Ndị Han Eṅẹn 4 - Ika

Isi Nke Ẹnọ Debọra

¹ Ogẹn Ehudu gi nwụnhụngụ, ndị Izrẹlụ nọ mẹzi ihiẹn rịlẹni mma ẹnya Osolobuẹ.

² Ya Osolobuẹ nọ hapụ wẹ nị Jabini eze Kenaanị mẹshi wẹ ikẹn. Jabini nọ obodo Hazọ a kị. Onyẹ ndu-agha a wụ Sisẹra hụn bi Haroshẹtị-Hagoyim.

³ Ya kẹ ndị Izrẹlụ nọ kwanburu Osolobuẹ, makẹni Jabini, hụn nwọn ụgbọ-ẹshin igwe ọgụn-isẹn kwasị nnụ-ẹbụọ (900) a bịangbuọlẹ wẹ ọrọgbọ ahụa ọgụn.

⁴ Okpoho onyẹ-amụma ohu w'a kpọ Debọra, nwunyẹ Lapidọtụ, a hannị Izrẹlụ eṅẹn ogẹn hụ.

⁵ O nwọn nkụ ọ nọdị okpuru ẹ, hụn w'a kpọ Nkụ Debọra, hụn rị ẹgbata Rama lẹ Bẹtẹlụ imẹ alị-ugu Ifrem. Okpuru Nkụ ebẹhụ kẹ ndị Izrẹlụ a bịa d'e kunrun ẹ n'o dọnzini wẹ oku.

Osolobuẹ E Gi Debọra Kpọ Barakị

⁶ Debọra zi wẹ kpọha Barakị nwa Abinụam, onyẹ obodo Kẹdẹshi onyẹ ebọn Naf'tali. Ọ nọ sị Barakị, “Osolobuẹ, Chuku Izrẹlụ, sị ị, ‘Jẹnmẹ; d'e weri ikẹnnyẹ ebọn Naf'tali lẹ Zẹbulọnụ nnụ-uku iri (10,000) n'i we wẹ shi Ugu Tabọ.

⁷ M k'e mẹ Sisẹra onyẹ ndu-agha Jabini lẹ ụgbọ-ẹshin ẹ lẹ ndị agha a bịa Iyi-Kishọnụ d'e kunrun i, we ẹ ye i mẹri.’ ”

⁸ Ya Barakị nọ sị a, “I sọnjẹn m, e jẹn m; omẹni y'e sọnjẹnni m, ejẹnkọ m.”

⁹ Debọra nọ sị, “Ọ hụghọ mma, m k'e sọnjẹn i; kanị, ebe ị rị a gụn agụngụnnị, ọghọ rịn'a erukọ ị ẹka — makẹni Osolobuẹ k'e we Sisẹra ye okpoho mẹri.” Ya Debọra nọ sọnjẹn Barakị Kẹdẹshi.

¹⁰ E ru w'ẹ, Barakị nọ kpọkikomẹ ebọn Zẹbulọnụ lẹ Naf'tali imẹ Kẹdẹshi, ikẹnnyẹ nnụ-uku iri (10,000) nọ sọnmẹ ẹ. Debọra nkẹ sọnzikwọ a.

¹¹ Ogẹn ahụn, Hẹba onyẹ Kẹni a ghagụọ ebe ndị Kẹni ụmụ Hobabụ ọgọ Mozizi bi pụ, weri ọdụ a d'e biri ẹhụ okẹn-osisi ahụn rị Zaananim, ẹhụ Kẹdẹshi ebẹhụ.

¹² Ogẹn wẹ gi gwa Sisẹra nị Barakị nwa Abinụam e werigụọ ndị-agha shi Ugu-Tabọ,

¹³ ọ nọ kpọnpụhachanrịn ụgbọ-ẹshin igwe ẹ ọgụn-isẹn kwasị nnụnaị (900) hụ lẹ ndị agha ile ya lẹ wẹ wị, a gha wẹ Haroshẹtị-Hagoyim shi Iyi-Kishọnụ.

