Luku 7 - Ika

Isi Nke Ẹsa Onyẹ-agha Hụn Nwọn Okukwe

¹ Ogẹn Jesu gi gwachanrịngụ wẹ oku ndịnị, ọ nọ shi Kapanọm.

² Onyẹ Rom a kị ndị-agha ọgụn isẹn rị ebẹhụ. Onyẹni nwọn igbọn ohu rị a mkpa ọda-ọda emu rị a kụ hụn họdụ ẹkẹrẹ n'ọ nwụn.

³ Onyẹ-ndu aghanị a nụ banyeni Jesu, ọ nọ zi ụfọdụ ndị-isi ndị Ju d'a rịọ a n'ọ bịa d'a zụọ igbọn ẹ.

⁴ E kunrun wẹ Jesu, wẹ nọ rịọ a, sị, “Okẹnnyẹni furu onyẹ y'e yeni ẹka,

⁵ makẹlẹ alị ẹnyi wụ Izrẹlụ rị a ụda, ịya tụnnị ẹnyi ụlọ-ofufe ebeni!”

⁶ Jesu nọ sọnmẹ wẹ. Kanị, o rumẹ iwe onyẹ-ndu agha hụ, okẹnnyẹ hụ nọ zi ndị ọwụ a d'e kunrun ẹ, sị a, “Diọkpa, esọngbulẹ enwẹn i, makẹni eruni m onyẹ y'a banhan iwe ẹ —

⁷ ya haịndẹ m gilẹni gi ụkụ m bịa d'e kunrunn'i — ka kuhụ oku-ọnụ, igbọn m k'a dịnhịn.

⁸ “Makẹni, mmẹ nwẹn nwọn ndị m rị okpuru wẹ, nwọnzikwọ ndị-agha rị okpuru m. M sị onyẹni, ‘Jẹn!’ O jẹn, m sị hụn-ẹbọ, ‘Bịa!’ Ọ bịa. M sị igbọn m, ‘Mẹ ihiẹnni!’ O mẹ ẹ.”

⁹ Jesu a nụ ihiẹnni, ọ tụ a ẹnya; ọ nọ gbehutọ, bu ihun zimẹ igunrun hụ sọnkọn'a, sị, “M rị a gwa ụnụ ezioku, kẹ imẹ Izrẹlụ, ahụntuni m okukwe han ẹnịna!”

¹⁰ Ogẹn ndị wẹ zijẹnni Jesu gi lụa, wẹ nọ hụn a nị igbọn hụ a dịnhịngụọ.

Kẹ Jizọsị Dọn Welini Okpoho Di Ẹ Nwụn Nwa a Nwụnnị

¹¹ Ọ nọbe ẹkẹrẹ, Jesu nọ shi obodo w'a kpọ Nẹini. Ndị nsọnmazụụn a lẹ igunrun hi-ogbe sọn ẹ jẹn ebẹhụ.

¹² Ogẹn o gi rumẹ ọnụ-mgbọn obodo hụ, e lee ozun wẹ bupụkọ d'e li. Okpoho di ẹ nwụn kẹ wẹ bupụkọzị nwan akpụ okẹnnyẹ ohu ọ mụ d'e li. Igunrun ịhịan gha imẹ obodo hụ sọnkọ okpoho hụ.

¹³ Ogẹn Di-nwọnni-ẹnyi gi hụn a, omikẹn okpoho hụ nọ mẹ ẹ ọda-ọda, ọ sị a, “Akwanlẹ ẹkwan.”

¹⁴ Ọ nọ jẹnpụha d'e mẹtụ ẹkpẹti-ozun hụ ẹka; ndị bun'ẹ nọ wuzo. Ya ọ nọ sị, “Okorọbịa, m sị ị lihi ọtọ!”

¹⁵ Okẹnnyẹ hụ nwụnhụnnị nọ nọdị alị, kumẹ oku. Jizọsị nọ w'ẹ ye nnẹ ẹ.

¹⁶ Egun nọ tụ wẹ ile; wẹ nọ ja Osolobuẹ mma, sị, “Okẹn onyẹ-amụma a pụhagụọ imẹ ẹnyi! Osolobuẹ a bịagụọ d'e mẹni ndị nke ẹ ọhụnma!”

¹⁷ Ihiẹnni Jesu mẹ nọ kpọgbarị Judia ile lẹ alị ile nọkunmẹn'ẹ.

