Jobu 12 - Ika

Isi Nke Mmẹbụọ Ihiẹn Jobu Shịarị Zofa Ụnụ Ro Nị Ụnụ A Marịnka

¹ Jobu nọ shịarị a,

² “Ẹghẹẹ, ụnụ sụọ marịn ihiẹn, ụnụ nwụnhụn, amamihiẹn a nwụnhụn!

³ Kanị a marịnzịghọ m ihiẹn ụnụ marịn — onwọnni ihiẹn ụnụ gi ka m. Gwalele ni m onyẹ marịnlẹni ihiẹn ndịnị ile?

⁴ A wụrụgụọ m ihiẹn ndị ọwụ m gi a mụ ẹmụ, mmẹ hụn e te kpọku Chuku ọ za m — e họnringụọ m nwan ihiẹn ẹmụ mmakalaka, ọsụọn'a nị m rị ọchan, nị enwọn m ihiẹn wẹ e gi kọrịanị m!

⁵ Ndị ẹhụ fu hụ a mụ ndị eje-ihiẹn mẹ ẹmụ — a sị nị ndị danpụ imẹ okukwe kẹ eje-ihiẹn e kunrun.

⁶ Bụ ihiẹn ara mẹ ndị ohin lẹ ụlọ wẹ, onwọnzikwọnị ihiẹn e mẹ ndị a kpasu Osolobuẹ iwe — ndị hụn sị nị ẹka wẹ mẹni wẹ, nị ẹlẹ Chuku.

⁷ Ka jụlele nwan anụmanụ — wẹ k'a kuzi i; mọbụ y'a jụlele nnụnụ hụn e fe imẹ-elu, wẹ k'a gwa ị,

⁸ mọbụ y'e kinghọsị akpak'alị, o k'a kuzi i, mọbụ y'a jụ azụn rị imẹ ohimin nị wẹ gwa ị.

⁹ Elee hụn imẹ ndịnị ile marịnlẹni nị ẹka Osolobuẹ mẹ m ihiẹnni?

¹⁰ Ẹka a kẹ ndụn ihiẹn ile wẹ ke lẹ uzun ịhịan ile rị.

¹¹ “Ntịn e lele oku ọ rị a nụ nọkẹ kẹ ire dọn a danmịn ihiẹn-oriri.

¹² Ẹlẹ imẹ ndị ẹgẹdi kẹ wẹ nọ a hụn amamihiẹn? Ẹlẹ onyẹ gha a tọcheni ọ hụ e nwọnwaye nghọta?

¹³ Osolobuẹ nwọn amamihiẹn lẹ ikẹn; ezigbo ndụnmọdụn lẹ nghọta wụ nke ẹ.

¹⁴ O tikpọ ihiẹn, w'a ra sa ẹka tụndọnzi ẹ; ọ tụ ịhịan ngan, w'a ra s'ẹka wepụha a.

¹⁵ O kwọndọn mirin, o zuekọ. Ọ hatu mirin, mirin e huru alị.

¹⁶ Akwanran lẹ amamihiẹn wụ nke ẹ; kẹ onyẹ wẹ dufie kẹ onyẹ rị e dufieni wụ nke ẹ.

¹⁷ Ọ gba ndị ọka-iroro ẹka, kpụnpụ wẹ, e gi ndị a han eṅẹn e gu egu.

¹⁸ Ọ gbụpụ ndị nze ẹwuru-nze, jemẹ wẹ nwa-mpe ukun kẹ igbọn.

¹⁹ Ọ gba ndị nchụn-ẹjan wẹ te gi dọn ẹnya ẹka, e dupụ, a napụ ndị turuchanrịngụ kete-kete ọnọdị wẹ.

²⁰ O kpumẹ ndị ndụnmọdụn wẹ gi e dọn ẹnya ọnụ, a napụ ndị-ichẹn nghọta.

²¹ O gbe ifẹnrẹn e kpu ndị isi, a napụ ndị dikẹn ikẹn wẹ.

²² O mẹ ihiẹn zueri imẹ ishi a pụha ifọn, e mẹ ukpẹ a rị ebe kachanrịn ishi a gba.

²³ O mẹ alị a wụrụ okẹn alị, e tikpọzịkwọ alị; o mẹ alị a ba ụba, a kpayịyazịkwọ wẹ.

²⁴ Ọ napụ ndị-ndu ụwa uche wẹ, e mẹ wẹ a wahunmẹ ebe ụzọ rịlẹni.

²⁵ Wẹ hụ a sụọ ishi; o mẹ wẹ a danhunmẹ kẹ ndị manya rị a tụ.