Ndị Han Eṅẹn 7 - Ika

Isi Nke Ẹsa Kẹ Gidiọnụ Dọn Mẹri Ndị Midianị

¹ Ụz'ọtụntụn biribiri, Jeru-Baalụ (hụn wụ Gidiọnụ) lẹ ndị agha a ile nọ shi ẹhụ isi-mirin Harọdụ d'e ziẹntọ. Ndị Midianị rị wẹ ẹbamịn-ugu imẹ ọdanmgbugbu hụ rị ẹhụ Ugu nta Mọrẹ.

² Osolobuẹ nọ sị Gidiọnụ, “Ndị agha ị e bukẹmẹkẹ hụn m'e gi we ndị Midianị che wẹ ẹka mẹri, amamgbe Izrẹlụ a nyannị m isi nị ẹka wẹ zụọpụha wẹ.

³ Sị wẹ nwan, ‘Onyẹ egun rị a tụ, y'a kin azụụn; ya gha Ugu-Gilẹdị pụ.’ ” Ya madụ nnụ-uku ẹbụọ kwasị ọgụn (22,000) nọ lama, ọ họdụ madụ nnụ-uku iri (10,000).

⁴ Kanị, Osolobuẹ nọzị sị Gidiọnụ, “Ndị-agha hụ buzikwọ ọda, we wẹ shi iyi, nị m d'e lelen'i wẹ ebẹhụ, họye i ndị i jẹnkọ d'e weri. M sị, ‘Onyẹni jẹnkọ d'e sọnjẹn i,’ ịya sikọ d'e jẹn; kanị, m sị, ‘Onyẹni esọnjẹnkọ ị,’ o jẹnkọ.”

⁵ Ya Gidiọnụ nọ we ndị-agha hụ shi iyi. E ru w'ẹ, Osolobuẹ nọ sị Gidiọnụ, “Bu ndị k'e gi ire ra mirin kẹ nkitẹ che ụsụọ ohu, y'e bu ndị k'e gbu osekpu ra che ụsụọ ohu.”

⁶ Madụ ọgụn mmisẹn (300) gi ẹka kwọrị mirin, gi ire ra rịkẹ nkitẹ. Ndị ile họdụnị gbu osekpu ra.

⁷ Ya Osolobuẹ nọ sị Gidiọnụ, “Madụ ọgụn mmisẹnni gi ire ra kẹ m'e gi zụọpụha ụnụ, we ndị Midianị ye ụnụ mẹri. Ndị ile họdụnị wẹ lashi iwe wẹ.”

⁸ Wẹ ile nọ buru ihiẹn-oriri wẹ lẹ opi wẹ. Ya Gidiọnụ nọ zi ndị Izrẹlụ ile họdụnị lama, latọ madụ ọgụn mmisẹn hụ họdụnị sụọ. Ya nwẹn rị elu òke, ndị Midianị hụ imẹ ọdanmgbugbu òke hụ.

⁹ Imẹ uhinhin hụ, Osolobuẹ nọ sị Gidiọnụ, “Lihi ọtọ, hidan shi ebe ndị Midianị rị d'a maye wẹ, makẹni e wegụọ m wẹ che i ẹka n'i mẹri wẹ.

¹⁰ Kanị, omẹni egun anịkọ ị maye wẹ, we nwan odibo i wụ Pura hidan shi ebẹhụ wẹ rị,

¹¹ d'e gọn ntịn ihiẹn wẹ rị e ku. Ị nụgụ a, obi e ru i alị maye wẹ.” Ya kẹ ya lẹ Pura odibo ẹ nọ shi mkpẹnrẹn ebe ndị Midianị rị.

¹² Ogẹnni ndị Midianị lẹ ndị Amalẹki lẹ ndị ọzọ ile bizi ibe ọwụwa-ẹnyanwụn kpụjun imẹ ọdanmgbugbu hụ rịkẹ igurube; anyịnyan-mkpukpuke wẹ e jun kẹ ẹjan rị mkpẹnrẹn ohimin — ẹlẹ hụn w'a a gụn.

¹³ Ogẹn Gidiọnụ gi ru ebẹhụ, okẹnnyẹ ohu rịhụ e ziẹnni ibe ẹ nrọ. Ọ sị, “M rọ nrọ. Imẹ nrọ hụ, ogbe brẹdi bali nọ kperehẹ ebeni ẹnyi ndị agha Midianị rị. Ọ nọ gi ikẹn ti ọdụ ẹnyi, nke wụnị ọdụ a danshi azụụn, dankpọpụ.”

