Emọsụ 3 - Ika

Isi Nke Ẹtọ Njọ Izrẹlụ lẹ Afụnfụn Wẹ K'a Ta

¹ Ndị Izrẹlụ, nụ nị ihiẹn Osolobuẹ sị nị ịya kẹ ụnụ mẹ, “Ihiẹn alị Izrẹlụ ile m gha alị Ijiptu wepụha mẹ hụn rị e ze m ize:

² Imẹ alị ile rị elu ụwa ụnụ sụọ kẹ m họrị; m sikọ nwan d'e yerịrị ụnụ afụnfụn makẹ njọ ile ụnụ mẹ.”

³ Nị madụ ẹbụọ sa ẹka jẹngbama ijẹn bụ ekutọnị wẹ ebe wẹ jẹnkọ?

⁴ Nị ẹwọrọ dẹn imẹ ẹgboko bụ onwọnni anụ ọ hụn? Nị nwa-ẹwọrọ gha ebe o bi yi oro omẹni onwọnni ihiẹn o nwụndọn?

⁵ Nị nnụnụ dan ọnyan omẹni onwọnni ọnyan wẹ shitọn'a? Nị ọnyan tifie omẹni onwọnni ihiẹn dann'a?

⁶ Nị wẹ gbu opi-agha imẹ obodo egun atụnị ndị rịn'a? Nị eje-ihiẹn kunrun obodo omẹni ẹlẹ Osolobuẹ mẹ ẹ?!

⁷ Ezioku-ezioku, Di-nwọnni-ẹnyi wụ Osolobuẹ ara mẹ ihiẹn-anaị bụ ọ ghọsịgụnị idibo ẹ ndị-amụma ihiẹn o bu obi.

⁸ Ẹwọrọ e dẹngụọ; onyẹ kẹ egun jẹnkọlẹni d'a tụ?! Di-nwọnni-ẹnyi wụ Osolobuẹ e kuọlẹ oku; onyẹ jẹnkọlẹni d'e bu amụma gwa wẹ ihiẹn o ku?!

⁹ D'a gwa nị wẹ ya ebe ile rị mkpa imẹ Ash'dọdụ alị Filistia; gwazịkwọnị wẹ ya ebe ile rị mkpa imẹ Ijiptu: sị nị wẹ, “Gbakikomẹ ni elu Ugu Sameria, nị ụnụ hụn okẹn isusu rị imẹ ẹ, hụnzị mmẹgbu rị imẹ ẹ!”

¹⁰ Osolobuẹ sị: “Ama wẹ mẹ ihiẹn rị mma, ihiẹn junsọnmẹ okẹn ụlọ wẹ gichanrịn egbu-lẹ-egbu lẹ ohin bịa.”

¹¹ Ufiri ẹ, Di-nwọnni-ẹnyi wụ Osolobuẹ sị, “Eṅẹnrẹn sikọ d'e fihunmẹ alịnị, gbukpọchanrịn ihiẹn ile ụnụ gi e che ẹhụ, kpọnchanpụ ihiẹn ile ụnụ kpọnjun ụlọ uku ụnụ ndị ahụn.”

¹² Osolobuẹ sịzị: “Ụkụ atụnrụn ẹbụọ sụọ mọbụ mkpikpi ntịn kẹ onyẹ e du anụ a saẹka a napụha ẹwọrọ. Ẹrịra kẹ wẹ k'a zụọpụha ndị wẹ k'a zụọpụha imẹ ndị Izrẹlụ bi Sameria, ibe bẹdi lẹ ibe oche sụọ k'a họdụnị wẹ.

¹³ “Di-nwọnni-ẹnyi wụ Osolobuẹ, Chuku ihiẹn ile rị okpuru ẹ, sị: Nụ nị ihiẹnni, gi ẹ gwa ikpụlọ Jekọpụ, ihiẹn m jẹnkọ d'e mẹ wẹ:

¹⁴ Nị ụhụọhịn ahụn m k'e ye Izrẹlụ Ẹbamịn-ugu afụnfụn njọ ndị wẹ rị e mẹ, m jẹnkọ d'e mẹ ẹ ru ukpo mmọn rịsọnmẹ Bẹtẹlụ: wẹ k'e bepụsọnmẹ mpịn ukpo mmọn, a dantọ wẹ alị.

¹⁵ M k'e tikpọ ụlọ ọma wẹ ile, kẹ ụlọ oyi kẹ ụlọ uwowo; ndị ahụn wẹ gi ihiẹn eze-enyi tụn jẹnkọ d'a la iwi; okẹn ụlọ wẹ rị ichẹn-ichẹn arịkọzị. Osolobuẹ e kugụọ a.”