹ olu.

²⁷ Ya Gidiọnụ nọ gi goru hụ kpụrụ ẹfọdụ, ẹwuru ndị nchụn-ẹjan, bu ẹ che imẹ obodo ẹ wụ Ọfra. Ndị Izrẹlụ ile nọ gbasọnmẹ ẹfọdụ hụ, femẹ ẹ. Ọ nọ wụrụnị Gidiọnụ lẹ ezi-lẹ-ụlọ a ọnyan.

²⁸ Ẹrịra kẹ ndị Izrẹlụ dọn welụa ndị Midianị alị; enyọnpụhazịnị wẹ isi. Ya alị Izrẹlụ nọ zu ikẹn ahụa ọgụnnaị Gidiọnụ e we nwụn.

Gidiọnụ A Nwụnhụn

²⁹ Agha e bigụ, Jeru-Baalụ wụ Gidiọnụ nwa Jụashị nọ lashi iwe ẹ d'e biri.

³⁰ Ikẹnnyẹ ọ mụ ẹfọ rị iri kwasị ọgụn-ẹtọ, makẹni inyẹnmẹ ẹ bu ọda.

³¹ Mgba a hụn bi Shẹkẹm mụyezin'ẹ okẹnnyẹ, Gidiọnụ nọ gụn a Abimẹlẹkị.

³² Gidiọnụ nwa Jụashị ka ẹgẹdi ọhụnma-ọhụnma n'o d'a nwụnhụn; ya wẹ nọ li ẹ ye ili nẹdi ẹ wụ Jụashị rị imẹ Ọfra ndị Abiẹza.

³³ Hụn Gidiọnụ gihụ nwụnhụn, ndị Izrẹlụ nọ wezi enwẹn wẹ kwanị mmọn Baalụ, a kọma wẹ Baalụ-Bẹriti, gi ẹ họnrin ihiẹn w'e fe —

³⁴ anyanhanzịnị wẹ Osolobuẹ wụ Chuku wẹ hụn zụọpụha wẹ ẹka ndị-iṅẹnrẹn wẹ azụụn ile.

³⁵ Emẹni wẹ ikpụlọ Jeru-Baalụ wụ Gidiọnụ nọkẹ sị ịya mẹni Izrẹlụ ihiẹn-ọma hụ ile o mẹni wẹ.