Ẹsta 9 - Ika

Isi Nke Itenẹi Ndị Ju E Mẹri Ndị-iṅẹnrẹn Wẹ

¹ O ru nke akp'ọhịn mmẹtọ hụ imẹ ọnwan nke mmẹbụọ hụ wụ ọnwan Ada, hụn wẹ k'e gi mẹzu iwu hụ eze bu ụzọ ti, ụhụọhịn ahụn, ndị-iṅẹnrẹn ndị Ju te bu ẹ obi nị wẹ k'e mẹri ndị Ju, ihiẹn aghazịnị kẹ wẹ dọn ro ẹ, ẹka ndị Ju nọ karị nke ndị-iṅẹnrẹn wẹ.

² Ụhụọhịn ahụn, ndị Ju zugbama imẹ obodo ichẹn-ichẹn wẹ bi imẹ Azụụn ile rị okpuru Eze wụ Ahazẹrusu, kẹni wẹ maye ndị chọ nị wẹ tikpọ wẹ ọgụn. Onwọnni onyẹ s'ẹka che wẹ ọgụn, makẹni egun wẹ rị a tụ ndị alị ndị ọzọ ile.

³ Ndị-isi Azụụn ile, ndị ile a nọkin ẹnya eze, ndị gọvanọ lẹ ndị e lepụnị eze ẹnya nọ yeni ndị Ju ẹka makẹni egun Mọdikaya rị a tụ wẹ.

⁴ Makẹni okẹn-ịhịan kẹ Mọdikaya wụ nwan imẹ obi-eze; ẹfan a a kpọgbarị Azụụn ile, wẹ hụ e giwaye nke ẹ e dọn.

⁵ Ndị Ju nọ gi ọpịa-agha gbuchanrịn ndị-iṅẹnrẹn wẹ ile la iwi, gi ndị iwe wẹ rị e we mẹ ihiẹn sụọnị wẹ.

⁶ Mmadụ ọgụn-isẹn kwasị nnụ (500) kẹ ndị Ju gbu imẹ isi-alị wụ obodo Susa.

⁷ E gbuzi wẹ Pashandata, Dafonu, Aspata,

⁸ Porata, Adalịa, Aridata,

⁹ Pamashita, Arisaị, Aridaị lẹ Vaịzata,

¹⁰ ikẹnnyẹ iri Hamanị nwa Hamẹdata eṅẹnrẹn ndị Ju mụ. Kanị emẹtụnị wẹ ihiẹn wẹ ẹka.

¹¹ Ụhụọhịn ahụn zịkwọ kẹ wẹ gwa eze mmadụ ole ndị Ju gbu imẹ isi-alị wụ Susa.

¹² Eze nọ sị Alasị a wụ Ẹsta, “Ndị Ju e gbugụọ mmadụ ọgụn-isẹn kwasị nnụ (500) imẹ Susa ebeni lẹzi ikẹnnyẹ iri Hamanị mụ, ọrịwụzị imẹ Azụụn ndị ọzọ rịsọnmẹ okpuru m? K'ị rị nwan a rịọ? M k'e ye y'ẹ. K'ị chọ? M k'e mẹzikwọn'ị ya.”

¹³ Ẹsta nọ sị a, “Omẹni ọ sụọghọ ị, Agụ, hapụ ndị Ju rị Susa nị wẹ mẹzi ihiẹnni wẹ mẹ tannị ekile; yezikwọ iwu nị wẹ kọn ozun ụmụ Hamanị iri hụ ye ihiẹn wẹ gi e hogbu ịhịan.”

¹⁴ Eze nọ sị wẹ mẹ ihiẹn Ẹsta ku. Wẹ nọ ti iwu imẹ obodo Susa, wẹ nọ kọn ozun ụmụ Hamanị iri hụ ye ihiẹn wẹ gi e hogbu ịhịan.

¹⁵ Nke akp'ọkịn mmẹnọ imẹ ọnwan Ada, ndị Ju rị Susa nọ zu, gbuzi mmadụ ọgụn-mmisẹn (300) imẹ Susa cheni ndị wẹ gbu mbụ. Kanị emẹtụzịkwọnị wẹ ihiẹn wẹ ẹka.

¹⁶ Ogẹn hụ, ndị Ju họdụsọnmẹ Azụụn ndị ọzọ eze rị a kị e zugụọzị kẹni wẹ zụọrị isi wẹ, zu ikẹn ndị-iṅẹnrẹn wẹ. Mmadụ nnụ-uku mmisẹn kwasị ọgụn ẹtọ (75,000) kẹ wẹ gbu imẹ ndị rị e we iwe wẹ, kanị akwarịzịkwọnị wẹ ihiẹn wẹ.

¹⁷ Nke akpọhịn mmẹtọ hụ imẹ ọnwan Ada kẹ ihiẹnni mẹ. Eki e fọn nke akpọhịn mmẹnọ, wẹ nọ zu ikẹn, gi ẹ họnrin ụhụọhịn oriri lẹ ẹfọ-ọsụsụọ.

¹⁸ Kanị nke akpọhịn mmẹtọ lẹ mmẹnọ kẹ ndị Ju rị imẹ Susa gi lụ ọgụn nke wẹ, gi nke akp'ọhịn mmisẹn rịn'a họnrin ụhụọhịn oriri lẹ ẹfọ-ọsụsụọ.

