Ndị Han Eṅẹn 3 - Ika

Isi Nke Ẹtọ Alị Ndị Osolobuẹ Latọ Imẹ Kenaanị

¹ Ndịnị wụ nwan alị ndị Osolobuẹ latọ n'o gi lele ndị Izrẹlụ, ndị Izrẹlụ ile lụlẹni agha alị Kenaanị.

² O mẹhụ ihiẹnni n'o gi kuzi ụmụ Izrẹlụ lụtulẹni agha kẹ wẹ dọn a lụ agha.

³ Alị ndịnị rọ: alị eze isẹn ndị Filistia, ndị Kenaanị ile, ndị Sidọnụ lẹ ndị Hivu hụ bi Ugu Lẹbanọnụ — gha Ugu Baalụ-Hẹmọnụ d'e ru Lebo-Hamatị.

⁴ Osolobuẹ latọ wẹ n'o gi lele ndị Izrẹlụ, n'ọ marịn omẹni wẹ k'e mẹ ihiẹn Osolobuẹ gi Mozizi gwa ndị nẹdi wẹ kanị.

⁵ Ya ndị Izrẹlụ nọ biri imẹ ndị Kenaanị, ndị Hẹti, ndị Amọ, ndị Pẹrẹzi, ndị Hivu lẹ ndị Jebusu.

⁶ Wẹ lẹ ndị Izrẹlụ nọ lụtarịma di lẹ nwunyẹ, ndị Izrẹlụ e sọn wẹ femẹ mmọn-lẹ-iyi wẹ.

Ndị Hannị Wẹ Eṅẹn Ot'niẹlụ

⁷ Ndị Izrẹlụ mẹ ihiẹn rịlẹni mma ẹnya Osolobuẹ, wẹ zọ Osolobuẹ wụ Chuku wẹ, femẹ Baalụ lẹ Ashẹra.

⁸ Ya Osolobuẹ nọ gi olulu sọn Izrẹlụ ọda-ọda, o wedẹ wẹ ye Kushanị-Rishataịm eze Aram-Naharaịm mẹri, wẹ nọ rị okpuru ẹ ọrọgbọ ahụa ẹsatọ.

⁹ Kanị, a kwanburu wẹ Osolobuẹ, ọ nọ wepụhanị wẹ onyẹ k'a gbapụhanị wẹ — Ot'niẹlụ nwa Kẹnazi nwẹnẹ Kalẹbụ hụn rị a ibe alị; ọ nọ zụọpụha wẹ.

¹⁰ Mmọn Osolobuẹ ban imẹ ẹ, ọ hannị Izrẹlụ eṅẹn. O jẹn agha, Osolobuẹ nọ we Kushanị-Rishataịm eze Aram ye ẹ, ọ nọ mẹri ẹ.

¹¹ Udọn nọ rị alị hụ ọrọgbọ ahụa ọgụnnaị. Ya kẹ Ot'niẹlụ nwa Kẹnazi nọ nwụnhụn.

Ehudu

¹² Omẹgụ, ndị Izrẹlụ nọzị mẹ ihiẹn rịlẹni mma ẹnya Osolobuẹ, Osolobuẹ nọ gi ufiri ẹ mẹ ẹka kẹnrẹn Ẹglọnụ eze Mụabụ ọ nọ mẹshi wẹ ikẹn.

¹³ Ẹglọnụ nọ weri ndị Amọnụ lẹ ndị Amalẹki, ya lẹ wẹ nọ bịa d'a lụsọn Izrẹlụ agha, e weri wẹ obodo-nkụ wụ Jẹriko.

¹⁴ Ya ndị Izrẹlụ nọ rị okpuru Ẹglọnụ ọrọgbọ ahụa mmẹsatọ.

¹⁵ Ndị Izrẹlụ nọ kwanghọsịzị Osolobuẹ, ọ nọ ye wẹ onyẹ sikọ d'a gbapụhanị wẹ, Ehudu, onyẹ ẹka-ekpẹn, nwa Gẹra onyẹ ebọn Bẹnjamini. Ndị Izrẹlụ zi Ehudu wejẹnni Ẹglọnụ wụ eze Mụabụ ụtụ o be wẹ.

¹⁶ Ya Ehudu nọ kpụrụ ọpịa-agha ọnụnaị usue wụ ọbụkụ ohu lẹ nkirishi, o kẹn ẹ ye ọgbọdọgbọ ẹka-nni, yikpumẹ ẹ ẹwuru.

