Hagaị 2 - Ika

Isi Nke Ẹbụọ Ụlọ-nsọ Ọhụnnị Ka Ntịn K'a Ka Ọghọ E Nwọn

¹ Ifọn ohu a ghafegụ, o ru ifọn nke ẹsa, nke akpọhịn ohu kwasị ọgụn rịn'a, Osolobuẹ nọ gi onyẹ-amụma wụ Hagaị ku oku, sị,

² “Gwa nwan gọvanọ ndị Juda wụ Zerubabẹlụ nwa Shiẹtiẹlụ lẹ onyẹ-isi ndị nchụn-ẹjan wụ Joshụa nwa Jehozadakị lẹ ndị hụ họdụ imẹ ndị Juda oku, sị wẹ:

³ ‘Imẹ ụnụ ile họdụ nwan imẹ ndị Juda, onyẹ hụn ọghọ ụlọnị ogẹn mbụ nị wẹ d'e tikpọ a? Nanị k'ọ nọ a nwan ẹnya? Ọ nọnị kẹ sị onwọnni ihiẹn ọ wụ?

⁴ Ka turu kwem, Zerubabẹlụ; ya kẹ Osolobuẹ ku. Onyẹ isi nchụn-ẹjan wụ Joshụa nwa Jehozadakị, turu kwem; ndị alị Juda ile, turu ni kwem. Ya kẹ Osolobuẹ ku. A rụn nị ọrụn hụ, nị m hụ ụnụ azụụn. Ya kẹ Osolobuẹ ihiẹn ile rị okpuru ẹ ku.

⁵ Nọkẹ kẹ m dọn kwe ụnụ nkwa ogẹn ụnụ gi gha alị Ijiptu pụha, echẹn kẹ Mmọn m rịkwọ imẹ igunrun ụnụ. A tụlẹ ni nwan egun.’

⁶ Makẹni, Osolobuẹ ihiẹn ile rị okpuru ẹ rị a sị ụnụ, ‘O biekọ e mẹhunmẹ m igwere lẹ ụwa, mẹhunmẹ ohimin lẹ akpakalị;

⁷ M k'e mẹhunmẹ alị ile rị ichẹn-ichẹn, ihiẹn rị mkpa rị imẹ wẹ a bịa ebeni, e ye m Ụlọnị ọghọ ọhụnma-ọhụnma. Ya kẹ Osolobuẹ ihiẹn ile rị okpuru ẹ ku.

⁸ Siliva wụ nke m; mmẹ nwọnzi goru. Ya kẹ Osolobuẹ ihiẹn ile rị okpuru ẹ ku.

⁹ Ọghọ hụn k'a rị Ụlọnị k'a ka hụn te rị nke mbụ ahụn wẹ tikpọ. Mmẹ wụ Osolobuẹ ihiẹn ile rị okpuru ẹ ku ẹ. M k'e mẹ n'ọ rịnị ụnụ mma ebeni.’ Ya kẹ Osolobuẹ ihiẹn ile rị okpuru ẹ ku.”

Ngọzi K'e Sọn Ihumẹ-isi

¹⁰ Ifọn ẹbụọ a ghafegụ, o ru ụhụọhịn nke ẹnọ kwasị ọgụn imẹ ifọn nke itenẹi imẹ ahụa hụ mẹ ẹbụọ Dariọsụ kịma, Osolobuẹ nọ gi onyẹ-amụma wụ Hagaị kuzi oku, sị:

¹¹ Osolobuẹ ihiẹn ile rị okpuru ẹ sị, “Jụdẹle ni ndị nchụn-ẹjan oku Iwuni:

¹² Omẹni anụ rị nsọ ịhịan bu imẹ ẹwuru o yi e mẹtụ brẹdi mọbụ ofe mọbụ manya mọbụ ofugbọn mọbụ ihiẹn-oriri ọwụlẹ, nị ihiẹn-oriri hụ gi ẹ rị nsọ?” Ya ndị nchụn-ẹjan nọ sị, “Mba.”

