Ẹzra 9 - Ika

Isi Nke Itenẹi A Gwa Wẹ Ẹzra Nị Ndị Izrẹlụ Rị A Lụ Ndị Alị ọzọ

¹ Hụn ihiẹn ndịnị gihụ mẹgụ, ndị-ndu ndị Ju nọ bịa d'e kunrun m, sị, “Ndị Izrẹlụ ẹnyi edọnmẹkwọnị enwẹn wẹ ichẹn, wẹ lẹ ndị nchụn-ẹjan lẹ ndị Livaị, wẹ rị e sọn ndị alị ndị ọzọ e mẹ arụ wẹ: kẹ ndị Kenaanị kẹ ndị Hẹti kẹ ndị Pẹrẹzi kẹ ndị Jebusu kẹ ndị Amọnụ kẹ ndị Mụabụ kẹ ndị Ijiptu kẹ ndị Amọ.

² A lụrụgụọdẹ wẹ ikpoho wẹ, lụyezikwọ ụmụ wẹ ikẹnnyẹ — gwọgbama ebọnni rị nsọ lẹ alị ndị ọzọ. Hụn kadẹ njọ wụ nị ndị-ndu lẹ ndị gi ọkwa kadẹ e mẹ eje-ihiẹnni.”

³ Ogẹn m gi nụ ihiẹnni, m nọ tika ẹwuru m lẹ ẹkwa m yiye elu ẹ, e huepụ m ntutu m lẹ ẹtu m, nọdị alị, ụya e ru m olu.

⁴ Ya kẹ ndị ile oku Chuku Izrẹlụ mẹtụ nọ nọhunmẹ m, makẹ ọlatọnị ndịnị lụaha ebe wẹ kpụnjẹn wẹ latọ iwu Osolobuẹ. M nọdịhụkwọ ebẹhụ m nọdị d'e ru ogẹn wẹ gi a chụn ẹjan ẹnyasị makẹni ụya ru m olu.

Ekpere Ẹzra Mẹ

⁵ O ru ogẹn wẹ gi a chụn ẹjan ẹnyasị, m nọ gha ebẹhụ m bu enwẹn m gbama alị lihi, mmẹ lẹ nkanka ẹkwa ndị hụ m dọkaye enwẹn m olu; m nọ gbu osekpu, shịapụ ẹka m ẹbụbụọ zinmẹ Osolobuẹ wụ Chuku m,

⁶ mẹ ekpere, sị, “Euu Chuku m, ifẹnrẹn lẹ ịfanị anịnị m bu ihun zinmẹ i, Chuku m, makẹni njọ ẹnyi mẹ ejẹnnahịngụọ isi ẹnyi enu, ikpe manị ẹnyi e rugụọdẹ elu-igwere!

⁷ Gha ogẹn ndị nẹdi ẹnyi wẹ d'e ru tannị ikpe eje-ihiẹn ẹnyi rị e mẹ hụ a ma ẹnyi ọda-ọda. Njọ ẹnyi haịn agha gi e gbu ẹnyi lẹ ndị-nze ẹnyi lẹ ndị nchụn-ẹjan ẹnyi; ịya haịn wẹ gi a nwụnrụn ẹnyi, a kwarị ihiẹn ẹnyi, ẹnyi hụ e ri ụya ẹka ndị-nze alị ndị ọzọ k'o dọn nwan rị tannị.

⁸ “Kanị, Osolobuẹ wụ Chuku ẹnyi e mẹgụọnị ẹnyi nwan ọhụnma ẹkẹrẹ: ebe ọ nọ nị ẹnyi họdụ, mẹ ẹnyi gba mkpọgụn alị ọhụnma-ọhụnma imẹ Ụlọ-nsọ a. Wẹ ile kẹ Chuku ẹnyi gi ye ẹnya ẹnyi ukpẹ legha, mẹ ẹnyi zu ikẹn ẹkẹrẹ imẹ igbọn ẹnyi rị.

⁹ Ọsụọn'a nị ẹnyi wụ igbọn okpuru ndị alị ọzọ, Chuku ẹnyi a lanị ẹnyi tọ ẹgbụn ẹnyi rị imẹ ẹ. O mẹgụọnị ẹnyi ọhụnma ihun ndị-nze Pẹshịa, gi wẹ mẹ ndụn banzị ẹnyi, kẹni ẹnyi tụndọnzi Ụlọ Chuku ẹnyi, tụnkinsọnmẹ ebe tikpọnị imẹ ẹ; ọ hụ e che ẹnyi nche imẹ Judia ile lẹ imẹ Jerusalẹm ebeni.

¹⁰ “Euu Chuku ẹnyi, kịnị kẹ ẹnyi k'e kuzi nwan?! Ẹnyi a gbakitọzị nwan oku i azụụn —

¹¹ iwu hụn ị gi ndị idibo i ndị-amụma ye ẹnyi, sị, ‘Alị hụ ụnụ bankọ d'e weri rụ arụ, makẹni ndị bin'ẹ e mẹ ụrụ rị ichẹn; e gigụọ wẹ ihiẹn ile rị ichẹn m'a sọ kpọn ụrụ jun ẹ gha gba ẹbamịn d'e ru ẹbamịn.

¹² Ufiri ẹ, eyekwọlẹ ni ụmụ ụnụ lụrụ mọbụ nị ụmụ ụnụ lụrụ ụmụ wẹ, achọkwọlẹni Ọrịrịmma wẹ — kẹni ụnụ rị ikẹn, hụn ụzọ ri ihiẹn rị mma rị alị hụ, hụn ụzọ gi ẹ họnrin ukuu ụnụ latọnị ụmụ ụnụ jẹnrin ejẹn.’

¹³ Ọsụọn'a nwan nị eje-ihiẹn ẹnyi mẹ lẹ okẹn ikpe ile manị ẹnyi e buhẹgụọnị ẹnyi nsọngbu ndịnị ile, afụnfụn yụ wụ Chuku ye ẹnyi eruni njọ ẹnyi mẹ; y'a nịdẹ nwan ẹnyi họdụhan ẹnịna.

¹⁴ “Nị ẹnyi pamazị nwan oku i, sọn ndịnị ihiẹn ndịnị y'a sọ lụtarịma di-lẹ-nwunyẹ? O runi nwan hụn y'e gi gi olulu sọn ẹnyi, gbuchanrịn ẹnyi ile, onwọnkọzị onyẹ k'a họdụ mọbụ bikin ugbẹ ẹnyi?

¹⁵ Heuu Osolobuẹ, Chuku Izrẹlụ, onyẹ rị ọchan k'ị wụ! Ẹnyi họdụ nwan ẹkẹrẹ sụọ tannị; ẹnyi rị nwan ihun a rịọ ị, ẹnyi lẹ njọ ẹnyi — ọsụọn'a nị onwọnni onyẹ rị imẹ furu hụn e wuzo ihun i.”