Itẹn 24 - Ika

Isi Nke Ẹnọ Kwasị Ọgụn

¹ Ẹnya afụkwọlẹ i nị ihiẹn ghanị ndị eje-omumẹ, achọkwọlẹ nị ịyụ lẹ wẹ kpa;

² makẹni eje-ihiẹn kẹ obi wẹ e ro, oku kẹ wẹ gi ọnụ wẹ a chọ.

³ Amamihiẹn kẹ wẹ gi a tụn ụlọ, nghọta k'o gi e turu;

⁴ ịmarịn-ihiẹn kẹ ihiẹn w'a chọ achọ lẹ ihiẹn rị mma gi e jun mmughẹ rịsọnmẹn'ẹ.

⁵ Onyẹ nwọn uche nwọn ikẹn, onyẹ hụn nwọn amamihiẹn rị e nwọnwaye ikẹn;

⁶ makẹni agha chọ ezigbo ndụnmọdụn, mmẹri chọ ndị ndụnmọdụn bu ọda.

⁷ Amamihiẹn e tekẹ ebe onyẹ-nzuzu rị; wẹ zudẹ imẹ ọgwa, ara shịapụ ọnụ a.

⁸ Onyẹ e romẹni ịhịan eje-ihiẹn, eje-ịhịan wụ ẹfan a.

⁹ Ihiẹn hụn onyẹ-ẹwobi romẹ wụ njọ; onyẹ hụn e lelịanị e ze ịhịan ize.

¹⁰ Ndụn gụ ị ogẹn nsọngbu, ya wụ nị ndụn ị mẹ ẹkẹrẹ.

¹¹ Zụọpụha ndị wẹ wekọ d'e gbu; kwọndọnkwọ ndị wẹ wekọ d'e gbu dangbukọnị.

¹² Ị sị, “Ẹnya m erukwọnị!” Onyẹ Hụn marịn obi ịhịan amarịnzị ezioku ra? Onyẹ hụn e dọnmẹ i ndụn amarịn? Ọ kụkọ onyẹ-onyẹ ụgwọ k'o dọn rụn?

¹³ Nwa m, ra mirin-ẹnwụn, makẹni ihiẹn rị mma rọ; mirin-ẹnwụn gha ọgba-ẹnwụn a tantu a sụọ ụsụọ ọnụ:

¹⁴ marịnzịkwọ nị ẹrịra kẹ amamihiẹn a sụọ umẹ-ndụn ị ụsụọ; ị hụn a, o k'a masịn'ị ihun, o kpuyekọ ị.

¹⁵ Awarịlẹ kẹ ndị-ejẹ ni i mẹ ụlọ onyẹ ezi-omumẹ ihiẹn, amayelẹ ikp'ụlọ wẹ;

¹⁶ makẹni ọsụọn'a mgbe ẹsa kẹ onyẹ ezi-omumẹ dan, n'o lihighọkwọ, kanị eje-ihiẹn bịanị onyẹ eje-omumẹ, ọ dan.

¹⁷ Aghọghọkwọlẹ nị eṅẹnrẹn i dan adan; ọ kpọgburu, anịkwọlẹ obi sụọ ị ụsụọ,

¹⁸ makẹni Osolobuẹ hụn a nị ị rị a ghọghọ, ẹfọ asụọkọ a ụsụọ, olulu o gi e sọn hụnyẹ a rọ.

¹⁹ Agbakakwọlẹ obi makẹ eje-ịhịan; ẹnya afụkwọlẹ i makẹ aghamihun eje-ịhịan,

²⁰ makẹni ọ masịkọnị eje-ịhịan ihun; ukpẹ ndị eje-omumẹ k'e tinyụn.

²¹ Nwa m, ka a tụkwọ egun Osolobuẹ lẹ eze esọnkwọlẹ ndị nnupụ-isi,

²² makẹni wẹ ẹbụbụọ nwọn ikẹn wẹ gi e zihẹ okẹn eje-ihiẹn idẹnmizi: onyẹ ma ihiẹn wẹ k'e mẹ?

Oku Ndị Nwọn Amamihiẹn ku

²³ Ndịnị wụzịkwọ ihiẹn ndị nwọn amamihiẹn ku: Igbeyeni ịhịan arị mma:

²⁴ Onyẹ sị onyẹ ikpe ma, “Ịyụ ri eṅẹn”, wẹ k'a bụ a ọnụ, ndị alị ichẹn-ichẹn k'e kuja oku ẹ.

²⁵ Kanị o k'a rịnị onyẹ ndị jụgbọ onyẹ mẹ njọ mma, ezigbo ngọzi k'a bịanị wẹ.

²⁶ Wẹ shịapụ ẹfọ shịarị ịhịan oku, ọ nọ kẹ ebe wẹ nọ susu ịhịan ọnụ ụgb'ọnụ.

²⁷ Rụnpụ ọrụn ị rị ogbe, y'e dọnzi ugbo i ọhụnma, i kebe tụn ụlọ ị.

²⁸ Ashịagbulẹ ibe i ẹri mmaka, mọbụ tụ ntụ.

²⁹ Asịlẹ, “M jẹnkọ d'e mẹ ẹ ihiẹn o mẹ m; m jẹnkọ d'e mẹgwarị a ihiẹn o mẹ m!”

³⁰ A ghafeghọ m ugbo onyẹ-nzụnzụn, Anị-vaịnị onyẹ nwọnlẹni uche —

³¹ e lee ogun rujun ebe ile, ẹfịfịa e rujun alị; mgbọn ẹ wẹ gi ọmụma tụn a dankpọgụọ.

³² E rokpọ m ihiẹn m hụn, m nọ gi ihiẹn m hụn mụnrụn ihiẹn:

³³ Ẹkẹrẹ ụran, ẹkẹrẹ irue ụran, ịkụma ẹka zu ikẹn ẹkẹrẹ —

³⁴ y'a dan ogbẹnnyẹ idẹnmizi kẹ ohin dọn e kunrun ịhịan idẹnmizi, ihiẹn-ụkọ e kunrun i nọkẹ ndị e chekin ịhịan ụzọ.