¹⁷ O ru ẹ, ọ nọ bu ụtụ hụ che ihun Ẹglọnụ eze Mụabụ hụ. Ẹglọnụ hi akpa ọda-ọda.

¹⁸ O buyegụ a ụtụ hụ wẹ be wẹ, ọ nọ sị ndị bun'ẹ ụtụ hụ lama.

¹⁹ Ehudu nkẹ e ruhụ ẹhụ ebẹhụ wẹ kpụtọ mmọn imẹ Gil'galụ, ọ nọ kin azụụn buru Ẹglọnụ, sị a, “Eze, dodo, o nwọn ozi wẹ sị m zi ịyụ sụọ.” Ya eze nọ sị, “Yegụ nị efe!” Ya kẹ idibo ẹ ile nọ pụ.

²⁰ Ehudu nọ nọkunmẹ ẹ ebẹhụ ya sụọ nọdị alị, imẹ mmughẹ rị ibe elu, imẹ ọgwa hụ ọ nọ a na ufere ogẹn uwowo, sị a, “Osolobuẹ zi m ozi zi i.” Hụn eze gihụ gha elu ocho ẹ lihi ọtọ,

²¹ Ehudu nọ gi ẹka-ekpẹn seri ọpịa-agha nta hụ rị a ọgbọdọgbọ ẹka-ihiẹn, zu ẹ ye eze ẹfọ.

²² Ọpịa-agha hụ nọ zubanchanrịn a ẹfọ, kẹ ọnụ a kẹ isi ẹ, ụtọrọ rị a ẹfọ nọ kpumẹ ẹ, makẹni Ehudu e sepụhan'a; ọnụ ọpịa hụ nọ wapu ẹ azụụn.

²³ Ya Ehudu nọ zue nzuzue pụ. Ọ gụnmagụọ ụzọ ile rị mmughẹ ibe elu hụ n'o d'a pụ, kpọkin wẹ.

²⁴ Ọ pụgụ, idibo hụ a pụha, hụn a nị ọnụmụzọ mmughẹ ndị hụ rị ibe elu kpọkin akpọhịn. Wẹ nọ sị, “Ikẹnkwọ ọ rị imẹ-imẹ ụlọ a nyụn nsịn.”

²⁵ E chebe wẹ d'e runi obi eruzini wẹ alị, eze a gụnpụkwọnị ọnụmụzọ mmughẹ hụ! Ya wẹ nọ nwan weri ịsahan kpọpụ ụzọ ndị hụ. E lee di-nwọnni wẹ k'o fiẹnrin akpakalị — ọ nwụnhụngụọ!

²⁶ Ogẹn hụ wẹ gi rị e che, Ehudu nkẹ a wapụgụọ. Ọ nọ ghashi ebẹhụ wẹ kpụtọ mmọn ndị hụ, gbashi Sẹira.

²⁷ O ru alị-ugu Ifrem, ọ nọ gbu opi agha, ndị Izrẹlụ nọ zu, sọnmẹ ẹ; ọ nọ duru wẹ gha elu-ugu ebẹhụ hidan.

²⁸ Ọ nọ sị, “Sọnmẹ ni m! Osolobuẹ e wegụọ Mụabụ wụ eṅẹnrẹn ụnụ ye ụnụ mẹri.” Ya wẹ nọ sọnmẹ Ehudu. E weri wẹ ebe ndị-ụkụ nọ e fetu Iyi-Jọdanị a pụ Mụabụ, anịnị wẹ ịhịan fetu.

²⁹ Ndị Mụabụ wẹ gbu ụhụọhịn hụ ru ihiẹn nọkẹ mmadụ nnụ-uku iri (10,000) ikẹnnyẹ ka-ẹhụ, ma lụ agha; onwọnni akpụ ohu wanahịnnị.

³⁰ Ụhụọhịn ahụn, ndị Mụabụ nọ we enwẹn wẹ che okpuru ndị Izrẹlụ. Udọn nọ rị alị hụ ọrọgbọ ahụa ọgụn-ẹnọ.

Shamga

³¹ Ogẹn Ehudu a ghafegụ, Shamga nwa Anatị nọ pụha. Shamga gi ẹgbe wẹ gi e du efin gbu ndị Filistia ọgụn-iri kwasị nnụ (500). Ẹrịra kẹ ya nwẹn gizi gbapụha Izrẹlụ.