Ẹbụ-ọma 85 - Ika

Isi Nke Isẹn Kwasị Ọgụn Ẹnọ Dodo Osolobuẹ, Gọzi Alị Ẹnyi

Ye onyẹ-ndu ẹbụ ẹbụnị. Ẹbụ ụmụ Kora rọ. Ẹbụ wẹ dọnye edọnye rọ.

¹ Euu Osolobuẹ, y'e mẹkẹni alị ị ọhụnma mbụ; y'e mẹghọ n'ọ rịzịnị ụmụ Jekọpụ mma.

² Y'a gbagharịghọ ndị nke i njọ, kpumẹchanrịn njọ ile wẹ mẹ. Sẹla

³ Ị nọ bubehini wẹ olulu, latọ okẹn ọnụma i te gi sọn wẹ.

⁴ Dodo, mẹzi nwan n'ọ rịnị ẹnyi mma, Chuku hụn a zụọpụhanị ẹnyi; dodo, webehini ẹnyi iwe!

⁵ N'i wesọnmẹni ẹnyi iwe jẹnrin ejẹn? N'i gi iwe sọn ẹnyi gha agbọ ru agbọ?

⁶ Y'e hutọkọ obi mẹ ndụn banzị ẹnyi, kẹni ẹnyi ndị nke i gi ufiri i ghọghọma?

⁷ Dodo Osolobuẹ, ghọsịzị ẹnyi ihiẹn-ọsụsụọ kẹ ndị nke i, zụọpụhazị ẹnyi k'i dọn e mẹ.

⁸ M jẹnkọ d'e gọn ntịn, nị m nụ ihiẹn Chuku wụ Osolobuẹ k'e ku, makẹni o k'e ku ndụn ye ndị nke ẹ, ndị nsọ a, obi — ka wẹ ezuzumẹzilẹ.

⁹ Ẹghẹẹ, o biekọ d'a zụọ ndị e fen'ẹ, kẹni alị ẹnyi nwọnmẹzi ọghọ a.

¹⁰ Ihiẹn-ọsụsụọ lẹ ezioku e kunrun; Ezi-omumẹ lẹ Ọrịrịmma e dide.

¹¹ Ihiẹn wẹ gi e dọn ẹnya e pumẹ alị; ihiẹn rị mma a gha elu-igwere bịa.

¹² Ẹghẹẹ, Osolobuẹ k'e ye ẹnyi ihiẹn rị mma; alị ẹnyi e mẹmẹ ihiẹn-ugbo ọhụnma-ọhụnma.

¹³ Ọrụn-ọma a k'e burun'ẹ ụzọ, kwan'a ụzọ o k'a gha.