Matiu 27 - Ika

Isi Nke Ẹsa-kwasị-ọgụn E We Wẹ Jizọsị Shi Ọgwa Gọvanọ Wụ Paịleti

¹ O ru ụzụtụntụn, ndị-isi nchụn-ẹjan ile lẹ ndị-isi nọ jẹn umẹ kẹni wẹ hụn ụzọ gbu Jizọsị.

² Wẹ nọ kẹn ẹ ẹgbụn, we ẹ jẹnni Paịleti, Gọvanọ ndị Rom tumẹni wẹ.

Judasị E Hogbu Enwẹn Ẹ

³ Ogẹn Judasị hụn re ẹ ye wẹ gi marịn nị a magụọ wẹ Jizọsị ikpe-ọnwụn, ọ nọ kwan mmanị, wekinni ndị-isi nchụn-ẹjan lẹ ndị-isi akpụrụ siliva iri-kwasị-ọgụn hụ wẹ kụ a,

⁴ sị, “E mẹgụọ m njọ m gi re onyẹ nwọnlẹni ihiẹn o mẹ.” Kanị, wẹ nọ sị a, “Ọ gbashịarịnị ẹnyi; ọhụn wụ mkpa ị!”

⁵ Ọ nọ tụ akpụrụ egho siliva ndị hụ ye alị imẹ Ụlọ-nsọ, pụ d'e hogbu enwẹn ẹ.

⁶ Ndị-isi nchụn-ẹjan nọ tụtụrụ akpụrụ egho siliva ndị hụ; wẹ nọ sị, “O furuni nị ẹnyi bu wẹ che ebe w'e dọnmẹ ihiẹn imẹ Ụlọ-nsọ, makẹni egho ẹdeke rọ.”

⁷ Ya wẹ nọ tụgbama iroro, gi ẹ ṅọnrin ogige onyẹ a kpụ ite, gi ẹ họnrin ikpẹkpẹ itumunyẹ.

⁸ Ya haịn wẹ gi a kpọ ogige hụ “Ogige Ẹdeke” d'e rukwọ tannị.

⁹ Ya kẹ ihiẹn Osolobuẹ gi Jerimaya onyẹ-amụma ku nọ mẹzu, “Wẹ nọ weri akpụrụ egho siliva iri-kwasị-ọgụn hụ, ọnụ egho ndị Izrẹlụ hụn okẹnnyẹ hụ;

¹⁰ gi ẹ ṅọnrin ogige Ọkpụ-ite kẹ Di-nwọnni-ẹnyi dọn gwa m.”

Kẹ Paịleti Dọn Jụ Jizọsị Ụtaa

¹¹ Jizọsị turu nwan ihun Paịleti, hụn wụ Gọvanọ rị a kịdọnni ndị Rom. Paịleti nọ sị, “Ịyụ wụ eze ndị Ju?” Jizọsị nọ sị a, “Y'e kugụọ a.”

¹² Kanị, ogẹn ndị-isi nchụn-ẹjan lẹ ndị-isi gi rị e kingbu ẹ ebẹhụ, ọ gba nkịtịn!

¹³ Ya kẹ Paịleti nọ sị a, “Y'a rị a nụ ihiẹn ile wẹ rị e kin nị ya k'i mẹ?”

¹⁴ Kanị, ọ shịarịnị ihiẹn ọwụlẹ, kaka akpohu — nke wụnị ọ tụ Paịleti wụ Gọvanọ ẹnya ọda-ọda.

Kẹ Wẹ Dọn Ma Jizọsị Ikpe Ọnwụn

¹⁵ Mmẹmmẹ-nghafe ọwụlẹ, Gọvanọ a hapụnị wẹ onyẹ-ngan ohu ọwụlẹ wẹ chọ.

¹⁶ Ogẹn hụ, eje-ịhịan wẹ marịn amarịn rị imẹ ụlọ-ngan. Ẹfan a wụ Jizọsị Barabasị.

