Lẹvitikọsụ 2 - Ika

Isi Nke Ẹbụọ Oyiye-ọka Oyiye Ọka-oyiyi

¹ “Onyẹ welanị Osolobuẹ oyiye ọka, ya wẹhẹ ọka-witi wẹ gweriẹn. O k'e hu ofigbọn-olivu ye ẹ, we nsẹnsi che elu ẹ,

² bu ẹ jẹnni ụmụ Ẹrọnụ ikẹnnyẹ, ndị nchụn-ẹjan. Onyẹ nchụn-ẹjan k'a nọ ọka ahụn wẹ gwe lẹ ofugbọn-olivu rịn'a bụọrị ọb'ẹka ohu, o werizi nsẹnsi hụ ile, o gi hụn ọ bụọrị lẹ nsẹnsi nọkin ẹnya ẹjan hụ ile, nọ elu ukpo nchụn-ẹjan dụn wẹ ọkụn — oyiye wẹ gi ọkụn ye rọ, hụn ishin ẹ a sụọ Osolobuẹ.

³ Oyiye-ọka ahụn họdụnị wụ nke Ẹrọnụ lẹ ụmụ a ikẹnnyẹ. Ẹjan rịkẹnmẹkẹ nsọ k'ọ wụ imẹ ẹjan ndị hụ w'e gi ọkụn a chụnyeni Osolobuẹ.

Oyiye Donọtụ Wẹ Gi Ofigbọn-olivu Gwọ

⁴ “Omẹni oyiye i wụ ihiẹn wẹ gi ọka mẹmẹ kẹ w'e mẹmẹ brẹdi, o k'a wụ donọtụ wẹ gi ọka wẹ gweriẹn mẹmẹ — hụn yisti rịlẹni, wẹ gi ofigbọn-olivu gwọ; mọbụ biskiti yisti rịlẹni, wẹ te ofigbọn.

Oyiye Ọka Wẹ Ghe

⁵ “Omẹni oyiye-ọka wẹ gi ihiẹn mẹ pata ghe rọ, o sikọ d'a wụrịrị ọka wẹ gweriẹn wẹ gi ofigbọn gwọ hụn wẹ buchelẹni yisti.

⁶ Tikpụkpọ a, y'e hu ofigbọn ye ẹ; oyiye-ọka rọ.

⁷ Omẹni oyiye-ọka wẹ gi ugbẹgbẹ ghe k'i wela, o sikọ d'a wụrịrị ọka wẹ gweriẹn wẹ gi ofigbọn-olivu gwọ.

⁸ “Oyiye-ọka wẹ gi ihiẹn ndịnị mẹmẹ k'i jẹnkọ d'e wẹhẹni Osolobuẹ; y'e w'ẹ ye onyẹ nchụn-ẹjan, o we ẹ jẹn ukpo nchụn-ẹjan.

⁹ Onyẹ nchụn-ẹjan hụ k'a gha imẹ oyiye ahụn weri hụn o gi nọkin ẹnya wẹ ile d'a dụn ọkụn elu ukpo nchụn-ẹjan ahụn n'o họnrin ẹnwụnrụn, n'ọ wụrụ oyiye we gi ọkụn ye, hụn ishin ẹ a sụọ Osolobuẹ.

¹⁰ Oyiye-ọka ahụn họdụnị wụ nke Ẹrọnụ lẹ ụmụ a ikẹnnyẹ. Ẹjan rị okẹn nsọ k'ọ wụ imẹ ẹjan ndị hụ w'e gi ọkụn a chụnyeni Osolobuẹ.

¹¹ “Yisti arịkọ oyiye-ọka ọwụlẹ wẹ k'e ye Osolobuẹ, makẹni ụnụ egikọ yisti mọbụ mirin-ẹnwụn ọwụlẹ chụnyeni Osolobuẹ ẹjan wẹ gi ọkụn chụn.

¹² Omẹni oyiye ihiẹn-ugbo rọ, ụnụ nwọn ikẹn wẹhẹni Osolobuẹ yisti mọbụ mirin-ẹnwụn, kanị egikọ wẹ yisti mọbụ mirin-ẹnwụn chụn ẹjan elu ukpo nchụn-ẹjan n'ọ wụrụ ẹjan wẹ gi ọkụn chụnyeni Osolobuẹ hụn ishin ẹ a sụọ a.

Nnu Jẹnkọ D'e Sọnrịrị A

¹³ “E ye ni oyiye-ọka ụnụ ile nnu. Yesọnmẹ ni oyiye-ọka ụnụ nnu — nnu hụn ghọsị nkwerigbama ụnụ lẹ Chuku ụnụ; ye ni oyiye ụnụ ile nnu.

Oyiye Ọka-Ibuzọ

¹⁴ “I welanị oyiye-ọka d'e gi ye Osolobuẹ oyiye ihiẹn-ugbo ibuzọ, o sikọ d'a wụrịrị mban ọka-mirin wẹ hụnma ọkụn, a sụkpọ w'a.

¹⁵ Bu ofigbọn che ẹ, y'e bu nsẹnsi kwasị a; oyiye-ọka rọ.

¹⁶ Onyẹ nchụn-ẹjan k'e weri hụn o k'e gi nọkin ẹnya oyiye ọka-mirin ahụn wẹ sụkpọ lẹ ofigbọn-olivu, o werizi nsẹnsi ahụn ile, ọ mụ wẹ ile ọkụn nị wẹ họnrin ẹnwụnrụn, wụrụ oyiye wẹ gi ọkụn ye Osolobuẹ.