Jemisi 1 - Ika

Isi Nke Ohu

¹ Mmẹ wụ Jemisi de ẹkụkwọ-ozini. M wụ igbọn Osolobuẹ lẹ Di-nwọnni-ẹnyi wụ Jesu Kristi. M rị e dejẹnni ụmụ ebọn mmẹbụọ alị Izrẹlụ rị alị ndị ọzọ; e kele m ụnụ!

Okukwe Lẹ Amamihiẹn Kẹ Wẹ Gi E Sọn Afụnfụn

² Umunẹ m, e nwọnni ezigbo ịghọghọ ogẹn ọwụlẹ ọnwụnwan ichẹn-ichẹn gi bịanị ụnụ —

³ makẹni ụnụ a marịnghọ nị wẹ gha e lele okukwe ụnụ, ụnụ hụ e nwọnwaye ndidin.

⁴ Nị nị nwan ndidin rụnchanrịn ọrụn a, kẹni ụnụ hụn ụzọ wụrụ ndị ka ẹhụ, nwọnlẹni ebe wẹ nọ a la azụụn.

⁵ Onyẹ marịnlẹni ihiẹn o k'e mẹ, ya rịọ Osolobuẹ hụn a shịapụ ẹfọ e ye, hụn ghalẹni e kpe nị w'e rịọ a ihiẹn, o k'e ye ẹ amamihiẹn.

⁶ Kanị, ya gikwọ okukwe rịọ; y'e nwọnkwọlẹ obi ẹbụọ kaka. Makẹni, onyẹ obi-ẹbụọ nọhụ kẹ mirin ohimin ufere rị a kpọhunmẹ.

⁷ Onyẹ nọ ẹrịra erokwọlẹ n'o k'e nwọnhẹn ihiẹn ọwụlẹ ẹka Di-nwọnni-ẹnyi,

⁸ makẹni onyẹ obi-ẹbụọ k'ọ wụ: ihiẹn ile o mẹ wụ obi-ẹbụọ obi-ẹbụọ.

Ghọghọma N'ị Rị Imẹ Kraịstị!!

⁹ Ogbẹnnyẹ kwerini Kraịstị ya ghọghọma nị Osolobuẹ e bushigụọ a elu;

¹⁰ ọdanfịn kwerini Kraịstị ya ghọghọma ni e wetugụọ w'a alị. Makẹni, ndị-ịdanfịn jẹnkọ d'a nwụnhụn kẹ obobo ọfịa:

¹¹ anwụn wahụ, kẹnrẹn, ẹfịfịa rị ọfịa e shinwụn, obobo ẹ a danpụ, mma a a gụ! Ẹrịra kẹ ndị-ịdanfịn a nwụnhụn ebe wẹ rị e bi elu wẹ.

Nlele Lẹ Ọnwụnwan

¹² Onyẹ hụn din ndidin ebe wẹ rị e lele ẹ e nwọngụọ ngọzi, makẹni, ọ pụha ọhụnma, Osolobuẹ e gi ndụn tu ẹ ugọn k'o dọn kwe nkwa n'o k'e mẹ ndị ihiẹn ẹ a sụọ.

¹³ Ọnwụnwan bịanị ịhịan, y'a sịkwọlẹ, “Osolobuẹ rị a nwan m.” Makẹni, eje-ihiẹn ara gụn Osolobuẹ ẹgụn omumẹ; onwọnzikwọnị onyẹ ọ nwan.

¹⁴ Nị ọnwụnwan bịanị ịhịan wụnị eje-ihiẹn la a ẹnya, kwọndọn ẹ.

¹⁵ Ihiẹn-ọlịlẹnya kẹnrẹngụ, ọ mụ njọ; njọ karagụ, ọ mụ ọnwụn.

¹⁶ Ezigbo umunẹ m, anịkwọlẹ ni wẹ dufie ụnụ.

¹⁷ Makẹni, ihiẹn ile rị mma zu oke wẹ e ye gha elu-igwee bịa — ọ gha ẹka Nẹdi hụn e ye ukpẹ ile a bịa, Nẹdi hụn ghalẹni e kuhutọ ọnụ mọbụ e yebe ukpẹ yemẹ ishi.

¹⁸ Ịya gi uche ẹ mụnrụn ẹnyi, ghahanị oku ẹ hụn wụ ezioku, kẹni ẹnyi wụrụ nke ẹ imẹ ihiẹn ile o ke, nọkẹ mkpụrụ ibuzọ.

Ịnụ Oku-Chuku Lẹ Igi Ẹ Bi

¹⁹ Ezigbo umunẹ m, ọnwan ya we ụnụ ẹnya: onyẹ ọwụlẹ ya a nụkpọ oku; y'e kukẹnrinlẹ oku; y'e bukẹnrinlẹ olulu —

²⁰ makẹni olulu ịhịan ara wẹhẹ ihiẹn Osolobuẹ chọ.

²¹ Wepụ nị nwan ihiẹn ile ru unyin lẹ eje-ihiẹn ile ụnụ rị e gi e mẹkarị enwẹn ụnụ; ụnụ e welụa enwẹn ụnụ alị nabanhan oku Osolobuẹ wẹ kụnye imẹ obi ụnụ, hụn k'a saẹka zụọpụha umẹ-ndụn ụnụ.

²² A wụ nị ndị e mẹ ihiẹn Osolobuẹ ku, ẹlẹ ndị a nụ ọnụnụ-ọnụnụ sụọ, e dufie enwẹn wẹ.

²³ Makẹni, onyẹ rị a nụ oku-Chuku bụ ara mẹ ẹ nọhụ kẹ onyẹ gi ughegbe mmakalaka lee enwẹn ẹ:

²⁴ O leghagụhụ enwẹn ẹ, ọ gha ebẹhụ pụ, ozigbo ọ zọ k'ọ nọ.

²⁵ Kanị omẹni ịhịan hụ e lee iwu hụ zu oke ịhịan gi e nwọnrin enwẹn ẹ, e lesọnmẹ, nị ẹlẹ onyẹ a nụgụ, a zọ, kanị ọ hụ e gi ẹ e bi, o sikọ d'a narịn ngọzi makẹni ọ hụ e mẹ ẹ.

²⁶ Onyẹ sị n'ọ rị e fe Osolobuẹ bụ ara kwọndọn ire ẹ, ọ rị e dufie enwẹn ẹ; ofufe ẹ la iwi.

²⁷ Ezigbo ofufe zu oke, rụlẹni ẹnya Osolobuẹ Nẹdi ẹnyi wụ hụnnị: ịtụnị ndị nwọnlẹni nẹdi mọbụ nnẹ lẹ ikpoho di wẹ nwụn rị e ri ụya ụya, lẹzi idọnmẹ enwẹn ịhịan makẹ ụwa gha e mẹrụ a.