¹⁷ Ogẹn ndị alị gi zugụ, Paịleti nọ sị wẹ, “Onyẹ kẹ ụnụ chọ nị m hapụnị ụnụ? Jizọsị wụ Barabasị ra Jizọsị w'a kpọ Kraịstị?”

¹⁸ Paịleti ku ihiẹnni makẹni ọ marịngụọ nị iwe kẹ wẹ gi we Jizọsị wụ Kraịstị ye ẹ.

¹⁹ Ogẹn Paịleti gi nọdị alị elu Ocho okinkin-ikpe, nwunyẹ ẹ nọ zi wẹ d'a sị a, “Wepụkwọ ẹka oku onyẹ ezi-omumẹ hụ, makẹni e gigụọkwọ m'a rọ eje-nrọ tannị.”

²⁰ Kanị ndị-isi nchụn-ẹjan lẹ ndị-isi Izrẹlụ nọ sị igunrun hụ wẹ sị Paịleti hapụnị wẹ Barabasị, wẹ gbu Jizọsị.

²¹ Paịleti nọ jụzị wẹ, “Imẹ wẹ ẹbụbụọ, onyẹ kẹ ụnụ chọ nị m hapụnị ụnụ?” Wẹ nọ sị, “Barabasị.”

²² Paịleti nọ sị, “Kị m'e gi nwan Jizọsị w'a kpọ Kraịstị mẹ?” Wẹ ile nọ sị, “Kpọgbu ẹ.”

²³ Ọ nọ sị, “Kị haịn? Elee eje-ihiẹn k'o mẹ?” Kanị wẹ ile nọ yikẹnmẹdẹ oro, sị, “Kpọgbu ẹ elu obe.”

²⁴ Ogẹn Paịleti gi hụn nị arị wẹ e kweri nke ẹ, hụnzị a nị isusu e d'e bidọn, ọ nọ weri mirin kwọpụ ẹka idẹnya igunrun hụ, sị, “Ẹdeke onyẹni arị m ẹka; ẹka ụnụ k'ọ rị nwan!”

²⁵ Igunrun hụ ile nọ sị, “Ẹghẹẹ, ẹdeke ẹ ya rị ẹnyi lẹ ụmụ ẹnyi isi!”

²⁶ Ya ọ nọ hapụnị wẹ Barabasị; ọ fịangụ Jizọsị mkpịnsịn, ọ nọ w'ẹ ye wẹ kpọgbu.

Kẹ Ndị-agha Dọn Gi Jizọsị Gu Egu

²⁷ Ya ndị-agha Paịleti nọ we Jizọsị shi imẹ ọgwa Paịleti, kpọgbama itu-agha hụ ile; ya wẹ nọ fihunmẹ Jizọsị.

²⁸ Wẹ nọ gbụpụ a ẹwuru ẹ, yimẹ ẹ ẹwuru ufie lekẹ eze.

²⁹ Wẹ nọ gi ogun kpa okpu-eze, bu ẹ che ẹ isi, bu ọkpọ che ẹ ẹka-ihiẹn; e gbun'ẹ osekpu, e gi ẹ e gu egu, a sị a, “Agụ!! Eze ndị Ju!!”

³⁰ Wẹ nọ jụ a ẹsọn, napụ a ọkpọ hụ wẹ te buche ẹ ẹka, fịanma a ya isi.

³¹ Ogẹn wẹ gi gigụ a kpa ẹmụ, wẹ nọ yipụ a ẹwuru ufie hụ, yimẹzi ẹ ẹwuru ẹ. Wẹ nọ duru ẹ d'a kpọgbu elu obe.

A Kpọma Wẹ Jizọsị Elu Obe

³² Ebe wẹ jẹnkọ, wẹ nọ kunrun onyẹ Saịrini ohu w'a kpọ Saịmọnụ, wẹ nọ w'a y'ẹ olu buru obe Jizọsị.

