Jerimaya 36 - Ika

Isi Nke Mmisin Kwasị Ọgụn Jehoyakim A Dụn Ẹkụkwọ Oku-Chuku Ọkụn

¹ Hụn mẹ ahụa ẹnọ eze Juda wụ Jehoyakim nwa Josaya kịma, Osolobuẹ nọ sị Jerimaya,

² “Weri ẹkụkwọ detu ihiẹn ile m gwa ị banyeni alị Izrẹlụ, alị Juda lẹ alị ndị ọzọ ile — gha ogẹn m gi gwama ị oku, ogẹn Josaya gi wụ eze, d'e ru ogẹnni.

³ Ikẹnkwọ ndị Juda a nụ ihiẹn ile m chọ nị m mẹ wẹ, onyẹ-onyẹ e bihutọ ẹka, mẹbehi eje-ihiẹn ọ rị e mẹ, a gbagharị m wẹ eje-omumẹ wẹ lẹ njọ wẹ.”

⁴ Ya kẹ Jerimaya nọ kpọ Baruku nwa Nẹria. Jerimaya nọ gwama Baruku ihiẹn ile Osolobuẹ gwa a gha ogẹn ahụn Osolobuẹ gwama a oku lala. Baruku nọ detuchanrịn wẹ ile imẹ ẹkụkwọ.

⁵ O mẹgụ, Jerimaya nọ sị Baruku, “W'a ra nịzị m pụ. Asa m ẹka jẹn Ụlọ-nsọ Osolobuẹ.

⁶ Ụhụọhịn wẹ sikọ d'e zu imẹ Ụlọ-nsọ d'e bu ọnụ, y'e jẹn ebẹhụ d'a gụnnị wẹ ihiẹn Osolobuẹ ku, hụn m gwa ị, hụn i de ye imẹ ẹkụkwọnị. Gụn a kẹni ndị Juda ile ghasọnmẹ obodo wẹ rị ichẹn-ichẹn bịa nụ a.

⁷ Ikẹnkwọ nị wẹ rịọghọ Osolobuẹ n'ọ gbagharị wẹ, onyẹ-onyẹ a latọ eje-obibi ẹ, makẹni Osolobuẹ e kugụọkwọ a n'o k'e gi okẹn iwe lẹ okẹn-ọnụma mẹshi ndịnị ikẹn.”

⁸ Baruku nwa Nẹria mẹ ihiẹn hụ ile onyẹ amụma wụ Jerimaya sị a mẹ, hụn ọ sị a gụnnị wẹ ihiẹn ile Osolobuẹ ku hụn rị imẹ ẹkụkwọ hụ imẹ ụlọ-nsọ Osolobuẹ.

⁹ Hụn mẹ ahụa isẹn Jehoyakim nwa Josaya kịma alị Juda, imẹ ifọn nke itenẹi, ndị ile bi Jerusalẹm lẹ ndị ile ghasọnmẹ obodo ichẹn-ichẹn rị alị Juda bịa nọ zu imẹ Jerusalẹm ihun Osolobuẹ d'e bu ọnụ wẹ kayeni wẹ.

¹⁰ Ya Baruku nọ shi Ụlọ-nsọ Osolobuẹ, nọ ihun mmughẹ hụn Gẹmarịa nwa Shafanị a nọdị gụnnị wẹ ile ihiẹn Jerimaya ku, hụn rị imẹ ẹkụkwọ hụ. Shafanị wụ akanwe eze ogẹn Josaya gi wụ eze. Mmughẹni rị ezi-ọgwa rị mkpọnyin, ẹhụ Ọnụ-mgbọn Ọhụn Ụnọ-nsọ.

¹¹ Ogẹn Maịkaya nwa Gẹmarịa nwa Shafanị gi nụ ihiẹn ile Osolobuẹ ku hụn wẹ deye imẹ ẹkụkwọ hụ,

¹² ọ nọ shi obi-eze, banye mmughẹ akanwe eze nọ a rụn ọrụn, ebe ndị-isi rị e zu: kẹ Ẹlishama wụ akanwe kẹ Dẹlaya nwa Shẹmaya kẹ Ẹl'natanị nwa Akịbọ kẹ Gẹmarịa nwa Shafanị kẹ Zẹdikaya nwa Hanania kẹ ndị-isi ile.

¹³ Maịkaya nọ gwachanrịn wẹ ihiẹn ile ọ nụ Baruku gụn, ihiẹn ile Baruku gụnnị ndị alị.

¹⁴ Ya ndị-isi hụ ile nọ zi Jehudi nwa Nẹtanịa nwa Shẹlẹmia nwa Kushi d'a sị Baruku, “Wẹhẹ ẹkụkwọ hụ ị gụnnị ndị alị imẹ Ụlọ-nsọ.” Ya Baruku nwa Nẹria nọ weri ẹkụkwọ hụ ẹka jẹn d'e kunrun wẹ.

¹⁵ Wẹ nọ sị a, “Dodo, nọdị alị, n'ị gụnnị ẹnyi ya.” Ya Baruku nọ gụnnị wẹ ya.

¹⁶ A nụgụ wẹ ihiẹn ile ọ gụn, egun nọ tụma wẹ — onyẹ-onyẹ e bu ẹnya tụma ibe ẹ, ya wẹ nọ sị Baruku, “Ẹnyi jẹnkọ d'a gwakwọ eze ihiẹnni ile.”

