Ndị Han Eṅẹn 1 - Ika

Isi Nke Ohu Ndị Juda E Weri Alị Wẹ Keye Wẹ

¹ Ogẹn Joshụa gi nwụnhụngụ, ndị Izrẹlụ nọ jụ Osolobuẹ sị, “Elee ebọn sikọ d'e bu ụzọ jẹn d'a lụsọnni ẹnyi ndị Kenaanị ọgụn?”

² Osolobuẹ nọ sị, “Ndị Juda k'e bu ụzọ jẹn. Lee ẹ, e yegụọ m wẹ alị hụ mẹri.”

³ Ya ndị Juda nọ sị ebọn Simiọnụ umunẹ wẹ, “Sọnjẹnni ẹnyi d'a lụsọn ndị Kenaanị rị alị hụ wẹ keye ẹnyi ọgụn. Omẹgụ, ẹnyi nwẹn e sọnjẹn ụnụ hụn wẹ keye ụnụ.” Ya ndị Simiọnụ nọ sọnmẹ wẹ.

⁴ Mgbe ndị Juda gi nwan maye ndị Kenaanị, Osolobuẹ nọ we ndị Kenaanị lẹ ndị Pẹrẹzi ye wẹ mẹri, wẹ nọ gbu madụ nnụ-uku iri (10,000) imẹ alị Bẹzẹki.

⁵ Ebẹhụ kẹ wẹ nọ hụn eze Kenaanị hụ wụ Adoni-Bẹzẹki, lụsọn ẹ ọgụn; ẹrịra kẹ wẹ dọn mẹri ndị Kenaanị lẹ ndị Pẹrẹzi.

⁶ Ogẹn Adoni-Bẹzẹki gi gbapụ, wẹ nọ chụ a, nwụn a, japụsọnmẹ ẹ isi-ẹka ẹbụbụọ lẹ isi-ụkụ ẹbụbụọ.

⁷ Adoni-Bẹzẹki nọ sị, “Ndị-nze iri kwasị ọgụn-ẹtọ (70) hụn m japụ eze-ẹka lẹ eze-ụkụ a nọgụọ okpuru teburu m, a tụtụri ifunfun ihiẹn-oriri. Chuku a kụgụọ m nwan ụgwọ ihiẹn m mẹ wẹ.” Wẹ nọ wẹhẹ Adoni-Bẹzẹki Jerusalẹm, ọ nọ nwụntọ ebẹhụ.

⁸ Ndị Juda nọzị maye obodo Jerusalẹm ọgụn, weri ẹ. Gi ọpịa-agha gbu ndị obodo hụ, yi ẹ ọkụn.

⁹ O mẹgụ, ndị Juda nọzị jẹn d'a lụsọn ndị Kenaanị bi alị-ugu ọgụn, lẹ ndị hụn rị ẹbamịn ndịdan-mirin imẹ Nẹgẹvụ lẹ ndị hụn rị ukun ugu ẹbamịn ọdịdan-ẹnyanwụn.

¹⁰ Wẹ nọzị jẹn d'a lụsọn ndị Kenaanị bi Hibrọnụ (hụn wẹ te a kpọ Kiriatị-Aba) ọgụn, nọ ebẹhụ gbu adụn-aran ẹtọ: Shẹshaị, Ahimanị lẹ Tal'maị.

Ot'niẹlụ Hụn Mẹrini Kalẹbụ Ndị Debẹ

¹¹ Wẹ nọ gha Hibrọnụ jẹn d'a lụsọn ndị bi obodo Debẹ (hụn w'e te a kpọ Kiriatị-Sẹfa) ọgụn.

¹² Kalẹbụ nọ sị, “Onyẹ hụn sikọ d'a lụsọn Kiriatị-Sẹfa ọgụn, mẹri ẹ, e we m nwa m wụ Ak'sa ye ẹ lụrụ.”

¹³ Ot'niẹlụ nwa Kẹnazi nwẹnẹ Kalẹbụ hụn rị a ibe alị nọ mẹri obodo hụ, Kalẹbụ nọ we nwa a wụ Ak'sa y'ẹ lụrụ.

¹⁴ Ụhụọhịn ohu, Ak'sa nọ bịa, sị di ẹ wụ Ot'niẹlụ ya rịọ nẹdi ẹ alị. Ogẹn Ak'sa gi gha elu jaki ẹ hidan, Kalẹbụ nẹdi ẹ nọ sị a, “K'ị sị m mẹn'i?”

¹⁵ Ya ọ nọ sị a, “Mẹni m ọhụnmanị: hụnnị o mẹni y'e yegụọ m alị imẹ alị ọkpọ-nkụn Nẹgẹvụ, yezi m isi-mirin chen'ẹ.” Ya Kalẹbụ nọ ye ẹ isi-mirin: kẹ ndị nọ ebe jẹn elu elu-ugu a gbapụha kẹ ndị nọ ibe alị a gbapụha.

Obodo Ndị wụzị Nke Ndị Juda

¹⁶ Ebọn nẹdi-nwunyẹ Mozizi, onyẹ Kẹni, gha Jẹriko, Obodo-Nkụ, sọnmẹ ndị Juda d'e biri imẹ igunrun ndị bi Alị ọkpọ-nkụn Juda, imẹ Nẹgẹvụ, ẹhụ Aradị.