³³ Ogẹn wẹ gi ru ebe w'a kpọ “Gọgọta” hụn wụ “Ebe-Okpokomisi”,

³⁴ wẹ nọ ye Jesu manya wẹ buche ihiẹn e lu ilu ra, kanị, ọ danmịn a, ọ nọ jụ n'ọ rakọ a.

³⁵ Ogẹn wẹ gi kpọmagụ a elu obe, wẹ nọ tụ nkpọ, gi ẹ keri ẹwuru ndị o yi. Ọnwan mẹ kẹni ihiẹn onyẹ-amụma ku hụn ụzọ mẹzu. Onyẹ-amụma sị, “E keri wẹ ẹkwa m, a tụ wẹ nkpọ, gi ẹ keri ẹwuru m.”

³⁶ Wẹ nọ nọdị alị, e che ẹ nche.

³⁷ Wẹ de ihiẹn wẹ gi m'a ikpe ye elu obe hụ, ibe isi ẹ. Ihiẹn wẹ de wụ, “Ọnwan wụ Jizọsị, Eze ndị Ju.”

³⁸ Wẹ kpọmazị ndị ohin ẹbụọ chen'ẹ, onyẹ ohu elu obe rị ẹka-nni ẹ, onyẹ ohu elu obe rị ẹka-ekpẹn ẹ.

³⁹ Ndị ghafekọnị hụ a kpọlịa a, e finfin isi,

⁴⁰ a sị, “Onyẹ nwẹn sị o k'e tikpọ Ụlọ-nsọ gi akpọhịn ẹtọ tụndọnzi ẹ, zụọpụha nwan enwẹn i! Omẹni ị wụ Nwa Osolobuẹ, gha elu obe hidan.”

⁴¹ Ẹrịra kẹ ndị-isi nchụn-ẹjan lẹ ndị-nkuzi Iwu lẹ ndị-isi dọnzikwọ mụ a ẹmụ, a sị,

⁴² “Ọ zụọpụhagụọ ndị ọzọ, kanị ọ sa nị ẹka zụọpụha enwẹn ẹ. Ịya wụ eze Izrẹlụ nụ! Ya gha nwan elu obe hidan, kẹni ẹnyi kwerin'ẹ.

⁴³ O gi Osolobuẹ dọn ẹnya; Osolobuẹ ya zụọpụha a nwan omẹni ọ chọghọ a. Makẹni, ọ sị, ‘Mmẹ wụ Nwa Osolobuẹ.’ ”

⁴⁴ Ẹrịra kẹ ndị ohin ahụn wẹ kpọmasọnmẹ elu obe kẹ ya dọnzikwọ kpari ẹ.

Ọnwụn Jizọsị

⁴⁵ Efinnaị hụ, ọkịkị nọ gba alị hụ ile gha ọkụrọkụ mmẹbụọ ẹnya anwụn gi a rị isi d'e ru ọkụrọkụ ẹtọ.

⁴⁶ Ibẹka ọkụrọkụ ẹtọ, Jizọsị nọ gi okẹn olu yi, sị, “Ẹlaị! Ẹlaị!! Lama Sabakitani?!” Ya wụ, “Osolobuẹ m! Osolobuẹ m!! Kị haịn i gi la m tọ?!”

⁴⁷ Kanị, ụfọdụ ndị turu ebahụn a nụ a, wẹ nọ sị, “Ọ rị a hị Ẹlaịja!”

⁴⁸ Onyẹ ohu imẹ wẹ nọ gbajẹn ozigbo, bịan ẹru ye imẹ manya rụ-ụka, fa a ye mkpịnsịn gi ẹ y'ẹ ya ra elu obe hụ ọ rị.

⁴⁹ Kanị, ndị ọzọ sị, “Cheri ni, nị ẹnyi lele kẹ Ẹlaịja k'a bịa d'a zụọpụha a.”

⁵⁰ Jizọsị nọ gi okẹn olu yizi oro, kwọnbepụ, nwụnhụn.

