Hibru 10 - Ika

Isi Nke Iri Jizọsị A Chụnchanrịngụọ Ẹjan Ile

¹ Ebe o mẹ ni Iwu Mozizi wụhụ onyinyọn ihiẹn rị mma lalanị, ẹlẹ ezigbo ẹ; ya wụ nị ẹjan hụ w'a chụn ahụa-ahụa asakọ ẹka chanchanpụ njọ ndị a bịa d'e fe Osolobuẹ, mẹ wẹ zu oke.

² Omẹni o te sa ẹka chanchanpụ njọ, nkẹ ndị e fe ofufe a chụnbehi ẹjan; nkẹ obi e gbubehi wẹ mgbu makẹni a changụọ wẹ obi wẹ mgbe ohu chanchanrịn a.

³ Kanị, ẹjan ndị ahụn w'a chụn a nyanhansọnmẹdẹni ndị rị e fe ofufe njọ wẹ ahụa-ahụa,

⁴ makẹni ẹdeke okẹn-efin lẹ ewu as'ẹka wepụ njọ.

⁵ Ya haịn, ogẹn Kraịstị gi bịa imẹ ụwa, ọ sị, “Kẹ ẹjan kẹ oyiye, onwọnni hụn ị chọ; kama, ẹhụ k'i kwademẹni m.

⁶ Kẹ ẹjan wẹ dụn ọkụn kẹ ẹjan njọ, onwọnni hụn a sụọn'ị.

⁷ Ya m nọ sị, ‘Lee ẹ, Osolobuẹ, a bịagụọ m d'e mẹ uche i — kẹ wẹ dọn de banyeni m imẹ Ẹkụkwọ-nsọ.’ ”

⁸ Nke ibuzọ, ọ sị, “Kẹ ẹjan, kẹ oyiye, kẹ oyiye wẹ dụn ọkụn, kẹ ẹjan njọ — onwọnni hụn ị chọ, onwọnni hụn a sụọn'ị,” (ọsụọn'a nị Iwu sị wẹ e mẹ ihiẹn ndịnị).

⁹ Ya ọ nọzị sị, “Lee ẹ, a bịagụọ m d'e mẹ uche i.” Ya wụ nị o bugụọ nke ibuzọ che ụsụọ kẹni o tumẹ nke ẹbụọ.

¹⁰ Uche Osolobuẹ ahụn kẹ wẹ gi nwan dọn ẹnyi nsọ ghahanị ẹjan Kraịstị wụ Jizọsị gi ẹhụ a chụn mgbe ohu, chụnchanrịn a.

¹¹ Onyẹ nchụn-ẹjan gi Iwu Mozizi a rụn ọrụn a ụhụọhịn-ụhụọhịn, a chụnsọnmẹ ẹjan ohu ahụn ghalẹni asaẹka e wepụ njọ.

¹² Kanị nke Kraịstị, k'ọ chụngụ ẹjan njọ ohu hụ o gi chụnchanrịn ẹjan ile, o weri oche ẹka-nni Osolobuẹ.

¹³ Kete mgbe ahụn, ọ rị e che ogẹn Osolobuẹ k'e gi mẹ ndị iṅẹnrẹn ẹ wụrụn'a ihiẹn o gi a tụkwasị ụkụ,

¹⁴ makẹni o gigụọ ẹjan ohu mẹ ndị hụ ọ rị e dọn nsọ wụrụ ndị zu oke jẹnrin ejẹn.

¹⁵ Mmọn-nsọ nkẹ a shịazịghọ ẹri. O bu ụzọ sị,

¹⁶ “Di-nwọnni-ẹnyi sị, ‘Ọnwan wụ nkwerigbama m jẹnkọ d'e tumẹ ẹgbata mmẹ lẹ wẹ ogẹn hụ: m jẹnkọ d'e bu iwu m che imẹ obi wẹ, m k'e de wẹ ye imẹ uche wẹ.’ ”

¹⁷ Ọ nọ sịzị, “Anyanhankọzị m njọ wẹ lẹ mmẹfie wẹ.”

¹⁸ Ebe wẹ gbagharịgụ nwan njọ ndịnị wẹ, ẹjan wẹ gi e wepụ njọ arịkọzị.

Nị Ẹnyi Nọkunmẹ Nwan Osolobuẹ

¹⁹ Umunẹ m, nị ẹnyi saghọ nwan ẹka banye Ebẹhụ Kachanrịn nsọ, ebahụn Osolobuẹ rị, ghahanị ẹdeke Jizọsị,

²⁰ ẹdeke ẹ o gi kwanị ẹnyi ụzọ ọhụn shikọ ndụn ghahanị ịdọwapụnị ẹnyi ẹkwa mgbọnbepụ ahụn — hụn wụ ẹhụ a.

²¹ Ọzọzị, ẹnyi nwọn okẹn onyẹ nchụn-ẹjan hụn ụlọ Osolobuẹ rị ẹka a.