¹⁹ Ịya haịn ndị Ju ndị rị alị-ọfịa gi gi ụhụọhịn nke mmẹnọ imẹ ọnwan Ada họnrin ụhụọhịn ẹfọ-ọsụsụọ lẹ oriri, ụhụọhịn wẹ gi e ye ibe wẹ ihiẹn.

Mọdikaya E Tumẹ Mmẹmmẹ Purim

²⁰ Mọdikaya detu ihiẹn ndịnị mẹni, de ẹkụkwọ-ozi zijẹnsọnmẹni ndị Ju ile rị Azụụn ichẹn-ichẹn Eze wụ Ahazẹrusu rị a kị — kẹ ndị rị ebe teni kẹ ndị rị ẹhụ nsue,

²¹ sị wẹ e gi nke akp'ọhịn mmẹnọ lẹ mmisẹn imẹ ọnwan Ada e mẹ mmẹmmẹ ahụa-ahụa,

²² e gi ẹ a nyanhan ogẹn ndị Ju gi nwọnrin enwẹn wẹ ẹka ndị-iṅẹnrẹn wẹ, ifọn wẹ nọ kwanbehi ẹkwan ghọghọma, ribehi ụya, rimẹ oriri. O dejẹnni wẹ, sị w'e gi ụhụọhịn ndị hụ e ri oriri, e nwọn ẹfọ-ọsụsụọ, e bujẹnni ibe wẹ ihiẹn-oriri, e ye ndị-igbẹnnyẹ ihiẹn.

²³ Ịya kẹ ndị Ju nọ kweri, rimẹ oriri hụ wẹ bidọngụ, e mẹ ihiẹn Mọdikaya ku imẹ ẹkụkwọ hụ o dejẹnni wẹ.

²⁴ Makẹni Hamanị nwa Hamẹdata onyẹ Agagị hụn wụ eṅẹnrẹn ndị Ju ile te tụ iroro w'e gi tikpọ wẹ, nyannị wẹ utẹn wụ Puri kẹni o gbu wẹ la iwi.

²⁵ Kanị, mgbe Ẹsta gi jẹnburu eze, eze nọ ti iwu, detu ẹ, sị wẹ hụn a nị eje-ihiẹn ahụn Hamanị romẹni ndị Ju nọ isi ẹ bi, sịzịkwọ wẹ hogbu Hamanị, kọn ẹhụ ụmụ a ikẹnnyẹ ye ihiẹn wẹ gi e hogbu ịhịan.

²⁶ (Ịya haịn akp'ọhịn ẹbụọ ndị hụ gi a za Purim.) Ufiri ihiẹn ile Mọdikaya deni wẹ imẹ ẹkụkwọ-ozini lẹ ihiẹn ẹnya hụn wẹ lẹ ihiẹn mẹni wẹ,

²⁷ ndị Ju nọ tumẹrin akpọhịn ẹbụọnị imẹ ahụa ile nị wẹ lẹ ụmụ wẹ lẹ ndị ile k'a rị a banyeni wẹ k'e girịrị ẹ e mẹ omẹnalị Purim kẹ wẹ dọn gwa wẹ lẹ ogẹn wẹ tumẹn'ẹ.

²⁸ Ikpụlọ ọwụlẹ sikọ d'a gha a nyanhanrịrị akpọhịn ẹbụọnị, e gi wẹ e mẹ omẹnalị rịn'a agbọ ọwụlẹ, imẹ Azụụn ile lẹ imẹ obodo ile. Ndị Ju emẹbehikọ mmẹmmẹ akp'ọhịn ẹbụbụọnị wụ Purim, onwọnzikwọnị ogẹn ẹbozo wẹ e gi nị mmẹmmẹni la.

²⁹ Alasị wụ Ẹsta nwa Abihailu lẹ Mọdikaya onyẹ Ju nọzị gi ikẹn wẹ lẹ ọkwa wẹ ile kwadọn ẹkụkwọ-ozi nke ẹbụọnị wẹ de banyeni Mmẹmmẹ Purim.

³⁰ Mọdikaya nkẹ nọ de ẹkụkwọ-ozi zijẹnsọnmẹni ndị Ju ile rị Azụụn ẹsa kwasị ọgụn-isin rị alị-eze Ahazẹrusu, gi kele wẹ, kasị wẹ obi,

³¹ sị wẹ dọnmẹ ụhụọhịn Purim ndị hụ ogẹn wẹ tumẹn'ẹ, nọkẹ kẹ Mọdikaya lẹ Alasị wụ Ẹsta dọn tini wẹ iwu ẹ, lẹzi kẹ wẹ ile dọn ku ni wẹ lẹ ẹbozo wẹ k'a gha e mẹ banyeni ogẹn ichẹn-ichẹn wẹ tumẹsọnmẹ makẹ ibu-ọnụ lẹ ịkwan-ẹkwan.

³² Iwu hụn Ẹsta nkẹ ti a kwadọnzịghọ iwu ndịnị gbashịarị Purim, wẹ nọ detu wẹ ebe w'e detọ ihiẹn.