Jẹnẹsisi 45 - Ika

Isi Nke Isẹn Kwasị Ọgụnnaị Josẹfụ E Mẹ Mmunẹ Ẹ Marịn Nị Ịya Rọ

¹ Josẹfụ asazịnị ẹka kwọndọn enwẹn ẹ, ọ sụọn'a nị ndị idibo ẹ ile rị ebẹhụ. Ọ nọ yi, “Sị nị onyẹ ọwụlẹ pụnị m!!” Onwọnni onyẹ ọzọ ya lẹ Josẹfụ rị ebẹhụ ogẹn o gi mẹ umunẹ marịn onyẹ ọ wụ.

² Ọ kwan ẹkwan hụn wụnị ndị Ijiptu ahụn a nụ k'ọ rị a kwan; kẹ ndị rị iwe Fẹro a nụghọdẹ oku ẹkwannị.

³ Josẹfụ nọ sị mmunẹ ẹ, “Mmẹ wụ Josẹfụ! Nẹdi m hụkwọ ndụn?” Kanị, mmunẹ ẹ asanị ẹka shịarị a oku, makẹni ezigbo egun rị a tụ wẹ nị ihun Josẹfụ nwẹn kẹ wẹ rị.

⁴ Josẹfụ nọ nwan sị mmunẹ ẹ, “Nọzụnhan nị.” A nọkunmẹgụ w'a, ọ nọ sị wẹ, “Mmẹ wụ Josẹfụ nwẹnẹ ụnụ, hụn ụnụ reye wẹ weshi alị Ijiptu.

⁵ Ka anịlẹ ni obi nahịn ụnụ mọbụ kọrịamanị enwẹn ụnụ nị ụnụ re m ere, makẹni, Osolobuẹ zi m buruni ụnụ ụzọ, n'o gi dọnmẹ ịhịan ndụn.

⁶ Makẹni hụnnị mẹ nwan ahụa ẹbụọ ụnwụn mụpụ alịnị; ahụa isẹn họdụzị o k'a mụ: a kụnkọ wẹ ihiẹn-ugbo, a ghọkọ wẹ.

⁷ Osolobuẹ zi m buruni ụnụ ụzọ, n'ọ hụn ụzọ gi ẹ dọnmẹ ụnụ ndụn amamgbe ụnụ a gụchanrịn elu-ụwa, lẹzi n'o gi okẹn nzụọpụhanị dọnmẹni ụnụ ndị bu ọda ndụn.

⁸ Ya wụ nị ẹlẹ ụnụ zihẹ m ebeni, kanị Osolobuẹ; o mẹgụọ m wụrụ onyẹ Fẹro gi oku ẹ e dọn rịkẹ nẹdi; mmẹ wụ okushiọgụ imẹ ụlọ-iwe Fẹro, mmẹ rị a kị alị Ijiptu ile.

⁹ “Jẹn ni nwan d'a gwa nẹdi m ozigbo, sị n'a, ‘Josẹfụ nwa ị sị: Osolobuẹ e mẹgụọ m wụrụ onyẹ-isi Ijiptu ile; kwaburuhẹ m ozigbo, etuhulẹ ogẹn.

¹⁰ Alị Goshẹni kẹ i k'e biri; ị k'a rị m nsue, yụ lẹ ụmụ ị lẹ ụmụ-ụmụ ị, kẹ ewu kẹ atụnrụn kẹ efin i, kẹ ihiẹn ile i nwọn.

¹¹ M k'e lepụ ụnụ ẹnya ọhụnma ebẹhụ, ebe omẹni ụnwụnnị k'a mụruzi ahụa isẹn ihun — amamgbe ụya e ri yụ lẹ ezi-lẹ-ụlọ ị lẹ ndị ile hụn wụ nke i.’

¹² “Ụnụ lẹ Bẹnjamini nwẹnẹ m e gigụọ nwan ẹnya ụnụ hụn a nị mmẹ wụ Josẹfụ lẹ enwẹn m rị e gi ọnụ m a gwa ụnụ ihiẹn ndịnị.

¹³ Gwa nị nẹdi m mgbaye ile wẹ rị e ye m imẹ alị Ijiptu, ụnụ a gwazị a ihiẹn ile ụnụ gi ẹnya hụn. Ụnụ e wẹhẹ nẹdi m ebeni ozigbo-ozigbo.”

