Izikẹlụ 21 - Ika

Isi Nke Ohu Kwasị Ọgụn Ihiẹn Osolobuẹ K'e Mẹ Jerusalẹm

¹ Ya kẹ Osolobuẹ nọ gwazị m oku, sị m,

² “Nwa-ịhịan, bu ihun zinmẹ Jerusalẹm, ku ihiẹn k'e mẹ ebe ile rịn'a wẹ nọ e fe ofufe; bu amụma ihiẹn k'e mẹ alị Izrẹlụ.

³ Sị alị Izrẹlụ, ‘Osolobuẹ sị: Lee ẹ, mmẹ lẹ yụ rọ! M k'e sepụha ọpịa-agha m imẹ ọbụọ a, gbupụ kẹ ndị ezi-omumẹ kẹ ndị-ejẹ rịn'a!

⁴ Ebe o mẹni m k'e gbunarịn ị kẹ ndị ezi-omumẹ kẹ ndị-ejẹ, ya wụ nị m sikọ d'e sepụhazịkwọ ọpịa-agha m gbumẹ ịhịan ile, gha ndị rị ẹbamịn ndịdan d'e ru ndị rị ẹbamịn-ugu.

⁵ Ogẹn ahụn, ịhịan ile k'a marịn nị mmẹ wụ Osolobuẹ. E sepụhagụọ m ọpịa-agha m imẹ ọbụọ a, o kinkọzị azụụn.’

⁶ “Yụ nwẹn, Nwa-ịhịan, sụnma nwan udẹn! E finfin ụkụ, a kwan ụya idẹnya wẹ.

⁷ Wẹ sị ị, ‘Kị rị a sụnnị udẹn?’ Sị, ‘Ozi lalanị haịn. Obi k'e dẹnhin ịhịan ile, ẹka ile a lịlọhị, ndụn a gụ onyẹ ọwụlẹ obi, mkpụkụ ile a mama piripiri!’ Ọ lala! O k'e mẹrịrị! Ya kẹ Osolobuẹ Nwọn Ihiẹn Ile ku.”

⁸ Osolobuẹ sị m,

⁹ “Nwa-ịhịan, bu amụma, sị, ‘Lee ihiẹn Osolobuẹ ku: Ọpịa-agha: e sụọnchanpụgụọ wẹ ọpịa-agha ohu, finchan a ọhụnma-ọhụnma;

¹⁰ e sụọngụọ w'a n'o gbu ọhụnma-ọhụnma; e finchangụọ w'a, ọ hụ e be nwaịn-nwaịn kẹ amụma! “ ‘Ẹnyi te k'a ghọghọmadẹ ra — nị eze Juda nwa m rị nwan e legberi mkpịnsịn ile te k'e yen'ẹ ẹka?!

¹¹ “ ‘Wẹ gwa wẹ finchan ọpịa-agha ahụn, kẹni wẹ kwọndọn ẹ; e sụọnchanpụgụọ w'a, finchan a, kẹni wẹ bu ẹ che ẹka onyẹ hụn sikọ d'e gbuni.

¹² “ ‘Nwa-ịhịan, yimẹ oro, gomẹ, makẹni ndị nke m kẹ wẹ k'e gi ẹ gbu; ndị-isi Izrẹlụ ile kẹ wẹ k'e gi ẹ gbu. A tụgụọ wẹ wẹ yeni ọpịa-agha hụ, uwẹ lẹ ndị nke m. Fịanma nwan ẹka obi.

¹³ “ ‘Nlele rọ. Omẹni ọkpọ ahụn, hụn wụ eze Juda, te k'e legberibehi m?!’ Ya kẹ Osolobuẹ Nwọn Ihiẹn Ile ku.

¹⁴ Yụ nwẹn, Nwa-ịhịan, bu nwan amụma. A kpọ ẹka e yeni wẹ ya. Ọpịa-agha ahụn ya be mgbe ẹbụọ, ya bedẹ mgbe ẹtọ. Ọpịa-agha wẹ butọnị ndị wẹ k'e gbu rọ — ọpịa-agha hụn k'e gbu ọda-ọda; ọ k'a ghaha wẹ azụụn ile.

¹⁵ Kẹni obi dẹnhin wẹ, kẹni ndị bu ọda kpọgburu. E bugụọ m ọpịa-agha ahụn k'e gbuni che ọnụ-mgbọn wẹ ile. Ẹghẹẹ! E sụọngụọ w'a, ọ hụ e be nwaịn-nwaịn kẹ amụma. E bugụọ w'a che ọbụọ nị wẹ gi ẹ gbu ịhịan.

¹⁶ Ịyụ, ọpịa-agha, be ọhụnma-ọhụnma gbushi ẹka-nni, y'e gbushi ẹka-ekpẹn; ebe ọwụlẹ i bu ọnụ zinmẹ y'e gbu.

¹⁷ Mmẹ nwẹn k'a kpọzị ẹka e yeni wẹ ya, e bu m oluluni ru alị, d'e ru n'ọ rọ. Mmẹ wụ Osolobuẹ e kugụọ a.”

