Ẹzra 10 - Ika

Isi Nke Iri Ndị Izrẹlụ E Ku Ẹ Nị Wẹ E Mẹọlẹ Njọ

¹ Hụn ahụn Ẹzra rị ebẹhụ e mẹ ekpere, a sị “Osolobuẹ, ẹnyi e mẹọlẹ njọ”, a kwan, e we enwẹn ẹ e gbe alị ihun Ụlọ Chuku, ndị Izrẹlụ bugbu enwẹn wẹ ọda nọ gbakikomẹmẹ, fihunmẹ ẹ — kẹ ikẹnnyẹ kẹ ikpoho kẹ ụmụ-ẹka. Wẹ nwẹn hụzị a kwan ẹkwan ọda-ọda.

² Ya Shẹkania nwa Jehiẹlụ, onyẹ ikpụlọ Ẹlam nọ sị Ẹzra, “Ẹnyi a paọlẹ oku Chuku ẹnyi nke-esi ebe ẹnyi nọ lụrụ ikpoho ndị alị ọzọ fihunmẹni ẹnyi. Kanị, n'ọ rịghọnị Izrẹlụ mma.

³ Nị ẹnyi kwerigbama nwan kwe nkwa ihun Chuku ẹnyi, nị ẹnyi k'a chụpụchanrịn ikpoho ndịnị lẹ ụmụ wẹ kẹ yụ wụ di-nwọnni m lẹ ndị a gbaye oku Chuku ẹnyi dọn ku; nị ẹnyi m'ẹ kẹ Iwu dọn ku.

⁴ Lihi ọtọ; okuni rị ị ẹka; ẹnyi jẹnkọ d'a nọye i azụụn. Kwọndọn nwan obi i n'i mẹ ẹ.”

⁵ Ya kẹ Ẹzra nọ lihi ọtọ; ọ nọ mẹ ndị-ndu ndị nchụn-ẹjan lẹ ndị Livaị lẹ ndị Izrẹlụ ile kun ẹfan Osolobuẹ nị wẹ k'e mẹ ihiẹn ahụn Shẹkania ku. Ya wẹ nọ kun ẹ.

A Chụpụ Wẹ Ikpoho Alị ọzọ Wẹ Lụrụ Lẹ Ụmụ Wẹ

⁶ Ẹzra nọ nwan gha ihun Ụlọ Chuku ebẹhụ pụ, shi mmughẹ Jehohananị nwa Ẹliashibu. Hụn ahụn ọ rị mmughẹ ebẹhụ, o rini, ọ ranị — makẹni echẹn kẹ ọ rị a kwan makẹ njọ ahụn ndị Izrẹlụ lụaha ebe wẹ kpụnjẹnsọnmẹ wẹ.

⁷ Wẹ nọ hị imẹ Juda ile lẹ Jerusalẹm ile, sị ndị ile wẹ kpụnjẹn alị ọzọ lụahanị wẹ zu imẹ Jerusalẹm —

⁸ nị onyẹ bịalẹni d'e ru akp'ọhịn ẹtọ a napụ w'a ukuu ẹ — nị ịya kẹ ndị-isi lẹ ndị-ichẹn ku, a chụpụ w'a imẹ igunrun ndị Juda lụaha ebe wẹ kpụnjẹn wẹ.

⁹ O gini d'e ru akpọhịn ẹtọ hụ, ikẹnnyẹ Juda lẹ Bẹnjamini ile nọ zu imẹ Jerusalẹm. Nke akpọhịn ọgụn imẹ ifọn nke itenẹi, wẹ ile nọ nọdị alị ebẹhụ shịanị, ihun Ụlọ Chuku, ẹhụ hụ a ma wẹ nni makẹ ihiẹn wẹ bịanị lẹ mirin rị e zueni.

¹⁰ Ẹzra onyẹ nchụn-ẹjan nọ lihi ọtọ, sị wẹ, “Ụnụ e mẹọlẹ njọ; ụnụ a lụrụgụọ ikpoho alị ọzọ, mẹ ikpe makẹnmẹ Izrẹlụ.

¹¹ Gwa nị nwan Osolobuẹ wụ Chuku ndị nẹdi ụnụ nị ụnụ e mẹọlẹ njọ, ụnụ e mẹmẹ uche ẹ. Wepụha nị nwan enwẹn ọnụ imẹ ndị alị ọzọ ndịnị fihunmẹni ụnụ lẹ ikpoho alị ọzọ ndị ahụn ụnụ lụrụ.”

¹² Ya igunrun ahụn ile nọ weshi olu elu, sị, “Ezioku rọ! Ẹnyi k'e mẹrịrị ihiẹn i ku!

¹³ Kanị ndị rị ebeni bu ọda, bụ udu-mirin rọ; ẹnyi asakọ ẹka wuzo ezi. Ẹlẹdẹ ọhụn sụọ, okuni ẹlẹ hụn wẹ gi akpọhịn ohu mọbụ ẹbụọ e ku, makẹni ẹnyi bu ọda hụn mẹ okẹn njọnị.

¹⁴ Ndị-isi ẹnyi wẹ nọkin nwan ẹnya ẹnyi ile: a kaye wẹ ogẹn ndị ile rị obodo ẹnyi rị ichẹn-ichẹn hụn lụ ikpoho alị ọzọ e gi bịa — uwẹ lẹ ndị-ichẹn lẹ ndị e dọnzi oku imẹ obodo ọwụlẹ, d'e runi Chuku ẹnyi wepụ okẹn-oluluni o gi rị e sọn ẹnyi.”