²² Nị ẹnyi gichanrịn ni nwan obi ẹnyi lẹ okukwe obi ẹbụọ rịlẹni buruhẹ Osolobuẹ, ẹnyi lẹ obi o fepụgụ ihiẹn ile obi gi e gbu ẹnyi mgbu, lẹ ẹhụ o gi mirin nwunni wụchanpụ.

²³ Nị ẹnyi kwọnkẹnmẹ ni nwan olilẹnya ẹnyi, e ku ẹ, e kushi ẹ ikẹn, makẹni Onyẹ hụn kwe ẹnyi nkwa furu wẹ gi e dọn ẹnya.

²⁴ Nị ẹnyi a chọsọnmẹ ni kẹ ẹnyi e dọn mẹ ibe ẹnyi e nwọn ihiẹn-ọsụsụọ, e mẹ ihiẹn rị mma.

²⁵ Ẹlẹ hụn ẹnyi e gi e sọnbehi ibe ẹnyi e zu kẹ ụfọdụ dọn e mẹ. Kama, nị ẹnyi a kasị ibe ẹnyi obi, tụmadụ hụnnị ẹnyi rị a hụn kẹ ụhụọhịn Di-nwọnni-ẹnyi rị a rịwaye nsue.

²⁶ Makẹni, ẹnyi kpachanpụ ẹnya tọ njọ e mẹ ebe ẹnyi marịngụ ezioku, onwọnzini ẹjan họdụnị wẹ jẹnkọ d'a chụn gi wepụ njọ;

²⁷ ikpe-ọmụma hụn a tụ egun lẹ okẹn ọkụn hụn jẹnkọ d'a dụnchanrịn ndị-iṅẹnrẹn Osolobuẹ sụọ kẹ ẹnyi k'a gha e lee ẹnya a.

²⁸ Ebe o mẹ ni ịhịan dan Iwu Mozizi, e gbu w'ẹ, omikẹn arịa, hụn madụ ẹbụọ mọbụ ẹtọ gihụ shịa ẹri,

²⁹ elee ụdị afụnfụn k'i ro nị wẹ k'e ye onyẹ hụn legberi Nwa Osolobuẹ, lelịa ẹdeke nkwerigbama hụ wẹ gi dọn ẹ nsọ, kpasu Mmọn-nsọ wẹ gha mẹn'ẹ ẹfọma iwe?

³⁰ Makẹni ẹnyi a marịnghọ Osolobuẹ, onyẹ hụn sị, “Mmẹ nwọn e mẹgwarị; m k'a kụ wẹ ụgwọ;” sịzị, “Di-nwọnni-ẹnyi jẹnkọ d'e kin ndị nke ẹ ikpe.”

³¹ N'ọ jọkakwọ njọ ebe ịhịan a nọ danye ẹka Osolobuẹ rị ndụn.

Nyanhan Nị Kẹ Ụnụ Dọn Bidọn

³² Ka nyanhan nị ọrụrụ-alị hụ ụnụ kweri, ogẹn ụnụ gi leghama ukpẹ; nyanhan nị ọnwụn ụnụ shi lẹ afụnfụn ụnụ dingbu,

³³ ụya wẹ ye ụnụ ri, ukpokpo wẹ kpokpo ụnụ lẹ kẹ ụnụ dọn kweri sọndẹ ndị ọzọ wẹ rị e mẹ ẹrịra ta afụnfụn.

³⁴ Ẹghẹẹ, ụnụ a chọ ihiẹn ụnụ e mẹni ndị rị ngan ogẹn hụ; kẹ wẹ napụ ụnụ ihiẹn ụnụ, ụnụ gidẹ ịghọghọ din ẹ, makẹni ụnụ a marịnghọ nị ụnụ lẹ enwẹn ụnụ nwọn hụn ka mma lẹ hụn k'a rị jẹnrin ejẹn.

³⁵ Ya wụ, etuhulẹ ni nwan okweri hụ ụnụ kwerikẹnmẹni Di-nwọnni-ẹnyi, makẹni ụgwọ-ọrụn rịn'a e hikẹkwọ ogbe.

³⁶ Ndidin kẹ ụnụ chọ, kẹni, ụnụ mẹgụ uche Osolobuẹ, ụnụ e gi ẹ nwọnhẹn ihiẹn o kwe nkwa a.

³⁷ Nọkẹ kẹ Ẹkụkwọ-nsọ dọn ku, “Ọ họdụ ẹkẹrẹ, onyẹ hụn lalanị a bịa — o biekọ.

³⁸ Kanị, okukwe kẹ onyẹ ezi-omumẹ m k'e gi e bi. O seri isi ẹ, ihiẹn ẹ asụọkọ m.”

³⁹ Kanị, ẹnyi arị ndị e seri isi wẹ, gi ẹrịra tuhu, kanị ndị e kwerisọnmẹni d'e ru ni e nwọnhẹn wẹ nzụọpụha.