¹⁷ Ndị Juda nọ sọn umunẹ wẹ wụ ndị Simiọnụ d'a maye ndị Kenaanị bi obodo Zẹfatị ọgụn, tikpọchanrịn obodo hụ ru alị. Ya wẹ nọ kpọ a Homa hụn wụ Ntikpọ.

¹⁸ Ndị Juda nọzị gi agha weri Gaza, Ash'kẹlọnụ lẹ Ẹkrọnụ, wẹ lẹ alị ndị fihunmẹni wẹ.

Ndị Salẹni Ẹka Chụpụ Ndị Rị Alị Wẹ Keye Wẹ

¹⁹ Osolobuẹ nọyeni ndị Juda anọyeni. Wẹ nọ gi ẹ weri alị ndị rị ugu; kanị, nke ndị bi alị-aradan, asanị wẹ ẹka chụpụ wẹ, makẹni ndị hụ nwọnsọnmẹ ụgbọ-ẹshin igwe wẹ gi a lụ agha.

²⁰ O ru, wẹ nọ we obodo Hibrọnụ ye Kalẹbụ nọkẹ kẹ Mozizi dọn ku; ịya chụpụ adụn-aran ẹtọ hụ, ndị ebọn Anakị.

²¹ Nke ndị Bẹnjamini, asanị wẹ ẹka chụpụ ndị Jebusu bi Jerusalẹm; ndị Jebusu bikwọ nwan igunrun ndị Bẹnjamini ebẹhụ d'e ru tannị.

²² Ogẹn ikpụlọ Josẹfụ gi maye obodo Bẹtẹlụ ọgụn, Osolobuẹ nọyeni wẹ anọyeni.

²³ Wẹ nọ zi ndị wẹ zi d'e gi nzuzue lele kẹ Bẹtẹlụ (hụn wẹ te a kpọ Luzu) nọ,

²⁴ ndị hụ wẹ zi nọ hụn okẹnnyẹ ohu gha imẹ obodo ahụn pụkọ, wẹ nọ sị a, “Ghọsị ẹnyi kẹ ẹnyi a dọn banye imẹ obodoni, nị ẹnyi nwẹn mẹzikwọ ị ọhụnma.”

²⁵ Ya ọ nọ ghọsị wẹ ebe w'a gha banye. Wẹ nọ gi ọpịa-agha maye ndị obodo hụ, gbucharịn ịhịan ile rịn'a, gbuhọdụ okẹnnyẹ ahụn lẹ ikpụlọ a sụọ.

²⁶ Omẹgụ, okẹnnyẹ hụ nọ shi alị ndị Hẹti, pumẹ obodo ebẹhụ, kpọ a Luzu, ya kẹ w'a kpọkwọ nwan obodo hụ d'e ru tannị.

²⁷ Nke ebọn Manasẹ, achụpụnị wẹ ndị Kenaanị bi Bẹt-Shanị, Taanakị, Dọ, Ibliam lẹ Mẹgido lẹ ụmụ-alị nọhunmẹ obodo ndịnị, makẹni ndị Kenaanị hụ ekwerini pụ alị hụ.

²⁸ Mgbe Izrẹlụ gi kẹnrẹn, wẹ nọ wa ọrụn ye ndị Kenaanị ahụn olu rụnmanị wẹ kẹ igbọn, kanị onwọnni ogẹn wẹ gi chụpụkwama wẹ.

²⁹ Ndị ebọn Ifrem nke ẹ achụpụnị ndị Kenaanị bi obodo Gẹza, ndị Kenaanị nọ nwan bisọnmẹ imẹ igunrun ndị Ifrem ebẹhụ.

³⁰ Ndị ebọn Zẹbulọnụ nke ẹ achụpụnị ndị Kenaanị bi Kitrọnụ lẹ Nahalọlụ, wẹ nọ nwan bisọnmẹ imẹ igunrun wẹ ebẹhụ; kanị a waghọ wẹ ọrụn ye ndị Kenaanị ahụn olu rụnnị wẹ kẹ igbọn.

³¹ Ebọn Asha achụpụnị ndị bi obodo Ako, Sidọnụ, Ah'labụ, Akizibu, Hẹl'ba, Afẹki mọbụ Rehobu.

³² Ufiri ẹ, ndị Asha bikwọ nwan igunrun ndị Kenaanị bi ebẹhụ.

³³ Ebọn Naf'tali nke ẹ achụpụnị ndị bi Bẹt-Shẹmẹshi lẹ Bẹt-Anatị; ndị Naf'tali nkẹ nọ nwan bisọnmẹ imẹ igunrun ndị Kenaanị bi alị hụ, ndị bi Bẹt-Shẹmẹshi lẹ Bẹt-Anatị nọ wụrụ igbọn ndị w'a waye ọrụn olu.

³⁴ Nke ndị Danị, ndị Amọ anịnị wẹ weri alị karị hụn wẹ weri elu ugu, anịnị wẹ wẹ banhan alị-aradan.

³⁵ Ndị Amọ shi ọnwụn bisọnmẹ Ugu-Heresi, Aịjalọnụ, Shaalubim; kanị mgbe ikpụlọ Josẹfụ gi shiwaye ikẹn, wẹ nọ wa ọrụn ye wẹ nwẹn olu.

³⁶ Ebe alị ndị Amọ ru wụ gha Akrabim d'e ru Sẹla d'e ru elu ugu ndị ahụn rị ebẹhụ.