¹⁵ Jonatanị nwa Asahẹlụ lẹ Jazeya nwa Tikva sụọ kwadọnlẹni ihiẹnni, Mẹshulam lẹ Shabẹtaị onyẹ Livaị a nọye wẹ azụụn.

¹⁶ Ya ndị Izrẹlụ ile hụ gha alị wẹ kpụnjẹn wẹ lụa nọ mẹ kẹ wẹ dọn ku. Ẹzra onyẹ nchụn-ẹjan nọ họrịsọnmẹ ikẹnnyẹ wụ ndị-isi ikpụlọ: ikpụlọ ohu, onyẹ-ohu; wẹ kpọsọnmẹ wẹ ile ẹfan họpụha wẹ. Ụhụọhịn ibuzọ imẹ ifọn nke iri, wẹ nọ nọdị alị leban oku ahụn ẹnya,

¹⁷ ụhụọhịn ibuzọ imẹ ifọn ibuzọ, e lebanchanrịngụọ wẹ oku ikẹnnyẹ ile hụn lụrụ ikpoho ndị alị ọzọ ẹnya.

Ndị Dan Iwu Lụrụ Ikpoho Alị Ọzọ Ndị Nchụn-ẹjan Rịn'a

¹⁸ Imẹ ẹbozo ndị nchụn-ẹjan, ndịnị wụ ndị hụn lụrụ ikpoho alị ọzọ: Ndị ikpụlọ Jeshụa nwa Jozadakị lẹ umunẹ ẹ rịn'a wụ Maaseya, Ẹliẹza, Jaribu lẹ Gẹdalia.

¹⁹ (E biye wẹ ẹka nị wẹ jẹnkọ d'a chụpụ inyẹnmẹ wẹ ndị hụ wụ ndị alị ọzọ, wẹ nọ gi ebulu chụn ẹjan makẹ ikpe hụn manị wẹ.)

²⁰ Ndị ikpụlọ Ima rịn'a wụ Hanani lẹ Zẹbadịa.

²¹ Ndị ikpụlọ Harim rịn'a wụ Maaseya, Ẹlaịja, Shẹmaya, Jehiẹlụ lẹ Uzịa.

²² Ndị ikpụlọ Pashuru rịn'a wụ Ẹlionaị, Maaseya, Ishmẹlụ, Natanẹlụ, Jozabadị lẹ Ẹlasa.

Ndị Livaị Rịn'a

²³ Ndị Livaị rịn'a wụ Jozabadị, Shimei, Kelaya (hụn wụzị Kelita), Pẹtahia, Juda lẹ Ẹliẹza.

²⁴ Imẹ ndị ọk'ẹbụ, onyẹ rịn'a wụ Ẹliashibu. Ndị nche ọnụ-mgbọn rịn'a wụ Shalum, Tẹlẹm lẹ Uri.

Ndị Mmaka Rịn'a

²⁵ Ndịnị wụ ndị Izrẹlụ mmaka hụn lụrụ ikpoho ndị alị ọzọ: Ndị ikpụlọ Parọshị rịn'a wụ Ramia, Izia, Mal'kija, Mijamini, Ẹliẹza, Makija lẹ Bẹnaya.

²⁶ Ndị ikpụlọ Ẹlam rịn'a wụ Matania, Zẹkaraya, Jehiẹlụ, Abdi, Jẹremọtụ lẹ Ẹlaịja.

²⁷ Ndị ikpụlọ Zatu rịn'a wụ Ẹlionaị, Ẹliashibu, Matania, Jẹremọtụ, Zabadị lẹ Aziza.

²⁸ Ndị ikpụlọ Bebaị rịn'a wụ Jehohananị, Hanania, Zabaị lẹ Atlaị.

²⁹ Ndị ikpụlọ Bani rịn'a wụ Mẹshulam, Maluku, Adaya, Jashubu, Shialụ lẹ Jẹremọtụ.

³⁰ Ndị ikpụlọ Pahatị-Mụabụ rịn'a wụ Adna, Kẹlalụ, Bẹnaya, Maaseya, Matania, Bẹzalẹlụ, Binui lẹ Manasẹ.

³¹ Ndị ikpụlọ Harim rịn'a wụ Ẹliẹza, Ishija, Mal'kija, Shẹmaya, Shimiọnụ,

³² Bẹnjamini, Maluku lẹ Shẹmarịa.

³³ Ndị ikpụlọ Hashum rịn'a wụ Matenaị, Matata, Zabadị, Ẹlifẹlẹti, Jerimaị, Manasẹ lẹ Shimei.

³⁴ Ndị ikpụlọ Bani rịn'a wụ Maadaị, Amram, Yuẹlụ,

³⁵ Bẹnaya, Bedeya, Keluhi,

³⁶ Vanịa, Meremọtụ, Ẹliashibu,

³⁷ Matania, Matenaị lẹ Jasu.

³⁸ Ndị ikpụlọ Binui rịn'a wụ Shimei,

³⁹ Shẹlẹmia, Natanị, Adaya,

⁴⁰ Mak'nadẹbaị, Shashaị, Sharaị,

⁴¹ Azarẹlụ, Shẹlẹmia, Shẹmarịa,

⁴² Shalum, Amaria lẹ Josẹfụ.

⁴³ Ndị ikpụlọ Nebo rịn'a wụ Jẹyẹlụ, Matitịa, Zabadị, Zẹbina, Jaddaị, Juwẹlụ lẹ Bẹnaya.

⁴⁴ Ndịnị ile lụrụ ikpoho alị ọzọ — o nwọnghọdẹ ndị ikpoho ndịnị mụgụ ụmụ.