¹⁴ Hụn ọ rị e ziẹnni nrọ nọ sị a, “Onwọnni ihiẹn ọzọ ọnwan wụ karị ọpịa-agha Gidiọnụ nwa Jụashị, onyẹ Izrẹlụ. Chuku e weọlẹ ndị Midianị lẹ ndị ile rị ebeni ye ẹ mẹri.”

¹⁵ Mgbe Gidiọnụ gi nụ nrọ hụ lẹ nkọwa a, ọ nọ kụnị Chuku isi alị. O kinhẹn ebe ndị-agha Izrẹlụ rị, ọ nọ yi, “Lihi ni ọtọ, makẹni Osolobuẹ e yegụọ ụnụ ndị agha Midianị mẹri.”

¹⁶ Ọ nọ kebe madụ ọgụn mmisẹn ahụn ụzọ ẹtọ, bu opi lẹ okpokoro ẹgbo ọwa rị imẹ ẹ che onyẹ-onyẹ ẹka.

¹⁷ Ọ nọ sị wẹ, “E lee ni m; mẹ ni ihiẹn ọwụlẹ m mẹ. M ru mkpẹnrẹn ebẹhụ wẹ rị, ihiẹn m mẹ, ụnụ e mẹ.

¹⁸ Mmẹ lẹ ndị mmẹ lẹ wẹ wị gbu opi ẹnyi, ụnụ nwẹn a nọsọnmẹ ebẹhụ ụnụ fihunmẹ ndị Midianị gbu nke ụnụ, ụnụ e yi, ‘Nke Osolobuẹ lẹ nke Gidiọnụ!’ ”

¹⁹ Etintin abalị a ghafegụ ẹkẹrẹ, Gidiọnụ lẹ madụ ọgụn isẹn ya lẹ wẹ wị nọ ru mkpẹnrẹn ebe ndị-agha Midianị ziẹntọ, kẹ ndị-nche o ru gihụ nọkingụ ẹnya ndị chegụnị. Gidiọnụ wẹ nọ gbu opi wẹ, kụwasọnmẹ ẹgbo rị wẹ ẹka.

²⁰ Itu ẹbụọ họdụnị nọ nọ azụụn wẹ rịsọnmẹ gbuzi opi wẹ, kụwa ẹgbo wẹ. Ọwa rị wẹ ile ẹka-ekpẹn, opi rị wẹ ẹka-nni. Ya wẹ nọ yi, “Ọpịa-agha Osolobuẹ lẹ nke Gidiọnụ!”

²¹ Hụn ahụn onyẹ-onyẹ rị ọnọdị a, kehunmẹ ebẹhụ ndị-agha Midianị rị, ndị-agha Midianị ile nọ gbama ọsọ, yikọ oro, gbakọ.

²² Ogẹn opi ọgụn mmisẹn hụ gi han, Osolobuẹ nọ nu ndị-agha Midianị ile, wẹ nọ gi ọpịa-agha gbumẹ ibe wẹ. Ndị họdụ imẹ wẹ nọ gbashi Bẹt-Shita, ibẹka Zẹrera d'e rukwọrị ebe Ebẹlụ-Mehola ru, ẹhụ Tabatị.

²³ Gidiọnụ wẹ nọ kpọpụha ndị Izrẹlụ ndị ebọn Naf'tali lẹ Asha lẹ Manasẹ ile, wẹ nọ chụ ndị Midianị.

²⁴ Ya Gidiọnụ nọ zi ozi ghahunmẹ alị ile rị elu òke Ifrem, sị, “Pụha nị d'a lụsọn ndị Midianị ọgụn! D'a nọkin ni iyi-jọdanị lẹ ụmụ-iyi ẹ ile d'e rukwọrị Bẹt-Bara!” Ẹrịra kẹ wẹ dọn kpọpụha ikẹnnyẹ Ifrem ile, wẹ nọ nọkin mirin Jọdanị d'e rukwọrị Bẹt-Bara.

²⁵ Wẹ nọzị nwụndọn Orẹbụ lẹ Zibu, madụ ẹbụọ ahụn kị ndị-agha ndị Midianị; wẹ nọ gbu Orẹbụ tọ ọmụma wẹ rị nwan a kpọ “Ọmụma Orẹbụ”, gbu Zibu tọ ebe wẹ nọ a pịn manya hụn w'a kpọ nwan “Ebe Zibu nọ a pịn manya”. Wẹ nọ chụsọnmẹ ndị Midianị; omẹgụ, wẹ nọ wẹhẹni Gidiọnụ isi Orẹbụ lẹ Zibu ebe Gidiọnụ rị ẹhụ iyi Jọdanị.