Ẹbụ-ọma 79 - Ika

Isi Nke Mmitenẹi Kwasị Ọgụn-ẹtọ Osolobuẹ Dodo Mẹ Wẹ Hapụ Ẹnyi

Ẹbụ-ọma Asafụ

¹ Chuku, ndị alị ọzọ a banhangụọ alị ị; e mẹrụgụọ wẹ Ụlọ-NSỌ ị, e tikpọgụọ wẹ Jerusalẹm, o họnrin mkpọkọ-mkpọkọ!!

² E gbugụọ wẹ idibo i la ozun wẹ tọnị nnụnụ ri, a lagụọ wẹ ẹhụ ndị e feni i tọnị eje-anụ ri!

³ E gbugụọ wẹ wẹ, ẹdeke wẹ e huru imẹ Jerusalẹm nọkẹ mirin, onwọnni onyẹ rị e lini wẹ.

⁴ Alị ndị nọkunmẹni ẹnyi e d'a mụgbu ẹnyi; ndị fihunmẹni ẹnyi hụ a kọ ẹnyi ọnụ, e woo ẹnyi!

⁵ Osolobuẹ, nanị k'o k'e biehan? N'i busọn ẹnyi olulu jẹnrin ejẹn? N'i gi ẹnyanị rị a fụn'ị dụngbu ẹnyi lekẹ ọkụn?!

⁶ Gi olulu i mẹshi alị ndị ghalẹni e fe i ikẹn, alị-eze ndị ahụn ghalẹni a kpọku ẹfan ị,

⁷ makẹni, e gbugụọ wẹ ndị nke i, ndị Izrẹlụ, ebọn Jekọpụ; e tikpọgụọ wẹ ebe wẹ bi la iwi!

⁸ Dodo, egilẹ njọ ẹnyi mẹ mbụ sọn ẹnyi! Dodo, mẹ omikẹn bịakẹnrin d'e yeni ẹnyi ẹka, nị e wetuchanrịngụọ wẹ ẹnyi alị!

⁹ Yeni nwan ẹnyi ẹka, Chuku hụn a zụọpụhanị ẹnyi, gi ye ẹfan ị ọghọ; dodo, zụọpụha ẹnyi, gbagharị ẹnyi njọ makẹ ẹfan ị.

¹⁰ Kị alị ndị ọzọ k'a jụnị ẹnyi, “Elebe Chuku ụnụ rị?” Dodo, gbugwarị wẹ ogbugbu wẹ gbu idibo i, gbugwarị wẹ hụn alị ndị ọzọ k'a nụ ukwere ẹ; gbugwarị wẹ nị ẹnyi gi ẹnya ẹnyi hụn a!

¹¹ Dodo, gọn ntịn udẹn ndị rị ngan rị a sụn; gi ikẹn i hi ogbe dọnmẹ ndị wẹ ma ikpe-ọnwụn ndụn.

¹² Gi ẹmụ alị ndị nọkunmẹni ẹnyi mụ ị kụ wẹ ụgwọ, kụ wẹ ya ụzọ ẹsa!

¹³ Ogẹn ahụn, ẹnyi ndị nke i, hụn wụ atụnrụn ị rị a zụn, k'a kpanmịn ị jẹnrin ejẹn; ẹnyi k'a kpanmịn ị gha agbọ d'e ru agbọ.