Ndị Jọnụ Hụn E Mẹ Mirin-Chuku Zi D'a Hụn Jesu

¹⁸ Ogẹn ndị nsọnmazụụn Jọnụ gi gwachanrịngụ a ihiẹn ndịnị ile Jesu rị e mẹ, ya ọ nọ kpọ mmadụ ẹbụọ imẹ wẹ,

¹⁹ zi wẹ jẹn d'e kunrun Di-nwọnni-ẹnyi d'a jụ a, sị, “Ịyụ wụ onyẹ hụ Osolobuẹ kwe nkwa n'ọ lala alala, ra nị ẹnyi lemẹ ẹnya onyẹ ọzọ?”

²⁰ Ogẹn ụmụ azụụn Jọnụ gi bịa d'e kunrun Jesu, wẹ nọ sị a, “Jọnụ hụn e mẹ mirin-Chuku zi ẹnyi d'a jụ ị, sị, ‘Ịyụ wụ onyẹ hụ Osolobuẹ kwe nkwa n'ọ lala alala, ra nị ẹnyi lemẹ ẹnya onyẹ ọzọ?’ ”

²¹ Ogẹn ohu ahụn, Jizọsị nọ zụọ ndị bu ọda emu lẹ ọrịa ichẹn-ichẹn, chụpụsọnmẹ eje-mmọn imẹ ndị bu ọda, mẹ ndị ẹnya-ishi bu ọda hụnma ụzọ.

²² Ya ọ nọ sị wẹ, “Jẹn ni d'a gwa Jọnụ ihiẹn ụnụ hụn lẹ ihiẹn ụnụ nụ: ndị ẹnya-ishi e leghama ụzọ; ndị ngụrọ e jẹnmẹ ijẹn; ndị oti a dịnhịn, wụbehi ndị rụnị; ndị odin a nụma ihiẹn; wẹ hụ a kpọtiẹn ndị nwụnnị, e zi ndị igbẹnnyẹ oziọma.

²³ Ngọzi wụ nke onyẹ hụn gilẹni ihiẹn ọ hụn m ẹhụ nwọnmẹ obi-ẹbụọ!”

²⁴ Ogẹn ndị ahụn Jọnụ zihẹ gi pụgụ, Jesu nọ gwama igunrun hụ oku Jọnụ, sị, “Kị ụnụ jẹn d'e lee imẹ atụ ogẹn ụnụ gi jẹn d'e kunrun Jọnụ? Ẹfịfịa ufere rị e buhunmẹ?

²⁵ Kị ụnụ jẹn nwan d'e lee? Onyẹ yi ezigbo ẹkwa ṅanrannị? Kaka akpohu! Imẹ obi-eze kẹ wẹ nọ a hụn ndị e kọn ẹrịra lẹ ndị ẹhụ fu.

²⁶ Kị ụnụ jẹn nwan d'e lee ebahụn? Onyẹ-amụma? Ẹghẹẹ, m rị a gwa ụnụ n'ọ karịdẹ onyẹ-amụma.

²⁷ Makẹni, Jọnụ kẹ wẹ ku oku ẹ ebahụn Ẹkụkwọ-nsọ nọ sị, ‘Lee ẹ, m zila onyẹ-ozi m n'o burun'i ụzọ; ịya k'a kwan'ị ụzọ.’

²⁸ Jesu nọzị sị: M rị a gwa ụnụ, imẹ ndị ile ikpoho mụ, onwọnni onyẹ ka Jọnụ. Kanị, onyẹ hụn kachanrịn ẹkẹrẹ imẹ Alị-eze Chuku ka Jọnụ.

²⁹ (Ndị ile nụ ihiẹn o ku kweyen'ẹ nị Osolobuẹ wụ onyẹ ezi-omumẹ, makẹni wẹ gọn Jọnụ ntịn, nị a mẹ wẹ mirin-Chuku — kẹ ndị ụgwọ-isi rị imẹ wẹ.

³⁰ Kanị, ndị Itu-Farisi lẹ ndị-nkuzi Iwu jụ ihiẹn Osolobuẹ kwademẹni wẹ — makẹni wẹ jụ nị Jọnụ emẹkọ wẹ mirin-Chuku.)

³¹ “Kị m'e gi nwan ma atụ ndị agbọnị? Nanị kẹ wẹ nọ?

³² Wẹ nọ kẹ ụmụẹka nọdị alị imẹ afịa, a hị ibe wẹ, a sị, ‘Ẹnyi e gbuni ụnụ ẹkpịrị, ụnụ etẹnni egu; ẹnyi a bụye ẹbụ wẹ gi a kwan ozun, ụnụ akwannị ẹkwan.’

³³ “Jọnụ hụn e mẹ mirin-Chuku a bịa, o rini kẹ ịhịan ile dọn e ri, ọ ranị manya, ụnụ sị, ‘Eje-mmọn rị imẹ ẹ!’

