Lẹvitikọsụ 15 - Ika

Isi Nke Mmisẹn Ihiẹn Gha Okẹnnyẹ Ẹhụ A Pụha Hụn E Mẹrụn'a

¹ Osolobuẹ sị Mozizi lẹ Ẹrọnụ,

² “Gwa nị ndị Izrẹlụ okuni; sị nị wẹ: Ihiẹn gha okẹnnyẹ ẹhụ hupụha, ihiẹn hupụhanị rụ arụ.

³ Kẹ hụn rị e huni kẹ hụn kụrụnị rọ, onyẹ hụ a rụgụọ. Lee ni kẹ ihiẹn hụ rị e hupụhanị k'a dọn mẹrụ a:

⁴ “Bẹdi ọwụlẹ okẹnnyẹ hụ ihiẹn rị e hupụha ẹhụ dinẹ a rụgụọ; ihiẹn ọwụlẹ ọ nọkwasị a rụgụọ.

⁵ Onyẹ ọwụlẹ ẹhụ a mẹtụ bẹdi ẹ k'a sụrịrị ẹkwa a, gi mirin wụ ẹhụ; o k'a rụ d'e ru ogẹn ẹnyasị.

⁶ Onyẹ ọwụlẹ hụn nọdị alị elu ihiẹn ọwụlẹ okẹnnyẹ hụ ihiẹn rị e hupụha ẹhụ gi nọdị alị k'a sụrịrị ẹkwa a, gi mirin wụ ẹhụ; o k'a rụ d'e ru ogẹn ẹnyasị.

⁷ “Onyẹ ọwụlẹ ẹhụ a mẹtụ okẹnnyẹ hụ ihiẹn rị e hupụha ẹhụ, k'a sụrịrị ẹkwa a, gi mirin wụ ẹhụ; o k'a rụ d'e ru ogẹn ẹnyasị.

⁸ Omẹni onyẹ ihiẹn rị e hupụha ẹhụ jụkpu ịhịan ẹsọn, hụn ọ jụkpu ẹsọn k'a sụrịrị ẹkwa a, gi mirin wụ ẹhụ; o k'a rụ d'e ru ogẹn ẹnyasị.

⁹ Ihiẹn ile onyẹ hụ gi nọdị alị elu anyịnyan a rụgụọ.

¹⁰ Onyẹ ọwụlẹ ẹhụ a mẹtụ ihiẹn ọwụlẹ o gi nọdị a rụgụọ d'e ru ogẹn ẹnyasị; onyẹ bushi ihiẹn ndị hụ o gi nọdị alị elu, onyẹ ahụn k'a sụrịrị ẹkwa a, gi mirin wụ ẹhụ; o k'a rụ d'e ru ogẹn ẹnyasị.

¹¹ Omẹni okẹnnyẹ ihiẹn rị e hupụha ẹhụ e gini mirin kwọpụ ẹka, o mẹtụ ịhịan ẹka, hụn o mẹtụ ẹka k'a sụrịrị ẹkwa a, gi mirin wụ ẹhụ; o k'a rụ d'e ru ogẹn ẹnyasị.

¹² “Okẹnnyẹ ihiẹn rị e hupụha ẹhụ mẹtụ ite-ụrụa ọwụlẹ ẹka, wẹ k'e tikpọrịrị a; omẹni ihiẹn wẹ gi osisi mẹmẹ rọ, wẹ k'e gi mirin ṅanchanpụ a.

¹³ Onyẹ hụ ihiẹn rị e hupụha ẹhụ dịnhịngụ, o k'a gụn akp'ọhịn ẹsa wẹ kebe mẹ ihiẹn w'e gi ku ẹ n'ọ rịgụọ ọchan, ọ sụ ẹkwa a, o gi mirin rị mma wụ ẹhụ, ọ wụrụzị onyẹ rị ụchan.

¹⁴ Nke akp'ọhịn ẹsatọ rịn'a, o weri nduri ẹbụọ mọbụ ụmụ oluikuku ẹbụọ, ọ bịa d'e kunrun Osolobuẹ ọnụ-mgbọn Ọdụ-ozuzu, we wẹ ye onyẹ nchụn-ẹjan,

¹⁵ Onyẹ nchụn-ẹjan k'e gi wẹ chụn ẹjan: o gi ohu chụn ẹjan-njọ, o gi ohu chụn ẹjan w'a dụn ọkụn. Ẹrịra kẹ onyẹ nchụn-ẹjan hụ k'a dọn nọ ihun Osolobuẹ gbarị isi onyẹ hụ yeni ihiẹn hụ hupụha a ẹhụ.

¹⁶ “Okẹnnyẹ nyụn ohe, o k'e girịrị mirin wụ ẹhụ a ile; o k'a rụ d'e ru ogẹn ẹnyasị.

