Jẹnẹsisi 37 - Ika

Isi Nke Mmẹsa Kwasị Ọgụn Nrọ Ndị Josẹfụ Rọ

¹ Kanị Jekọpụ nkẹ nọ biri alị Kenaanị, alị ahụn nẹdi ẹ te nọ wụ otumunyẹ.

² Ọnwan wụ akịkọ ikpụlọ Jekọpụ: Kẹ Josẹfụ rị nwa ahụa mmẹsa, ịya lẹ ụmụ nẹdi ẹ e du anụ, ụmụ nẹdi ẹ hụn wụ ụmụ Bil'ha lẹ Zil'pa inyẹnmẹ nẹdi ẹ. Josẹfụ ru ụlọ ọ gwa nẹdi ẹ eje-ihiẹn umunẹ ẹ mẹ.

³ Josẹfụ kẹ ihiẹn ẹ ka nẹdi wẹ wụ Izrẹlụ a sụọ karị ụmụ a ndị ọzọ, makẹni ẹhụ ẹgẹdi k'o gi mụ a. Ọ nọ kwan'a ẹwuru tueni hụn tụ ẹkịrịka, ma mma ọda-ọda.

⁴ Ogẹn mmunẹ ẹ gi hụn a nị Josẹfụ kẹ ihiẹn ẹ ka nẹdi wẹ a sụọ karị uwẹ ile, ize Josẹfụ nọ ban wẹ, w'a ra welụazị ọnụ alị gwa a oku.

⁵ Josẹfụ rọ nrọ. Ogẹn o gi ziẹnni mmunẹ ẹ nrọ ahụn, ize ẹ nọ bankẹnmẹ wẹ.

⁶ Lee ihiẹn ọ gwa wẹ: “Gọn ni ntịn nrọnị m nrọ:

⁷ Ebe ẹnyi nọ rị e kẹnmẹ ukun ọka ndị ẹnyi be imẹ ugbo, idẹnmizi hụn m kẹnmẹ nọ turu ọtọ, tịnpụ ọhụnma-ọhụnma; nke ụnụ ile nọ fihunmẹ nke m, a kụn'a isi-alị.”

⁸ Ya umunẹ ẹ nọ sị a, “Ị rịdẹ nwan e ro n'i k'a wụ eze ẹnyi, ra ị rịdẹ e ro n'ị jẹnkọ d'a kị ẹnyi?” Ize ẹ nọ bankẹnmẹ wẹ makẹ nrọ a lẹ oku-ọnụ a.

⁹ O mẹgụ, ọ nọ rọzị nrọ ọzọ. Ọ nọ ziẹnni mmunẹ ẹ ya, sị, “Len'ẹ, a rọzị m nrọ ọzọ: ẹnyanwụn lẹ ifọn lẹzi okokisẹ mmanaị hụ a kụnị m isi-alị.”

¹⁰ Ogẹn o gi ziẹngụnị nẹdi ẹ lẹ mmunẹ ẹ ya, nẹdi ẹ nọ jụgbọ a, sị a, “Elee ụdị nrọ wụ hụnnị ị rọ? Mmẹ lẹ nnẹ i lẹ mmunẹ i ile k'a bịadẹ d'a kụn'ị isi alị ra?”

¹¹ Ẹnya nọ fụma umunẹ ẹ, kanị nẹdi ẹ nọ bu oku hụ tọ imẹ obi ẹ.

Mmunẹ Josẹfụ E Re Ẹ

¹² Ogẹn ohu, umunẹ Josẹfụ e durugụ anụ nẹdi wẹ shi Shẹkẹm d'a kpa nni,

¹³ Izrẹlụ nẹdi wẹ nọ sị Josẹfụ, “Ẹlẹ mmunẹ i rị Shẹkẹm e ye anụ ihiẹn-oriri? Bịa nị m zi i d'a hụn wẹ.” Ya Josẹfụ nị sị a, “Ịya.”

¹⁴ Ya ọ nọ sị Josẹfụ, “Jẹn d'e lele kẹ umunẹ i hụ mma, wẹ lẹ anụ wẹ rị e du, n'i kinhẹn d'a gwa m kẹ wẹ rị.” Ọ nị gha ebẹhụ wẹ rị Ọdanmgbugbu Hibrọnụ zi Josẹfụ. Josẹfụ e ru Shẹkẹm,

¹⁵ okẹnnyẹ ohu nọ hụn Josẹfụ k'ọ rị a ghahunmẹ imẹ ọfịa ndị rị ebẹhụ wẹ nọ a kpa anụ, a chọ wẹ, ọ nọ sị Josẹfụ, “K'ị rị a chọ?”

¹⁶ Josẹfụ nọ sị a, “M rị a chọ umunẹ m; dodo, y'a marịnghọ ebe wẹ rị e ye anụ wẹ ihiẹn-oriri?”

¹⁷ Ya okẹnnyẹ ahụn nọ sị a, “A ghagụọ wẹ ebeni pụ; m nụ kẹ wẹ rị a sị, ‘Nị ẹnyi shi ni Dọtanị.’ ” Ya Josẹfụ nọ chọsọnmẹ umunẹ ẹ, hụn wẹ ẹhụ Dọtanị.