⁵¹ Ya kẹ ẹkwa wẹ gi gbọnbepụ Ebẹhụ Kachanrịn Nsọ imẹ Ụlọ-nsọ nọ gbawa ẹbụọ ozigbo, gha elu d'e ru alị. Alị nọ zinzin, ọmụma hụ e tiwa;

⁵² ili ichẹn-ichẹn nọ kpupụ, ndị nsọ bu ọda nwụnhụnnị nọ lihi.

⁵³ Ogẹn Jizọsị gi ghagụ ọnwụn lihi, wẹ nọ pụhasọnmẹ, banye imẹ obodo nsọ hụ wụ Jerusalẹm; ndị bu ọda hụn wẹ ebẹhụ.

⁵⁴ Ogẹn ọkị-agha hụ lẹ ndị-agha ya lẹ wẹ rị e che Jizọsị nche gi hụn alị-ọmahihie lẹ ihiẹn ndị hụ mẹni, egun nọ bịa wẹ, wẹ nọ sị, “Ezioku, onyẹni wụ Nwa Osolobuẹ!”

⁵⁵ O nwọn ikpoho bu ọda rịzị ebẹhụ hụn gha ebe teni e lee ihiẹn rị e mẹni. Ndịnị gha Galili sọnhẹn Jizọsị, e yen'ẹ ẹka.

⁵⁶ Ndị hụ imẹ wẹ wụ Meri onyẹ obodo Magidala, Meri nnẹ Jemisi lẹ Josẹfụ lẹ nnẹ ụmụ Zẹbẹdi.

Olili Jizọsị

⁵⁷ O ru ogẹn ẹnyasị, ọdanfịn ohu w'a kpọ Josẹfụ hụn wụ onyẹ obodo Arịmatịa nọ bịa. Okẹnnyẹni nkẹ e sọnzikwọ Jizọsị esọn.

⁵⁸ O jẹn d'e kunrun Paịleti, sị a buye ẹ ẹhụ Jizọsị. Ya Paịleti nọ sị wẹ buye ẹ ya.

⁵⁹ Josẹfụ nọ buru ẹ; gi ẹkwa linẹ nwunni fụma a,

⁶⁰ bu ẹ che imẹ ili ọhụn ọ mẹmẹtọnị enwẹn ẹ, hụn wẹ guye imẹ ọmụma. O ligụ a, ọ nọ gi ọmụma hi-ogbe nukin ọnụ ili hụ, pụ.

⁶¹ Meri onyẹ obodo Magidala lẹ Meri hụn-ẹbọ nọdị alị, ebe wẹ nọdị bu ihun zinmẹ ili hụ.

E We Wẹ Ndị-nche D'e Chedọn Ili Hụ

⁶² O ru ẹnyasị hụ, hụn ụhụọhịn wẹ gi a kwademẹ Ezumikẹn gi gharịgụ, ndị-isi nchụn-ẹjan lẹ ndị Itu-Farisi nọ zu d'e kunrun Paịleti,

⁶³ sị a, “Diọkpa, ẹnyi a nyanhan nị kẹ onyẹ-ntụ hụ rị ndụn, ọ sị, ‘Akpọhịn ẹtọ ghafegụ, m jẹnkọ d'e lihi.’

⁶⁴ Sị wẹ nwan d'e chekin ili hụ ọhụnma-ọhụnma d'e ru akpọhịn ẹtọ hụ, amamgbe ndị nsọnmazụụn a a bịa d'e zuru ẹhụ a, gwama ịhịan ile, sị, ‘Ọ ghagụọ ọnwụn lihi’; ogẹn hụ ndufie ikpanzụụn ahụn a karị nke ibuzọ njọ.”

⁶⁵ Paịleti nọ sị wẹ, “Weri ni nwan ndị-agha; jẹn ni d'e che ẹ nche kẹ ikẹn ụnụ han.”

⁶⁶ Ya wẹ nọ jẹnmẹ d'e gbọnbepụ ili hụ ghahanị ideye ihiẹn ọmụma hụ lẹ ibutọ ndị nche.