Ẹbụ-ọma 95 - Ika

Isi Nke Mmisẹn Kwasị Ọgụn-ẹnọ Ẹbụ Ịja-mma

¹ Bịa nị, nị ẹnyi bụnị Osolobuẹ ẹbụ! Nị ẹnyi gi ni ịghọghọ yini Okẹn-ọmụma ahụn a zụọpụhanị ẹnyi oro!

² Nị ẹnyi gi ni nkpanmịn bịa d'e kunrun ẹ; nị ẹnyi weshi olu elu bụn'a ẹbụ.

³ Makẹni, Chuku hi-ogbe kẹ Osolobuẹ wụ, Eze uku hụn kachanrịn mmọn ile!

⁴ Ebe ile migbu enwẹn ẹ rị elu-ụwa rị a ẹka; mkpọnụnụ ugu ile wụzịkwọ nke ẹ.

⁵ Ohimin wụ nke ẹ, makẹni ịya ke ẹ; ịya kezikwọ akpakalị.

⁶ Bịa nị nị ẹnyi kpọ isi alị fe ẹ; nị ẹnyi gbuni ni Osolobuẹ keni ẹnyi osekpu!

⁷ Makẹni, ịya wụ Chuku ẹnyi; ẹnyi wụ ndị ọ rị a zụn, atụnrụn ndị hụn ọ rị e du. Ụnụ nụ olu ẹ tannị,

⁸ agbakwọlẹ ni isi-akwanran kẹ ụnụ dọn mẹ imẹ Mẹriba, kẹ ụnụ dọn mẹ ụhụọhịn ahụn imẹ Masa hụn rị imẹ atụ —

⁹ ebẹhụ ndị nẹdi ụnụ nọ nwan m, chọma ihiẹn rị m ọnụ, ọsụọn'a nị a hụnchanrịngụọ wẹ ihiẹn m rụn.

¹⁰ Ize agbọ ahụn nọ ze m ọrọgbọ ahụa ọgụnnaị, m nọ sị, “Ndịnị e nwọnkẹ obi-ẹbụọ; w'e ke marịnkwọ kẹ m'e mẹ.”

¹¹ M nọ gi iwe kun enwẹn m, sị, “Abanyekọ wẹ d'e zu ikẹn hụ m kwe nkwa a.”