Ẹbụ-ọma 81 - Ika

Isi Nke Ohu Kwasị Ọgụn-ẹnọ Ẹbụ Mmẹmmẹ

Wẹ ye onyẹ-ndu ẹbụ ẹbụnị. Wẹ bụ a nọkẹ nke Gititi. Nke Asafụ rọ.

¹ Bụ nị nị Chuku hụn wụ ikẹn ẹnyi ẹbụ ịghọghọ, yi ni ni Chuku Jekọpụ oro ịghọghọ!

² Kpọma nị egu! Kụ nị ẹgede-chakachaka! Gi ni ụbọ-hapụ lẹ ụbọ-layẹ kpọ egu a sụọnị!

³ Gbu ni opi hụn ifọn gi pụ lẹ hụn ifọn gi shịagụ, gi kpọye mmẹmmẹ ẹnyi!

⁴ Iwu alị Izrẹlụ rọ, omẹnalị hụn Chuku Jekọpụ sị wẹ mẹsọnmẹ.

⁵ O ye ndị nke Josẹfụ wụ Izrẹlụ iwu hụ ogẹn ahụn o gi maye alị Ijiptu. M nụ olu m marịnlẹni, hụn sị m,

⁶ “Mmẹ bupụ ụnụ ibu igbọn uvun, napụ ụnụ ụkpalị igbọn.

⁷ Kẹ ụnụ kpọ m ogẹn nsọngbu, a zụọpụhaghọ m ụnụ, a gha m ebẹhụ zuerini akpara nọ a han za ụnụ, a nọ m mirin Mẹriba lele ụnụ. Sẹla

⁸ Ndị nke m, gọn ni m ntịn, nị m gba ụnụ mkpịnsịn-ẹka ẹnya, omẹni ụnụ e kweri gi oku m dọn:

⁹ Efelẹ ni mmọn; akụlẹni ni mmọn ọwụlẹ isi alị.

¹⁰ Mmẹ wụ Osolobuẹ, Chuku ụnụ, hụn gha alị Ijiptu wepụha ụnụ. Shịapụ nị ọnụ ọhụnma-ọhụnma; m k'e hujun ẹ.

¹¹ Kanị ndị nke m egọnni m ntịn; Izrẹlụ ekweyenini m.

¹² M nọ la wẹ tọ nị wẹ gbasọnmẹ isi-akwanran wẹ, wẹ nọ mẹsọnmẹ ihiẹn obi wẹ ye wẹ.

¹³ Omẹni ndị nke m te k'e gọn m ntịn! Omẹni ndị Izrẹlụ te k'e sọn ụzọ m!

¹⁴ Nkẹ m'e mẹri ndị-iṅẹnrẹn wẹ ozigbo-ozigbo, ẹka m e bitụ ndị bunụmanị wẹ;

¹⁵ nkẹ ndị ile ize Osolobuẹ e ze a mamanị wẹ piripiri, la iwi jẹnrin ejẹn;

¹⁶ nkẹ Osolobuẹ e ye ụnụ ọka kachanrịn mma ri; gidẹ mirin-ẹnwụn gha imẹ ọmụma pụha yejun ụnụ ẹfọ.”