Joshụa 5 - Ika

Isi Nke Isẹn

¹ Ogẹn ndị-nze ndị Amọ ile rị nfetu Iyi-Jọdanị ẹbamịn ọdịdan-ẹnyanwụn lẹ ndị-nze Kenaanị ile rị mkpẹnrẹn Ohimin Mẹditerenia gi nụ nị Osolobuẹ mẹ mirin Iyi-Jọdanị kọrọhịnị ndị Izrẹlụ, e we wẹ fetuchanrịn, obi nọ dẹnhin wẹ, ndụn ehulehu arịzị wẹ yeni egun ndị Izrẹlụ.

Agbọ Ọhụn

² Ogẹn ahụn, Osolobuẹ nọ sị Joshụa, “Weri ọmụma sụọnpụ, n'ị gi wẹ kwazị ndị Izrẹlụ ugun.”

³ Ya Joshụa nọ werisọnmẹ ọmụma, sụọnpụ wẹ, gi wẹ kwa ndị Izrẹlụ ugun, ebẹhụ ọ nọ mẹ kẹ wẹ a kpọ Ugu Ịkwa-ugun.

⁴ Ihiẹn haịn Joshụa gi kwa wẹ ugun wụ nị ndị ile gha alị Ijiptu pụha, ikẹnnyẹ ile ru ogo agha, nwụntọ imẹ atụ kẹ wẹ rị ụzọ, kẹ wẹ ghagụ alị Ijiptu pụha.

⁵ Ndị ile gha alị Ijiptu pụha kwachanrịn ugun, kanị ndị ile wẹ mụ imẹ atụ ogẹn wẹ gi ghagụ Ijiptu pụha eke kwa.

⁶ Ndị Izrẹlụ wàhunmẹ imẹ atụ ọrọgbọ ahụa ọgụnnaị; wẹ wahunmẹ ọwahunmẹ hụ d'e ru ni ndị ahụn ile rugụ ogo agha ogẹn hụ wẹ gi gha alị Ijiptu pụha a nwụnhụnchanrịn, ndị ahụn ile nupụnị Osolobuẹ isi. Makẹni Osolobuẹ kun enwẹn ẹ sị nị ahụnkọ wẹ alị hụ o kun enwẹn ẹ kwe ndị nẹdi wẹ kanị nkwa n'o k'e ye ẹnyi ya, alị mirin-ẹran lẹ mirin-ẹnwụn jun, e hu.

⁷ Ya ọ nọ zụnpụha ụmụ wẹ, gi ụmụ wẹ nọkin ẹnya wẹ; ụmụ wẹ hụ kẹ Joshụa kwa nwan ugun, ebe o mẹni wẹ eke kwa, makẹni akwanị wẹ wẹ ugun ụzọ.

⁸ A kwagụ wẹ Izrẹlụ ahụn ile ugun, wẹ nọ nọdị ebẹhụ wẹ ziẹntọ d'e ru ni ugun wẹ a lagụ.

⁹ Osolobuẹ nọ sị Joshụa, “E nupụgụọ m ihiẹn-ifẹnrẹn alị Ijiptu imẹ igunrun ụnụ tannị.” Ya wẹ nọ nwan kpọma ebẹhụ Gil'galụ hụn wụ “Nnupụ” d'e ru tannị.

A Nọ Wẹ Gil'galụ Mẹ Mmẹmmẹ-Nghafe

¹⁰ Ẹnyasị nke akp'ọhịn mmẹnọ imẹ ifọn hụ, ebẹhụ wẹ rị Gil'galụ rị alị-aradan Jẹriko, ndị Izrẹlụ nọ mẹ Mmẹmmẹ-Nghafe.

¹¹ W'a kpọ a ụnyanhụn wẹ mẹ Mmẹmmẹ-Nghafe hụ, ụhụọhịn hụ daị, wẹ nọ ri ihiẹn-oriri alị hụ mịpụha: brẹdi yisti rịlẹni lẹ ọka wẹ hụnma kẹ wẹ ri.

Mana A Danbehi

¹² Ọ rịhụ hụn wẹ ri ihiẹn-oriri rị alị ahụn, eki e fọn, mana adanzịnị; ihiẹn rị alị Kenaanị kẹ wẹ richanrịn ahụa hụ.

Joshụa A Hụn Ọkị-Agha Osolobuẹ

¹³ Ogẹn Joshụa gi rị ẹhụ Jẹriko, o lee ẹnya, e lee okẹnnyẹ ohu turu ẹ ihun! Okẹnnyẹ hụ e sepụhagụọ ọpịa-agha kwọndọn. Joshụa nọ jẹnburu ẹ, sị a, “Ẹnyi k'i bịa d'e yeni ẹka ra ndị-iṅẹnrẹn ẹnyi?”

¹⁴ Ọ nọ sị, “Onwọnni azụụn m rị. Mmẹ wụ ọkị-agha ndị-agha Osolobuẹ; a bịagụọ m nwan!” Joshụa nọ gbu osekpu, bu ihun kpumẹ alị, ye ẹ ọghọ, sị a, “Diọkpa, k'ị sị odibo i mẹ?”

¹⁵ Ọkị-agha ndị-agha Osolobuẹ nọ sị Joshụa, “Gbụpụ akpụkụ ị, nị ebe i turu nwan rị nsọ.” Ya Joshụa nọ gbụpụ akpụkụ a.