Hosia 7 - Ika

Isi Nke Ẹsa

¹ “Hụn m gihụ chọ nị m zụọ Izrẹlụ, njọ Ifrem a kpọzị m ihun, ya lẹ eje-ihiẹn rị imẹ Sameria isi-alị wẹ; ntụ-ntụ kẹ w'a tụ; ụfọdụ hụ e gbukpọ ụlọ, e zun, ụfọdụ hụ ụzọ e zun.

² “Egini wẹ dọn ni m k'a nyanhan njọ wẹ ile. Njọ wẹ e fihunmẹgụọ wẹ nwan; a hụnchanrịngụọ m'a.

E Zuni Wẹ Eze Eje-umẹ, Gbu Ẹ Tọ Imẹ Ọgwa

³ “E gi wẹ ẹro wẹ mẹ ẹfọ sụọma eze ụsụọ, gi aghịghọ mẹ ẹfọ sụọma ndị-isi ụsụọ.

⁴ Ndị ughẹrẹ kẹ wẹ ile wụ; a nụ ọkụn kẹ ọkụn rị ẹnya-mgba brẹdi, hụn onyẹ e shi brẹdi ghalẹni a fụnwunzi d'e ru ni ogbe brẹdi a fụgụ.

⁵ Ụhụọhịn ahụn eze mẹ mmẹmmẹ ẹ, e ye wẹ ịhaịmẹ eze manya ra tụ; eze nkẹ nọ sọn ndị rị a mụ a ẹmụ ri, ra.

⁶ Wẹ lẹ obi rị e kpọn wẹ ọkụn kẹ ẹnya-mgba, e gi wẹ ẹro nọkunmẹ eze; iwe rị wẹ obi hụ e rẹn kẹ ikeke-ọkụn uhinhin ahụn ile, ụtụntụn e ru, ọ nọ dụn.

⁷ Wẹ ile nọ kẹ ọkụn rị ẹnya-mgba, e bu ndị ọkịkị wẹ e ri. E gbugụọ wẹ ndị-nze wẹ ohu-ohu; onwọnni onyẹ a kpọkuni m.

Izrẹlụ E Sọngụọ Wẹ Rụa Mmọn, Rụagbu Enwẹn Ẹ

⁸ “Izrẹlụ hụ e sọn itumunyẹ a kpa; wẹ nọ nwan kẹ akara ghe azụụn ohu sụọ.

⁹ Itumunyẹ hụ a narịn Ifrem ndụn, ọ marịn; Isi e pumẹgụọ a ẹwọ, ọ marịn!

¹⁰ Mpache Izrẹlụ rị ihun wẹ a shịagbu wẹ ẹri, kanị ekinhẹnkwọnị wẹ nwan buru Osolobuẹ, Chuku wẹ; egikwọnị w'a chọma ihun ẹ.

¹¹ Ndị Ifrem nọ kẹ oluikuku nwọnlẹni uche rị e zuzuni: a kpọku alị Ijiptu, a gbakunrun alị Asiria!

¹² Kanị, wẹ jẹnkọnị ebẹhụ, m k'e gi ọga m nwụn wẹ, wetu wẹ alị kẹ nnụnụ e feni; M k'e gi ihiẹn wẹ rị e zuni ye wẹ afụnfụn.

¹³ “Nsọngbu rị e che wẹ makẹni a kpapụgụọ wẹ ebe m rị! Wẹ tikpọ wẹ! Makẹni e nupụgụọ wẹ isi okpuru m! M te chọ nị m gbapụha we kanị e buokingụọ wẹ m ọnụ.

¹⁴ W'a ra gi obi wẹ kpọku m ụya kẹ w'a kwan elu bẹdi wẹ; w'e bekikadẹ enwẹn wẹ, nị wẹ rị a rịọ mmọn ọka lẹ manya; E nupụọlẹ wẹ isi okpuru m!

¹⁵ Ọsụọn'a nị mmẹ zụn wẹ, mẹ ẹka shi wẹ ikẹn, wẹ rị nwan e zuni m eje-umẹ.

¹⁶ Ẹnya rị wẹ ụzọ ile mmanị elu-igwee; wẹ nọ kẹ ụta rịlẹni mma; ọpịa-agha k'e gbu ndị-isi wẹ yeni mkpari ile rị wẹ ọnụ. “Wẹ k'e gi ihiẹnni mụ wẹ ẹmụ imẹ Ijiptu.