¹⁷ Wẹ k'a sụrịrị ẹkwa mọbụ akpụkpọ ọwụlẹ ohe mẹtụ; ihiẹn hụ k'a rụ d'e ru ogẹn ẹnyasị.

¹⁸ Okẹnnyẹ sọn okpoho ranhịn, nyụn ohe, wẹ ẹbụọ k'e girịrị mirin wụ ẹhụ; wẹ ẹbụọ k'a rụ d'e ru ogẹn ẹnyasị.

Okpoho Rị A Sọ Ezi

¹⁹ “Omẹni okpoho rị a sọ ezi, akp'ọhịn ẹsa kẹ o k'a rụ, onyẹ ọwụlẹ ẹhụ a mẹtụ ogẹn hụ k'a rụ d'e ru ogẹn ẹnyasị. Ihiẹn ọwụlẹ o gi dinẹ a rụgụọ; ihiẹn ọwụlẹ o gi nọdị alị a rụgụọ d'e ru ẹnyasị.

²⁰ Ihiẹn ọwụlẹ o gi dinẹ k'a rụ, ihiẹn ọwụlẹ o gi nọdị alị k'a rụ.

²¹ Onyẹ ọwụlẹ mẹtụ bẹdi ẹ ẹka k'a sụrịrị ẹkwa a, gi mirin wụ ẹhụ; o k'a rụ d'e ru ogẹn ẹnyasị.

²² Onyẹ ọwụlẹ mẹtụ ihiẹn o gi nọdị alị ẹka k'a sụrịrị ẹkwa a, gi mirin wụ ẹhụ; o k'a rụ d'e ru ogẹn ẹnyasị.

²³ Onyẹ gi ẹhụ hụarị ihiẹn ọwụlẹ rị bẹdi mọbụ ihiẹn ọzọ ọwụlẹ o gi nọdị alị, onyẹ ahụn a rụ d'e ru ogẹn ẹnyasị.

²⁴ “Okẹnnyẹ sọn ẹ ranhịn, nị ihiẹn hụ rị a gban'a a hụatụ okẹnnyẹ hụ, okẹnnyẹ hụ a rụ ọrọgbọ akp'ọhịn ẹsa; okẹnnyẹ hụ dinẹ bẹdi ọwụlẹ, bẹdi hụ a rụ.

²⁵ “Omẹni ihiẹn rị a gba okpoho bụ ẹlẹ ọ rị ezi, mọbụ ezi a gbabiekarị a k'ọ gba a, o k'a rụsọnmẹ d'e ru n'ọ gbabehi ẹ, kẹ o dọn a rụ ebe ọ rị a sọ ezi.

²⁶ Bẹdi ọwụlẹ o dinẹ ebe ihiẹn hụ rị a gba a a rụgụọ, kẹ bẹdi ẹ dọn a rụ ebe ọ rị a sọ ezi; ihiẹn ọwụlẹ o gi nọdị alị a rụgụọ, kẹ ihiẹn o gi nọdị ebe ọ rị a sọ ezi dọn a rụ.

²⁷ Onyẹ ọwụlẹ mẹtụ wẹ ẹka a rụgụọ; onyẹ hụ k'a sụrịrị ẹkwa a, gi mirin wụ ẹhụ; o k'a rụ d'e ru ogẹn ẹnyasị.

²⁸ Ihiẹn hụ rị a gban'a kụsị, ọ nọzị akp'ọhịn ẹsa; akp'ọhịn ẹsa hụ ghagụ, ọ rịzị ọchan.

²⁹ Nke akp'ọhịn ẹsatọ, o weri nduri ẹbụọ mọbụ ụmụ oluikuku ẹbụọ d'e kunrun onyẹ nchụn-ẹjan ọnụ-mgbọn Ọdụ-ozuzu.

³⁰ Onyẹ nchụn-ẹjan k'e gi ohu chụn ẹjan-njọ, gi ohu chụn ẹjan w'a dụn ọkụn. Ẹrịra kẹ onyẹ nchụn-ẹjan hụ k'a dọn nọ ihun Osolobuẹ gbarị isi okpoho hụ yeni ihiẹn hụ gban'a.

³¹ “Ẹrịra kẹ ụnụ e gi wepụha ndị Izrẹlụ ebe wẹ nọ rụ, amamgbe w'a nwụntọ imẹ ẹ, yeni e gigụọ w'a mẹrụ Ọdụ-nsọ m rị imẹ igunrun wẹ.”

³² Uwẹ wụ iwu w'e gi e sọn onyẹ ihiẹn rị e hupụha ẹhụ: kẹ onyẹ rụnị makẹni ọ nyụn ohe kẹ

³³ okpoho rị a sọ ezi kẹ okẹnnyẹ ihiẹn rị e hupụha ẹhụ kẹ okpoho ihiẹn rị a gba kẹ okẹnnyẹ hụn sọn okpoho rụnị ranhịn.