³⁴ Nwa nke ịhịan a bịa nwan, ọ hụ e ri, a ra, ụnụ a sị, ‘Lee okẹnnyẹni! Onyẹ okẹn ihiẹn-oriri, onyẹ-manya, ọwụ ndị a na ụgwọ-isi lẹ ndị ọzọ wẹ gi njọ marịn!’

³⁵ “K'osilẹrị, nwa amamihiẹn mụ kẹ wẹ gi a marịn a.”

Okpoho Wẹ Gi Eje-obibi Marịn Hụn Te Jesu Udẹn Ụkụ

³⁶ Onyẹ Itu-Farisi ohu kpọ Jesu d'e sọn ẹ ri ihiẹn-oriri iwe ẹ, Jesu nọ jẹn. Ebe ọ nọdị alị e ri ihiẹn-oriri,

³⁷ okpoho ohu wẹ gi eje-obibi ẹ marịn hụn rị imẹ obodo hụ nọ chọpụha nị Jesu rị iwe onyẹ Itu-Farisi hụ e ri ihiẹn-oriri, ya ọ nọ wẹhẹ ọgọ-alabasta udẹn e shin ọhụnma jun imẹ ẹ.

³⁸ Ọ nọ nọdị azụụn ebe ụkụ-alị Jesu rị, a kwan ẹkwan: ọ hụ a kwan ẹnya-mirin e ye Jesu ụkụ-alị ẹbụbụọ, e gi ntutu ẹ e finkọrị a; ọ hụ e susu Jesu ọnụ ụkụ-alị, e hu udẹn hụ e kpu ẹ ụkụ-alị.

³⁹ Ogẹn onyẹ Itu-Farisi hụ kpọ Jesu oriri gi hụn ihiẹnni, ọ sị enwẹn ẹ, “Omẹni okẹnnyẹni te wụ onyẹ-amụma nke-esi, nkẹ ọ marịn onyẹ okpohoni rị e mẹtụ a ẹka wụ lẹ ụdị ịhịan ọ wụ — n'ọ wụ onyẹ-njọ!”

⁴⁰ Jesu nọ sị a, “Saịmọnụ, o nwọn ihiẹn m chọ nị m gwa ị.” Ọ nọ sị a, “Onyẹ-nkuzi, kumẹ.”

⁴¹ Jesu nọ sị, “O nwọn onyẹ mmadụ ẹbụọ gi ụgwọ. Onyẹ ohu gi ẹ egho ọrụn akpọhịn iri kwasị ọgụnnaị, hụn-ẹbọ gi ẹ egho ọrụn akpọhịn ọgụn-isẹn kwasị nnụ.

⁴² Asanị wẹ ẹka kụ ụgwọ hụ, ya k'ọ nọ gharị wẹ ẹbụbụọ, sị wẹ akụzịlẹ ụgwọ hụ. Onyẹ imẹ wẹ kẹ ihiẹn okẹnnyẹ ahụn k'a ka nwan a sụọ?”

⁴³ Saịmọnụ nọ sị, “Ẹnya m, onyẹ hụn ọ gbagharị hụn kanị rọ.” Jesu nọ sị a, “Y'a zagụọ ọhụnma.”

⁴⁴ Ya Jesu nọ gbehutọ, bu ihun zinmẹ okpoho hụ, sị Saịmọnụ, “Y'a hụn okpohoni? A banhan m iwe i, y'e yeni m mirin chanchan ụkụ, kalẹ o gigụọ ẹnya-mirin ẹ chanchan m ụkụ, gi ntutu ẹ finkọrị a;

⁴⁵ kẹ m banhan, y'e susuni m ọnụ okele, kanị ya nwẹn e ke susubehikwọ m nwan ọnụ ụkụ kete m bịalẹ;

⁴⁶ y'e huyeni m udẹn isi, kanị o hugụọ udẹn e shin ọhụnma ye m ụkụ.

⁴⁷ M rị nwan a gwa ị n'a gbagharịgụọ w'a njọ bu ọda o mẹ, ya haịn o gi a ghọsị okẹn ihiẹn-ọsụsụọnị; kanị onyẹ wẹ gbagharị njọ mẹ ẹkẹrẹ a ghọsị ihiẹn-ọsụsụọ ẹkẹrẹ.”

⁴⁸ Ya Jesu nọ sị okpoho hụ, “A gbagharịgụọ wẹ i njọ ị.”

⁴⁹ Ndị hụ ya lẹ wẹ rị e ri ihiẹn-oriri nọ jụma ibe wẹ, “Onyẹ kẹ onyẹni wụdẹ o gi a gbagharị njọ?”

⁵⁰ Jesu nọzị sị okpoho hụ, “Okukwe i a zụọgụọ ị. Lama, ihiẹn emẹ i.”