¹⁸ Kanị ogẹn umunẹ ẹ gi lechen'ẹ, wẹ nọ zun'ẹ umẹ kẹni wẹ gbu ẹ.

¹⁹ Wẹ sị ibe wẹ, “E lee Ọrọ-nrọ k'ọ lala;

²⁰ Nị ẹnyi gbun'ẹ nwan, ẹnyi a tụ a ye ọmị ohu ebeni, gwa wẹ nị eje-anụ e bugụọ a ri; nị ẹnyi hụn kẹ nrọ a dọn bụn.”

²¹ Ogẹn Rubẹni gi nụ a, ọ nọ mẹmẹ n'ọ zụọpụha a ẹka wẹ. Ọ sị, “Ẹnyi egbukọ n'a.

²² Ẹlẹ hụn ụnụ e gi gbu ịhịan; ọsụọn'a oluni rị imẹ alị ọkpọ-nkụn ebeni rọ, ụnụ a tụye ẹ; ka emẹtụlẹn'a ẹka.” Rubẹni ku ihiẹnni n'ọ hụn ụzọ zụọpụha Josẹfụ ẹka wẹ, wekinni nẹdi ẹ ya.

²³ Ogẹn Josẹfụ gi nwan ru ebe mmunẹ ẹ rị, wẹ nọ gbụnarịn a ẹwuru ahụn ma mma tụ ẹkịrịka o yi.

²⁴ Wẹ nọ buru ẹ, tụ a ye imẹ ọmị, kanị okpokoro ọmị rọ, mirin arịa.

²⁵ Ogẹn wẹ gi nọdị alị nị wẹ rimẹ ihiẹn-oriri, e lee wẹ ẹnya, wẹ nọ hụn igunrun ndị-afịa, ndị Ishmẹlụ gha Gilẹdị lala. Wẹ bu ihiẹn-udẹn e kun fuẹin lẹ ori alị wẹ lẹ maa jun elu anyịnyan-mkpukpuke wẹ bukọ alị Ijiptu.

²⁶ Ya Juda nọ sị umunẹ ẹ, “Elee erere k'o jẹnkọ d'a bannị ẹnyi nị ẹnyi gbu nwẹnẹ ẹnyi, kpugbu ẹ?

²⁷ Ngwa nị, nị ẹnyi ren'ẹ ye ndị Ishmẹlụ ndịnị, hụn nkẹ ẹnyi e gi gbu ẹ; k'o mẹlẹru, nwẹnẹ ẹnyi rọ, ẹdeke ẹnyi k'ọ wụ.” Umunẹ ẹ nọ kweri.

²⁸ Ogẹn ndị-afịa hụ, ndị Ishmẹlụ alị Midianị hụ, gi nwan ru ebe wẹ rị, umunẹ Josẹfụ nọ gha imẹ ọmị hụ wepụha a, re ẹ ye ndị Ishmẹlụ, akpụrụ egho siliva ọgụn kẹ wẹ re ẹ; ndị Ishmẹlụ hụ ṅọnrin Josẹfụ nọ w'ẹ shi Ijiptu.

²⁹ Ogẹn Rubẹni gi kinhẹn d'e lele ọmị ahụn, ọ nọ hụn nị Josẹfụ arịzị a; ọ nọ dọwa ẹwuru ye enwẹn ẹ olu.

³⁰ Ọ nọ kinzi azụụn ebe umunẹ ẹ rị, sị we, “Nwata ahụn arịzị a! Elebe m'e shi?”

³¹ Ya wẹ nọ gbu ewu, weri ẹwuru ọma Josẹfụ hụ, yọ a ye imẹ ẹdeke ewu ahụn.

³² Wẹ nọ weri ẹwuru ọma ahụn jẹnni nẹdi wẹ, sị a, “Lee ihiẹn ẹnyi hụn, lele ẹ kẹ ẹwuru nwa ị rọ.”

³³ Ọ hụn a nị ịya rọ, ọ nọ sị, “Ẹwuru nwa m rọ! Eje-anụ e gbuọl'a! W'a rụ ụka a, anụ a dọkịkagụọ Josẹfụ!”

³⁴ Ya kẹ Jekọpụ nọ dọwa ẹkwa ye enwẹn ẹ olu, yiri ẹkwa achọ, gi akp'ọhịn ole-lẹ-ole kwan Josẹfụ.

³⁵ Ụmụ a ile, kẹ ikẹnnyẹ kẹ ikpoho, hụ a bịa d'a hụhụ a, ọ nịnị wẹ kwọn. Ọ sị, “M k'a kwan nwa m d'e ru mmọn.” Ya ọ nọ kwan nwa a.

³⁶ Ndị Midianị hụ ṅọnrin Josẹfụ e ru Ijiptu, wẹ nọ re ẹ ye Pọtifa hụn rị ndị-isi ọrụn Fẹro. Ịya kị ndị-nche Fẹro.