Ndị Filipi 1 - Ika

Isi Nke Ohu

¹ Pọlụ lẹ Timoti de ẹkụkwọ-ozini. Ẹnyi wụ igbọn Kraịstị wụ Jizọsị. Ẹnyi rị e dejẹnni ndị ile rị imẹ Kraịstị wụ Jizọsị, ndị nsọ Osolobuẹ, hụn rị Filipi, uwẹ lẹ ndị-isi wẹ lẹ ndị-ọrụn ụka wẹ.

² Ẹfọma lẹ udọn hụn gha ẹka Chuku Nẹdi ẹnyi lẹ Di-nwọnni-ẹnyi Jesu Kristi bịa ya rịnị ụnụ.

Pọlụ Hụ E Ro Wẹ, E Mẹni Wẹ Ekpere

³ M'e ye Osolobuẹ m ekele ogẹn ile m gi a nyanhan ụnụ;

⁴ ogẹn ile m gi e mẹ ni ụnụ ile ekpere, m'e gi ịghọghọ e mẹ ẹ,

⁵ makẹni ụnụ hụ e yeni m ẹka imẹ ọrụn oziọma ghakwọrị ụhụọhịn ibuzọ hụ ụnụ nụ oziọma d'e rukwọ nwan ogẹnni.

⁶ O weghọ m ẹnya nị Onyẹ ahụn bidọn ọrụn-ọmanị imẹ ụnụ k'a gha a rụn a d'e ru n'ọ rụnchanrịn a Ụhụọhịn Kraịstị wụ Jizọsị k'e gi bịa.

⁷ O furughọ nị oku ụnụ ile a rị m ẹnịna, makẹni ụnụ rị m obi ogẹn ile! Ẹghẹẹ, makẹni mmẹ lẹ ụnụ hụ e gi ihiẹn Osolobuẹ gi a gọzi ẹnyi e yetarị ẹka: kẹ ebe m rị imẹ ngan kẹ ebe m rị a kwadọn oziọma, e mẹ ihiẹn o gi e werichanrịn ọnọdị.

⁸ Osolobuẹ wụ ọshẹri m nị ụnụ a da m ọda-ọda, ọdịda hụn gha ẹka Kraịstị wụ Jizọsị bịa.

⁹ Ekpere m wụ nị ụnụ e nwọn ihiẹn-ọsụsụọ, e nwọnwaye, ihiẹn-ọsụsụọ ya lẹ amamihiẹn lẹ nghọta zu oke wị,

¹⁰ kẹni ụnụ hụn ụzọ sa ẹka a họrị ihiẹn ka mma sụọ, ụnụ a wụrụ ndị nwọnlẹni ntụpọ mọbụ nkọrịanị Ụhụọhịn Kraịstị k'e gi bịa,

¹¹ makẹni o ru a hụn w'a nị ndụn ụnụ a mịjungụọ mkpụrụ hụn wụ ezi-omumẹ, hụn gha ẹka Jesu Kristi a bịa. O k'e wẹhẹni Osolobuẹ ọghọ lẹ ọjịja-mma.

Nsọngbu M A Kwadọngụọ Oziọma!

¹² Umunẹ m, m chọ nị ụnụ marịn nị ihiẹn mẹni m e yegụọ nị oziọma ẹka ghagbarị nke-esi.

¹³ O mẹgụọdẹ ịhịan ile rị obi-eze Siza lẹ ndị ọzọ ile marịn nị ufiri Kraịstị kẹ m gi rị ngan.

¹⁴ Ngannị wẹ tụ m e mẹgụọzị obi rukẹnmẹ ndị itu-Kraịstị ibe ẹnyi bu ọda alị imẹ Di-nwọnni-ẹnyi, w'e kushi nwan oku-Osolobuẹ ikẹn karị kẹ w'e ku ẹ mbụ — egun arịzị wẹ ẹnya.