¹⁷ Ya wẹ nọ sị Baruku, “Gwa ẹnyi, nanị i dọn s'ẹka de ihiẹn ndịnị ile? Ị sị nị Jerimaya kpọnị ị ya?”

¹⁸ Baruku nọ sị, “Ẹghẹẹ, ịya gi ọnụ a kpọnị m ihiẹn ndịnị ile, mmẹ nwẹn hụ e detu wẹ.”

¹⁹ Ndị-isi hụ nọ sị Baruku, “D'a warị, ịyụ lẹ Jerimaya. Anịkwọlẹ ni onyẹ ọwụlẹ marịn ebe ụnụ rị.”

²⁰ Ndị-isi hụ e bugụ ẹkụkwọ hụ dọnmẹ ebẹhụ imẹ mmughẹ Ẹlishama wụ akanwe eze, ya wẹ nọ shi ebe eze a nọdị d'e kunrun eze, gwachanrịn a ihiẹn ile mẹni.

²¹ Eze nọ zi Jehudi d'e wẹhẹ ẹkụkwọ hụ. Jehudi nọ shi mmughẹ akanwe wụ Ẹlishama d'e wẹhẹ ẹ. Ọ nọ gụnmanị eze lẹ ndị-isi hụ ile nọdịyenin'ẹ ya.

²² Ifọn nke itenẹi rọ — ogẹn oyi. Eze rị ebe ọ nọdị ogẹn oyi; ọkụn ọ rị a nyan hụ e nwun ẹnya-ọkụn rị ihun ẹ ebẹhụ.

²³ Jehudi gụnpụ nkegi ẹtọ mọbụ ẹnọ, eze e gi ẹbeke-nta ndị akanwe bepụ hụn ọ gụn, tụ a ye ọkụn hụ d'e ru n'ọ dụnchanrịn ẹkụkwọ hụ ile ọkụn.

²⁴ Kẹ wẹ nụ ihiẹnni ile Jehudi gụn, onwọnni onyẹ mẹhunmẹni, onwọnni onyẹ dọwa ẹkwa ye enwẹn ẹ olu, kẹ eze kẹ idibo ẹ.

²⁵ Ẹl'natanị lẹ Dẹlaya lẹ Gẹmarịa e te rịọghọ eze ya adụnlẹ ẹkụkwọ hụ ọkụn, kanị o gọnni wẹ ntịn.

²⁶ Eze nọzịdẹ zi Jẹramiẹlụ hụn wụzị onyẹ ebọn eze lẹ Sẹraya nwa Az'riẹlụ lẹ Shẹlẹmia nwa Ab'dẹlụ d'a nwụnhan Baruku hụn wụ akanwe Jerimaya lẹ Jerimaya lẹ enwẹn ẹ. Kanị Osolobuẹ nọ zuemẹ wẹ.

Jerimaya Lẹ Baruku E Detuzi Oku-Osolobuẹ

²⁷ Mgbe eze wụ Jehoyakim gi dụngụ ẹkụkwọ hụ Baruku deye ihiẹn ndị ahụn Jerimaya gwa a de ọkụn, Osolobuẹ nọ sị Jerimaya,

²⁸ “Weri ẹkụkwọ ọzọ, n'i dezi ihiẹn ile rị imẹ ẹkụkwọ ibuzọ ahụn Jehoyakim wụ eze Juda dụnpụ ọkụn.

²⁹ Sị Jehoyakim wụ eze Juda, nị Osolobuẹ sị, ‘Y'a dụngụọ ẹkụkwọ hụ ọkụn, sị Jerimaya, “Kị haịn i gi de nị eze ndị Babilọnụ k'a bịarịrị d'e tikpọ alịnị, gbuchanrịn kẹ ịhịan kẹ anụmanụ rịn'a?”

³⁰ “ ‘Lee nwan ihiẹn Osolobuẹ sị o k'e mẹ Jehoyakim eze Juda: Osolobuẹ sị: Onwọnni nwa Jehoyakim jẹnkọ d'a nọdị ukpo Defidi; wẹ k'a mahu ozun Jehoyakim, anwụn hụ a ma a efinaị, igirigi hụ e ziẹn ẹ uhinhin.

³¹ M k'e ye ya lẹ ụmụ a lẹ idibo ẹ afụnfụn eje-omumẹ wẹ. M k'e wẹhẹni wẹ lẹ ndị bi imẹ Jerusalẹm lẹ ndị Juda ile nsọngbu ile m gwatọ wẹ nị m k'e wẹhẹni wẹ bụ egọnni wẹ ntịn.’ ”

³² Ya kẹ Jerimaya nọ weri ẹkụkwọ ọzọ, we ẹ yezi akanwe, Baruku nwa Nẹria. Jerimaya nọ kpọmazịnị Baruku oku Osolobuẹ hụ, Baruku hụ e de ẹ. Baruku nọ dechanrịnzị ihiẹn ndị ahụn ile te rị ẹkụkwọ hụ eze wụ Jehoyakim kpọ ọkụn. Wẹ nọ dezikwọ ihiẹn ndị ọzọ nọzị kẹ wẹ cheni wẹ.