¹³ Ya Hagaị nọ sị, “Onyẹ ẹhụ a hụarị ozun, rụ, n'ọ hụatụ ohu imẹ ihiẹn ndị hụ, nị ihiẹn-oriri hụ gi ẹ rụ?” Ndị nchụn-ẹjan nọ za, sị, “Ẹghẹẹ, n'ọ rụghọ.”

¹⁴ Ya kẹ Hagaị nọ sị: Osolobuẹ sị, “Ẹrịra kẹ ndịnị lẹ alịnị rụ nwan ẹnya m; ẹrịra kẹ ọrụn-ẹka wẹ ile rụzị; oyiye ọwụlẹ wẹ e ye rụ arụ.

¹⁵ Ka lemẹ ni nwan ihiẹn k'e mẹni gha tannị jẹnmẹ. “Nị ụnụ d'a tụndọnzimẹ Ụlọ-NSỌ Osolobuẹ,

¹⁶ nanị kẹ ọnọdị ụnụ rị? Ẹlẹ onyẹ bịa ikpọn ọka o betọ hụn te k'e ye ẹ ẹkpa ọgụn, o ye ẹ ẹkpa iri sụọ? Ẹlẹ ịhịan gha a tụ ẹnya nị vaịnị a k'a gba galọnụ manya iri kwasị ọgụnnaị, ọ gba galọnụ ọgụn sụọ?

¹⁷ Mmẹ zi okẹn anwụn, ndundu lẹ ẹkwan-igwere d'e tikpọ ihiẹn ile ụnụ ta afụnfụn rụn; kanị, ụnụ e gin'ẹ hutọ buruhẹ m. Ya kẹ Osolobuẹ ku.

¹⁸ “Ịya kẹ m sịnị nwan ụnụ lemẹ kẹ ihiẹn k'a dọn rị mma gha tannị jẹnmẹ: tannị, ụhụọhịn nke ẹnọ kwasị ọgụn imẹ ifọn nke itenẹi, tannị ụnụ gbegụ iyetọ Ụlọ-NSỌ Osolobuẹ. “Lee ni kẹ ihiẹn ile nọ kikẹnni:

¹⁹ Ihiẹn-ugbo a gụgụọ ọban, ẹlẹ ya? Kẹ vaịnị kẹ figi kẹ pomegraneti kẹ olivu, onwọnzini hụn a mị mkpụrụ, ẹlẹ ya? Kanị m sị ụnụ nị gha tannị jẹnmẹ, m k'a gọzi ụnụ.”

Nkwa Osolobuẹ Kwe Zerubabẹlụ

²⁰ Osolobuẹ gwazị Hagaị oku nke mgbe ẹbụọ ụhụọhịn ohu hụ mẹ ẹ akpọhịn ẹnọ kwasị ọgụn imẹ ifọn nke itenẹi, sị a:

²¹ “Gwa Zerubabẹlụ, gọvanọ alị Juda, sị, ‘M'e d'e mẹhunmẹ elu-igwere lẹ ụwa.

²² M k'e wepụ ndị-nze alị-eze ichẹn-ichẹn ukpo, e tikpọ m ihiẹn ile alị-eze ichẹn-ichẹn gi a kpa ikẹn; m k'e titu ụgbọ-anyịnyan lẹ ndị rị a nyannị wẹ; ẹshin lẹ ndị rị e nyinni wẹ k'a dan, makẹni ndị rị e nyinni wẹ k'e gi ọpịa-agha gbu ibe wẹ.

²³ O ru ogẹn hụ, e gi m yụ wụ odibo m Zerubabẹlụ nwa Shiẹtiẹlụ họnrin ọla m gi e biye ẹka, makẹni a họrịgụọ m'ị. Mmẹ wụ Osolobuẹ ihiẹn ile rị okpuru ẹ e kugụọl'a!’ ”