Ndị Han Eṅẹn 2 - Ika

Isi Nke Ẹbụọ Osolobuẹ A Gwa Wẹ Nị Ẹfọ Asụọn'a Ụsụọ

¹ O ru, mmọn-ozi Osolobuẹ nọ gha Gil'galụ bịa Bokim, sị ndị Izrẹlụ, “Mmẹ gha alị Ijiptu wepụha ụnụ, du ụnụ ye alị hụ m kun enwẹn m kwe nkwa nị m k'e ye ndị nẹdi ụnụ kanị. M sị, ‘Onwọnni ogẹn m'e gi tikpọ nkwerigbama rị ẹgbata mmẹ lẹ ụnụ,

² ụnụ nwẹn, nị ụnụ lẹ ndị alịnị ekwerigbamakọ, kama, nị ụnụ sikọ d'e tikpọchanrịn ukpo wẹ nọsọnmẹ a chụn ẹjan.’ Kanị, ụnụ emẹni nwan ihiẹn m gwa ụnụ mẹ. Kị ụnụ mẹni ihiẹn nọ ẹrịra?

³ M rị nwan a gwa ụnụ nị achụpụkọzịnị m ụnụ wẹ; wẹ jẹnkọ d'a wụrụ ogun ẹkụnkụn ụnụ, mmọn-lẹ-iyi wẹ e họnrin ni ụnụ ọnyan.”

⁴ Ogẹn mmọn-ozi Osolobuẹ hụ gi gwagụ ndị Izrẹlụ ile ihiẹn ndịnị, wẹ nọ kwan ezigbo ẹkwan.

⁵ Ya haịn wẹ gi kpọ ebẹhụ Bokim hụn wụ Ndị Ẹkwan. Wẹ nọ nọ ebẹhụ chụnyeni Osolobuẹ ẹjan.

Agbọ Hụn Gi Ẹnya Hụn Ọrụn Osolobuẹ A Ghafe

⁶ Ogẹn Joshụa gi gbashịagụ ndị Izrẹlụ, wẹ nọ jẹn d'e weri alị hụ, ebọn-ebọn lẹ ebe wẹ keye wẹ.

⁷ Ndị Izrẹlụ fe Osolobuẹ ọrọgbọ hụ ile Joshụa gi rị ndụn, fe ẹ ọrọgbọ ahụn ile ndị-isi hụn họdụnị k'ọ nwụnhụngụ gi rị ndụn, ndị-isi hụn gi ẹnya hụn okẹn-ihiẹn ile Osolobuẹ rụnnị Izrẹlụ.

⁸ Ahụa iri kwasị ọgụn-isẹn kẹ odibo Osolobuẹ wụ Joshụa nwa Nọnụ rị k'ọ nwụn.

⁹ Wẹ nọ li ẹ ye alị wẹ ye ẹ imẹ Timnatị-Heresi hụn rị alị ugu Ifrem, ẹbamịn-ugu Ugu-Gaashị.

¹⁰ Ogẹn agbọ hụ ile gi nwụnchanrịgụ laburu ndị nẹdi wẹ, agbọ ọzọ nọ pụha hụn marịnlẹni kẹ Osolobuẹ kẹ ihiẹn ndị o mẹni ndị Izrẹlụ.

Ndị Izrẹlụ Efezini Osolobuẹ

¹¹ Ndị Izrẹlụ nọ mẹ ihiẹn rịlẹni mma ẹnya Osolobuẹ, fe mmọn Baalụ.

¹² A la wẹ Osolobuẹ tọ, Chuku ndị nẹdi wẹ, hụn gha alị Ijiptu wepụha wẹ. Wẹ nọ femẹ mmọn-lẹ-iyi, mmọn-lẹ-iyi ndị nọkunmẹni wẹ e fe, gi ẹ kpasu Osolobuẹ iwe,

¹³ makẹni wẹ latọ a d'e femẹ Baalụ lẹ Ash'ta.

¹⁴ Osolobuẹ nọ gi ọnụma sọn ndị Izrẹlụ, we wẹ ye ẹka ndị ohin, wẹ hụ a maye wẹ, a narịn wẹ ihiẹn wẹ; o re wẹ ye ndị iṅẹnrẹn wẹ rị wẹ azụụn ile, asazịnị wẹ ẹka che wẹ ọgụn.

¹⁵ Ogẹn ọwụlẹ ndị Izrẹlụ jẹn d'a lụ agha, Osolobuẹ e bunụmanị wẹ, mẹ wẹ mẹri wẹ, nọkẹ kẹ Osolobuẹ dọn kun enwẹn ẹ n'o k'e mẹ wẹ. Wẹ nọ rị okẹn nsọngbu.

¹⁶ O ru, Osolobuẹ e wepụhanị wẹ ndị ndu k'a hannị wẹ eṅẹn, a gbapụha wẹ wẹ ẹka ndị rị a maye wẹ a narịn wẹ ihiẹn wẹ.

¹⁷ Kanị, ndị Izrẹlụ egọnkọ ndị ahụn hannị wẹ eṅẹn ntịn, makẹni e wezi wẹ enwẹn wẹ kwanị mmọn-lẹ-iyi rị nọkẹ ịgbaraja, a kụnị wẹ isi-alị. A latọkẹnrinkẹ wẹ ụzọ ndị nẹdi wẹ hụn dọnmẹ iwu Osolobuẹ gha; emẹni w'ẹ.

¹⁸ Ogẹn ọwụlẹ Osolobuẹ gi ye ndị Izrẹlụ onyẹ-ndu a hannị wẹ eṅẹn, o sikọ d'a nọyeni onyẹ-ndu hụ, zụọpụha wẹ ẹka ndị-iṅẹnrẹn wẹ onyẹ-ndu hụ e we nwụn, makẹni omikẹn wẹ e mẹ Osolobuẹ wẹ gha a sụn udẹn okpuru ndị rị e mẹshi wẹ ikẹn a bịangbuni wẹ.

¹⁹ Kanị onyẹ-ndu hụ nwụnhụn, ndị Izrẹlụ e bimẹzi obibi kadẹ nke ndị mbụ a rụ, sọnmẹ mmọn-lẹ-iyi, femẹ wẹ, kụmanị wẹ isi alị. Ekweni wẹ latọ eje-ihiẹn wẹ rị e mẹ lẹ isi-akwanran wẹ rị a gba.

²⁰ Iwe Izrẹlụ nọ wẹ Osolobuẹ ọda-ọda, ọ nọ sị, “Makẹni ndịnị e tikpọlẹ Iwu m ye ndị nẹdi wẹ kanị lẹni egọnni wẹ m ntịn,

²¹ achụpụkọzịnị m wẹ alị ọwụlẹ imẹ ndị ahụn Joshụa chụpụlẹni n'o d'a nwụnhụn,

²² m k'e gi wẹ lele Izrẹlụ, nị m hụn kẹni wẹ gha ụzọ Osolobuẹ kẹ ndị nẹdi wẹ dọn gha a ra aghakọ w'a.”

²³ Ya haịn Osolobuẹ gi hapụ alị ndị ahụn; ọ chụpụnị wẹ ozigbo-ozigbo, o weni wẹ che Joshụa ẹka chụpụchanrịn ozigbo.