Osolobuẹ Wela Eze Ndị Babilọnụ Lẹ Ọpịa-agha A

¹⁸ Osolobuẹ sị m:

¹⁹ “Nwa-ịhịan, se ụzọ ẹbụọ ọpịa-agha eze ndị Babilọnụ k'a gha. Se ẹ nị wẹ ẹbụọ gha alị ohu bidọn. Ka zumẹ ihiẹn-ahịma ye ebe ụzọ nọ wa ẹbụ n'ọ ghọsị ebe ụzọ ẹbụbụọ hụ sikọ.

²⁰ “Se ụzọ ohu hụn ọpịa-agha ohu k'a gha shi Raba wụ isi-alị ndị Amọnụ, y'e se hụn ẹbọ hụn o k'a gha shi Juda lẹ isi-alị a wụ Jerusalẹm hụn wẹ tụnhunmẹ mgbọn zeni.

²¹ Makẹni, eze Babilọnụ k'e wuzo ebe ụzọ ahụn nọ wa ẹbụ, e ro hụn o k'a ghashi: O k'e gi ọbara-ụta a gba ẹfa; o k'a jụ mmọn a ọnụ; o k'e wepụha imegi anụ, gi ẹ nyan utẹn kẹ wẹ e mẹ.

²² Utẹn k'a sị Jerusalẹm rọ, y'a jẹn d'a lụsọn ẹ agha. Wẹ k'a tụnnị Jerusalẹm ihiẹn wẹ gi e tikpọ mgbọn, sị wẹ tikpọ a. Wẹ k'e yi oro agha maye ẹ. Wẹ k'e bu ihiẹn ndị hụ wẹ gi e tikpọ mgbọn che ọnụ-mgbọn ndị rịn'a. Wẹ k'a tụn mkpọnyin lẹ ihiẹn ndị ọzọ w'a nọ a lụsọn alị wẹ tụnhunmẹ mgbọn agha.

²³ Ndị Jerusalẹm k'a sị utẹn hụ wụ ntụ makẹni wẹ te kun Osolobuẹ kwe eze Babilọnụ nkwa nị wẹ wụ nke ẹ; kanị o k'a nyanhannị wẹ n'e mẹni wẹ ihiẹn wẹ ku. O sikọ d'a kpụnrụn wẹ.

²⁴ “Osolobuẹ Nwọn Ihiẹn Ile sị nwan: Ụnụ e mẹgụọ m nyanhan njọ ụnụ, iwu ụnụ dan a wa. Ịhịan ile a hụngụọ ihiẹn ile ụnụ rị a rụn lẹ njọ ụnụ ile. Ufiri ẹ, wẹ k'a kpụnrụn nwan ụnụ.

²⁵ “Ịyụ, eze Izrẹlụ, eje-ịhịan njọ gbuchanrịngụ k'ị wụ! Ogẹn i e rugụọ! Ụhụọhịn w'e gi ye i afụnfụn e ruchanrịngụọ!

²⁶ Osolobuẹ Nwọn Ihiẹn Ile sị: Wepụ nwan okpu-isi rị ị isi; kpupụ okpu-eze rị ị isi. Ihiẹn arịkọzị k'ọ rị mbụ: wẹ sikọ nwan d'e bushi ndị nta elu, budan ndị uku.

²⁷ Mkpọkọ, Mkpọkọ!! M k'a la Jerusalẹm tọ Mkpọkọ! Edọnzikọ w'a d'e ru ni onyẹ jẹnkọ d'a hann'a eṅẹn a bịa; e we m'ẹ che ẹ ẹka.

Ihiẹn Rị E Che Alị Amọnụ

²⁸ “Yụ nwẹn, nwa-ịhịan, bu amụma, sị: Lee ihiẹn Osolobuẹ Nwọn Ihiẹn Ile ku banyeni ndị Amọnụ lẹ ụya lalanịnị wẹ!! Sị wẹ nwan, ‘Ọpịa-agha, ọpịa-agha! E sepụhagụọ wẹ ọpịa-agha w'e k'e gi gbu ụnụ; e finchangụọ w'a ọhụnma-ọhụnma, ọ hụ e be nwaịn-nwaịn nọkẹ amụma,

²⁹ (ọsụọn'a nị ịhịan hụ a hụnnị ụnụ ọhụn ntụ, a gbanị ụnụ ẹfa-ntụ e kuyeni ụnụ) ọpịa-agha hụ sikọkwọ olu ndị-ejẹ njọ gbuchanrịngụ, ndị ogẹn wẹ rugụ, ndị ogẹn w'e gi narịn afụnfụn ruchanrịngụ.

³⁰ “ ‘Wekin nwan ọpịa-agha hụ ọbụọ a. Alị ị, alị wẹ nọ mụ ị, kẹ m'a nọ ye i afụnfụn.

³¹ M k'e hu ọnụma m kpu i, fụ olulu ọkụn m kpu i; m k'e we i che ẹka ndị ẹfọ jọ, ndị ahụn marịn ẹnya ntikpọ.

³² Ị k'a wụrụ nkụn wẹ gi a fiye ọkụn; ẹdeke i k'e huru alị ị, anyanhankọzị wẹ i. Mmẹ wụ Osolobuẹ e kuọl'a.’ ”