Ẹbụ-ọma 84 - Ika

Isi Nke Ẹnọ Kwasị Ọgụn Ẹnọ Ụlọ Osolobuẹ A Daka M

Ye onyẹ-ndu ẹbụ ẹbụnị. Wẹ bụ a nọkẹ nke Gititi. Ẹbụ-ọma itu ụmụ Kora rọ.

¹ Ụlọ ị a rịka mma, Osolobuẹ ihiẹn ile rị okpuru ẹ!

² Ọ hụ a da m, a da m ọda-ọda, nị m banye ezi-ọgwa Osolobuẹ! Kẹ obi m kẹ ẹhụ m rị a bụnị Chuku rị ndụn ẹbụ ịghọghọ!

³ Nnụnụ a kụdẹ ẹkụ ebẹhụ: achụ a kụghọdẹ ẹkụ a mụye ụmụ ebẹhụ, ẹhụ ukpo nchụn-ẹjan ị, ịyụ, Osolobuẹ ihiẹn ile rị okpuru ẹ, Eze m lẹ Chuku m.

⁴ Ngọzi wụ nke ndị bi Ụlọ-nsọ ị, a ja ị mma ogẹn ile! Sẹla

⁵ Ndị gi ikẹn i e bi e nwọnkẹ ngọzi, ndị hụn obi wẹ rị ụzọ Ụlọ ị ogẹn ile.

⁶ Wẹ ghakọnị Ọdanmgbugbu Baka, e mẹ wẹ ẹ wụrụ ebe isi-mirin jun; ngọzi wụ mirin ahụa e jun ẹ.

⁷ Wẹ k'a rị e nwọnwaye ikẹn, e we wẹ ru ihun Chuku imẹ Zayọnụ.

⁸ Dodo Osolobuẹ, Chuku ihiẹn ile rị okpuru ẹ, za m ekpere! Chuku Jekọpụ, dodo gọn m ntịn! Sẹla

⁹ Chuku dodo, gi ẹnya rị mma lee akpaịn ẹnyi, eze ẹnyi; dodo lee onyẹ ahụn i te udẹn i tumẹ ẹnya ihun.

¹⁰ Akpọhịn ohu ezi-ọgwa ị ka mma karị akpọhịn nnụ-uku ebe ọzọ; iwuzo ọnụmụzọ Ụlọ Chuku m ka mma karị ibi ụlọ ndị wẹ nọ e mẹ eje-ihiẹn.

¹¹ Makẹni, Osolobuẹ wụ Chuku ẹnyi wụ ẹnyanwụn lẹ akpaịn, ara gi ihiẹn ọwụlẹ rị mma jọ ndị obibi wẹ kụrụ ọtọ ẹfọ.

¹² Osolobuẹ ihiẹn ile rị okpuru ẹ, ndị ile gi i dọn ẹnya e nwọnkẹ ngọzi!