¹⁴ Ya kẹ Josẹfụ nọ fiedọn Bẹnjamini nwẹnẹ ẹ, a kwan; Bẹnjamini e fiedọn ẹ, a kwanzị ẹkwan.

¹⁵ Ọ nọ susu mmunẹ ẹ ile ọnụ, a kwan. Omẹgụ mmunẹ ẹ nọ sọn ẹ ku oku.

¹⁶ Ogẹn wẹ gi nụ a iwe Fẹro nị umunẹ Josẹfụ bịa abịa, ẹfọ nọ sụọ Fẹro lẹ ịhaịmẹ ẹ ụsụọ.

¹⁷ Fẹro nọ sị Josẹfụ, “Sị mmunẹ i, ‘Lee ni ihiẹn ụnụ jẹnkọ d'e mẹ: gi ni anyịnyan ụnụ burusọnmẹ ihiẹn ẹnyi k'e buye ụnụ, ụnụ a lakin alị Kenaanị

¹⁸ d'e wẹhẹni m nẹdi ụnụ lẹ ikpụlọ ụnụ ile, nị m hụn ụzọ ye ụnụ ebe kachanrịn mma imẹ alị Ijiptu, ụnụ e ri uru rị alịnị.’

¹⁹ M chọzịkwọ n'ị sị wẹ, ‘Ihiẹn ọzọ ụnụ k'e mẹ wụ ọnwan: Gha nị alị Ijiptu weri ụgbọ-anyịnyan ndị wẹ jẹnkọ d'e ye ụnụ nị ụnụ gi bu ụmụ ụnụ lẹ inyẹnmẹ ụnụ, buzikwọ nẹdi ụnụ, ụnụ ile a bịa ebeni.

²⁰ Etulẹ ni ihiẹn ụnụ jẹnkọ d'a latọ ebẹhụ, makẹni ihiẹn kachanrịn mma rị alị Ijiptu ile k'a wụ nke ụnụ.’ ”

²¹ Ụmụ Izrẹlụ nọ mẹ ẹrịra. Josẹfụ nọ kpọnye wẹ ụgbọ-anyịnyan kẹ Fẹro dọn ku, buyezi wẹ ihiẹn wẹ k'e ri ụzọ.

²² Ọ nọ kịye onyẹ-onyẹ ẹkwa ohu-ohu; kanị ọ nọ ye Bẹnjamini akpụrụ egho siliva ọgụn-mmisẹn lẹ ẹwuru isẹn.

²³ Nke nẹdi ẹ, o zijẹnn'ẹ jaki iri bu ihiẹn-ọma ichẹn-ichẹn rị alị Ijiptu lẹ onyẹnnyẹ-jaki iri bu ọka lẹ brẹdi lẹ ihiẹn ndị ọzọ k'a rị nẹdi ẹ mkpa ụzọ ọ lalanị.

²⁴ Josẹfụ nọ sị mmunẹ ẹ lama. Ogẹn wẹ gi lakọ, ọ nọ sị wẹ, “Ekpekwọlẹ ni ụzọ-o!”

²⁵ Ya wẹ nọ gha alị Ijiptu lashi alị Kenaanị d'e kunrun nẹdi wẹ wụ Jekọpụ.

²⁶ Wẹ nọ sị nẹdi wẹ, “Echẹn kẹ Josẹfụ rị ndụn! Ịya rịdẹ nwan a kị alị Ijiptu ile!” O ri ẹ ọnụ; o gin'ẹ dọn.

²⁷ Kanị, ogẹn wẹ gi gwachanrịngụ a oku ile Josẹfụ gwa wẹ, lẹ ogẹn o gi hụn ụgbọ-anyịnyan ndị ahụn Josẹfụ buye wẹ d'e gi buhẹ ẹ, ndụn nọ banzị Jekọpụ nẹdi wẹ.

²⁸ Ya kẹ Jekọpụ wụ Izrẹlụ nọ sị wẹ, “Ezioku rọ! Josẹfụ nwa m hụ ndụn. M k'e jẹnrịrị d'a hụn a m gini d'a nwụn.”