Izikẹlụ 9 - Ika

Isi Nke Itenẹi O Dọnmẹ Ndị Njọ Rị E Ze Ize Ndụn

¹ Osolobuẹ nọ weshi olu elu, hị, “Ndị m sikọ d'e gi ye obodoni afụnfụn a bịagụọ nwan; onyẹ-onyẹ lẹ ihiẹn o gi e tikpọ.”

² M nọ hụn ikẹnnyẹ isin kẹ wẹ lala: wẹ gha ibẹka Ọnụ-mgbọn hụ rị mkpọnyin lala — Ọnụ-mgbọn hụ bu ihun zinmẹ ẹbamịn-ugu. Onyẹ-onyẹ imẹ wẹ bu ihiẹn o gi e gbu. Okẹnnyẹ ohu hụn yi ẹkwa-linẹni rị imẹ wẹ, o kẹn ihiẹn wẹ gi e de ihiẹn ukun. Wẹ ile nọ bịa d'e wuzo ẹhụ ukpo nchụn-ẹjan igwe-bronzu Ụlọ-nsọ.

³ Ya kẹ ọghọ Chuku Izrẹlụ nọ gha ebe o te rị elu chẹrobu ẹbụbụọ ahụn imẹ-imẹ Ụlọ-nsọ buli elu d'a nọdị ọnụ-mgbọn Ụlọ-nsọ. Osolobuẹ nọ hị okẹnnyẹ ahụn yi ẹkwa-linẹni, hụn bu ihiẹn wẹ gi e de ihiẹn ukun.

⁴ Ọ sị a, “Ghagbama ọgbara-ogbe ile rị obodoni wụ Jerusalẹm d'e buchesọnmẹ ahịma ezimezi ihun ndị ile rị a kwan a sụn udẹn makẹ arụ ile rị e mẹ imẹ ẹ.”

⁵ A nụ m kẹ Osolobuẹ sị ikẹnnyẹ ndị hụ họdụnị, “Sọnrinn'ẹ ghasọnmẹ obodoni ile kẹni ụnụ gbu. Gbu ni onyẹ ọwụlẹ o yelẹni ahịma ezimezi ihun. Elekwọlẹ ni wẹ ẹnya ihun; emẹlẹ ni omikẹn wẹ;

⁶ gbu ni kẹ ikẹnnyẹ-ọba kẹ ikorọbịa, kẹ ịgbagba kẹ ụmụ-ẹka kẹ ikpoho-ọba; ka emẹtụkwọlẹ ni onyẹ ọwụlẹ nwọn ahịma hụ ẹka. Gha nị Ụlọ-nsọ m gbumẹ.” Ya wẹ nọ gi ndị-ichẹn hụ rị ihun Ụlọ-nsọ a rụa mmọn bidọn.

⁷ Ọ sị wẹ, “Mẹrụ nị Ụlọ nsọ; gbu ni ozun jun ezi-ọgwa a! Jẹnmẹ ni!” Ya wẹ nọ jẹnmẹ d'e gbumẹ ịhịan imẹ Jerusalẹm.

⁸ Ebe mmẹ sụọ rị nwan ogẹn wẹ gi rị imẹ obodo e gbu ndị wẹ rị e gbu, m nọ bu ẹfọ mama alị, kwanma, “Euu Osolobuẹ nwọn ihiẹn ile! I k'e gi ụdị oluluni sọn Jerusalẹm, tikpọchanrịn ndị Izrẹlụ ile họdụnị?”

⁹ Ọ nọ sị m, “Njọ ndị Izrẹlụ Ẹbamịn-ugu lẹ ndị Juda a karịgụọ ẹka ọda-ọda; ogbugbu-ogbugbu e jungụọ alịnị, eje-obibi e jun isi-alịnị wụ Jerusalẹm — makẹni wẹ rị a sị enwẹn wẹ, ‘Osolobuẹ a jụgụọ alịnị! Osolobuẹ arị a hụn ihiẹn rị e mẹni!’

¹⁰ Mmẹ nwẹn emẹkọ nwan omikẹn wẹ; elekọ m wẹ ẹnya ihun. M k'e mẹ wẹ gi isi wẹ buru eje-ihiẹn wẹ mẹ.”

¹¹ Okẹnnyẹ ahụn yi ẹkwa-linẹni, hụn bu ihiẹn wẹ gi e de ihiẹn ukun, nọ nwan kinhẹn, sị, “E mẹgụọ m ihiẹn ị sị m mẹ.”