¹⁵ O nwọnghọ ndị gi iwe-ẹnya e zi ozi Kraịstị, nị wẹ gi ẹ mẹkarị ibe wẹ. Kanị, ndị ọzọ bu ihiẹn rị mma obi e zi ẹ,

¹⁶ e zi ozi Kraịstị yeni ihiẹn-ọsụsụọ, makẹni a marịngụọ wẹ nị Osolobuẹ mẹ wẹ tụ m ngannị kẹni o gi ẹ kwadọn oziọma.

¹⁷ Ndị gi iwe-ẹnya e zi ẹ gi ozi wẹ rị e zini Kraịstị a chọ nke wẹ, ẹlẹ nị wẹ rị e ro oziọma; wẹ rị a chọhụ nị wẹ we afụnfụn cheni afụnfụn m rị a ta imẹ ngannị m rị.

¹⁸ Kị rị a? K'ọ rị, k'ọ rị, wẹ hụ e gi ụzọ ile e zi ozi Kraịstị: kẹ wẹ bu ihiẹn rị mma obi kẹ wẹ bu ihiẹn ọzọ obi e zi ẹ. Ịya wụ ịghọghọ m!! Ẹghẹẹ, m k'a gha a ghọghọ.

Kẹ Ọnwụn Kẹ Ndụn, Erere Rọ

¹⁹ Makẹni, a marịngụọ m nị wẹ k'a hatu m ghahanị ekpere ụnụ lẹ eyemẹka Mmọn Jesu Kristi.

²⁰ M nwọn olilẹnya ọda-ọda nị egikọ m egun mẹ ihiẹn ifẹnrẹn e gi mẹ m; kama, nị m k'e kuzi oku Kraịstị kikẹnni, kushi ẹ ikẹn kẹ m dọn e ku ẹ mbụ, gi ẹhụ m buli Kraịstị elu, omẹni ịrịn'a ndụn rọ, omẹni ịnwụnn'a ọnwụn rọ.

²¹ Makẹni, o mẹ nke m, m rị ndụn, m rịnị Kraịstị; m nwụnhụn, erere rọ.

²² Kanị, m rị ndụn, e gi m'ẹ rụnpụhanị Kraịstị ihiẹn: amarịnzị m nwan hụn m k'a hanrịn!

²³ M ri e roshi azụụnnị, e roshi azụụnnị: k'ọ rị m, a la m ụwanị tọ d'e du Kraịstị nọdị, makẹni ọhụn ka mma.

²⁴ Kanị, m rị ndụn, ịya k'a ka ụnụ ẹka e yeni.

²⁵ Makẹni ọhụn we m ẹnya, a marịngụọ m nị m k'a rị ndụn sọn ụnụ ile nọdị, kẹni ụnụ a gha ihun, a ghọghọ imẹ okukwe.

²⁶ Ogẹn ahụn, ọbịbịa m a wụrụ ihiẹn ụnụ e gi nyan isi ọda-ọda imẹ Kristi wụ Jesu n'o mẹkẹ.

Ukpokpo Lẹ Nzụọpụha Wị

²⁷ Ka bisọnmẹni obibi furu oziọma Kraịstị, n'o mẹni kẹ m bịa d'a hụn ụnụ kẹ abịanị m, nị ntịn kẹ m gihụ nụ ukwere ụnụ, e gi m'ẹ dọn nị ụnụ gi mmọn ohu wuzo, gi obi ohu a lụ ọgụn ụnụ gi a kwadọn ihiẹn ile oziọma sị ẹnyi kweri;

²⁸ ụnụ egini egun ndị-iṅẹnrẹn ụnụ mẹhunmẹ kaka akpohu, hụn ghọsị nị wẹ k'a la ntikpọ, ụnụ nwẹn e nwọnrin nzụọpụha. Wẹ ile ghachanrịn ẹka Osolobuẹ bịa.

²⁹ Makẹni Osolobuẹ e yeọlẹ ụnụ oghere, ẹlẹ hụn ụnụ e gi kweri ni Kraịstị sụọ kanị hụn ụnụ e gizi tan'a afụnfụn,

³⁰ makẹni ụnụ e shimẹgụọ nwan ọnwụn hụ ụnụ hụn m rị e shi mbụ, ụnụ a nụgụọzị nị m rịkwọ nwan e shi ẹ.