¹⁴ Ya Debọra nọ sị Barakị, “Nje! Tannị kẹ Osolobuẹ rị e bu Sisẹra e che i ẹka n'ị mẹri ẹ. Osolobuẹ e burugụọnị n'ị ụzọ?” Ya Barakị nọ gha Ugu-Tabọ hidan, ya lẹ ikẹnnyẹ nnụ-uku iri (10,000) hụ sọnkọn'a.

¹⁵ Ogẹn Barakị gi maye wẹ, Osolobuẹ nọ gi ọpịa-agha wẹ mẹ Sisẹra lẹ ndị ụgbọ-ẹshin ẹ lẹ ndị-agha a ile ihiẹn, wẹ nọ gbamanị Barakị ọsọ, gbayịya. Ya Sisẹra nọ gha imẹ ụgbọ-ẹshin ẹ tụpụ, gi ụkụ gbapụ.

¹⁶ Barakị nọ chụ ndị ụgbọ-ẹshin Sisẹra lẹ ndị agha hụ ile d'e rukwọrị Haroshẹtị-Hagoyim. Wẹ nọ gi ọpịa-agha gbukwama ndị agha Sisẹra ile, kaka akpụ onyẹ ohu ahọdụnị.

¹⁷ Sisẹra nkẹ nọ gi ụkụ gbashi iwe Jaẹlụ hụn bi ụlọ w'a kpụkpọrị. Jaẹlụ wụ nwunyẹ Hẹba onyẹ Kẹni ahụn, makẹni Jabini eze Hazọ alị Sisẹra wẹ lẹ ndị ebọn Hẹba onyẹ Kẹni e mẹgbama ọhụnma-ọhụnma.

¹⁸ Jaẹlụ nọ pụha ezi d'e kunrun Sisẹra, sị a, “Alụa Diọkpa, banhan ndọọ; atụlẹ egun.” Ya Sisẹra nọ banye ọdụ Jaẹlụ, Jaẹlụ nọ gi ẹkwa kpumẹ ẹ.

¹⁹ Sisẹra nọ sị a, “Dodo ye m mirin ra, nị ẹgụn mirin rị a gụn m.” Jaẹlụ nọ gha ihiẹn akpụkpọ-anụ wẹ gbaye mirin-ẹran efin y'ẹ mirin-ẹran ra, gizi ẹkwa hụ kpumẹ ẹ.

²⁰ Sisẹra nọ sị a, “D'e wuzo ọnụmụzọ ọdụ; onyẹ bịa d'a jụ ị, ‘O nwọn onyẹ rị ebeni?’ Sị a, ‘Mba.’ ”

²¹ Kanị, ogẹn Sisẹra gi ranhịnmigụ, Jaẹlụ nwunyẹ Hẹba nọ weri hama lẹ nkpụkpọ wẹ gi a kpọdọn ụlọ w'a kpụkpọrị, gejẹn ebe Sisẹra ẹhụ rọchanrịngụ dinẹ a ranhịn. Ọ nọ kpọye ẹ ya isi, ẹhụ ntịn, ọ nọ gha azụụn hụn ẹbọ pụha, kpọye alị, Sisẹra nọ nwụnhụn.

²² Ogẹn Barakị hụn chụkọ Sisẹra gi ru ebẹhụ, Jaẹlụ nọ pụha d'e kunrun ẹ, sị a, “Bịa, nị m ghọsị ị okẹnnyẹ hụ ị rị a chọ.” Ya ọ nọ sọn ẹ banye imẹ ọdụ: e lee Sisẹra k'o fiẹnrin akpakalị ebẹhụ, ya lẹ nkpụkpọ ọ kpọye ẹ ụsụọ ntịn: ọ nwụnhụngụọ!

²³ Ụhụọhịn hụ kẹ Osolobuẹ we Jabini eze Kenaanị che okpuru ndị Izrẹlụ.

²⁴ Ndị Izrẹlụ hụ e nu Jabini, eze ndị Kenaanị, a karị a ẹka, a karịwaye d'e ru nị e huepụchanrịn w'a.