Ẹbụ-ọma 78 - Ika

Isi Nke Mmẹsatọ Kwasị Ọgụn-ẹtọ Ijẹn Osolobuẹ Lẹ Ndị Nke Ẹ

Ẹbụ Maskilu Asafụ

¹ Ndị nke m, gọn ni ntịn nkuzi m; shịapụ nị ntịn nị ụnụ nụ ihiẹn m k'e ku.

² M k'a kọ akịkọ; m k'e gi ihiẹn mẹ ogẹn mbụ ku oku,

³ ihiẹn ẹnyi gi ntịn nụ, ihiẹn ẹnyi ile marịn, ihiẹn ndị nẹdi ẹnyi gwa ẹnyi.

⁴ Ẹnyi ezuemẹkọnị ụmụ wẹ ya; ẹnyi k'a gwarịrị agbọ lalanị ya, gwa wẹ ihiẹn furu w'a ja mma Osolobuẹ rụn, gwa wẹ ikẹn ẹ lẹ ọrụn-atụmẹnya a.

⁵ O yigụọnị ụmụ Jekọpụ wụ Izrẹlụ uhi; o yegụọ ndị Izrẹlụ iwu, ọ sị ndị nẹdi ẹnyi kanị wẹ gwasọnmẹ ụmụ wẹ ya;

⁶ kẹni agbọ lalanị marịn a, kẹni ndị wẹ k'a mụ marịn; wẹ nwẹn a gwazị ụmụ wẹ.

⁷ Kẹni wẹ ile e gi Chuku e dọn ẹnya, azọkọ wẹ ihiẹn Chuku rụn, kama, nị w'e mẹ ihiẹn o ku;

⁸ amamgbe w'a nọ kẹ ndị nẹdi wẹ kanị: ndị isi-ikẹn, ndị nnupụ-isi, ndị ẹnya wẹ rịlẹni ụzọ ohu, hụn dọnmẹlẹnini Chuku obi wẹ.

⁹ Ndị Ifrem gi ụta jẹn agha, kanị ọgụn e su, wẹ nọ gba ọsọ.

¹⁰ Edọnmẹni wẹ ihiẹn wẹ lẹ Chuku kwerigbama, ekweni wẹ gi Iwu ẹ bi.

¹¹ A zọ wẹ ihiẹn ile ọ rụn lẹ ọrụn atụmẹnya ọ rụnghọsị wẹ.

¹² Kanị ọ rụnghọ ọrụn atụmẹnya idẹnya ndị nẹdi wẹ, imẹ alị Ijiptu, ẹgbẹrẹ Zụanị;

¹³ o kewa ohimin ahụn, we wẹ fetu ẹ, o mẹ mirin hụ wuzo ụzọ ohu lekẹ ụsụọ ẹjan, wẹ nọ ghafe.

¹⁴ Ọ nọ gi orukpu ahụn du wẹ efinnaị, gi ọkụn rị e nwunni ye wẹ ukpẹ imẹ uhinhin.

¹⁵ Ọ biwa ọmụma imẹ atụ, ye wẹ mirin ra ọhụnma-ọhụnma nọkẹ ndị hụn mirin ohimin ra;

¹⁶ o mẹ mirin hupụha imẹ ọmụma, mẹ mirin ahụn huru nọkẹ iyi.

¹⁷ Kanị a tọ wẹ e mẹ Chuku njọ, e nupụnị Onyẹ Ahụn Kachanrịnnị isi imẹ atụ.

¹⁸ A chọma wẹ ihiẹn rị Osolobuẹ ọnụ imẹ obi wẹ, sị a, “Ihiẹn-oriri nwụnran?”

¹⁹ E fọnjama wẹ Chuku, sị, “Nị Chuku saẹka wepụha ihiẹn-oriri imẹ atụnị?

²⁰ Ọ sụọn'a nị ọ fịanghọ ọmụma ihiẹn, mirin e hupụha, hurudẹ, n'ọ sa ẹka ye ẹnyi ihiẹn-oriri? N'ọ sa ẹka ye ndị nke ẹ anụ ri?”

²¹ Ya kẹ Osolobuẹ nọ nụ, okẹn olulu nọ bu ẹ; nsọngbu nọ dụnma kẹ ọkụn imẹ ebọn Jekọpụ, ọnụma a nọ mẹmẹ ihiẹn imẹ Izrẹlụ!

²² Makẹni egini wẹ Chuku dọn ẹnya; ekwerini wẹ n'ọ saẹka zụọpụha.

²³ Kanị ọ gwakwọ igwere oku, gụnpụsọnmẹ ọnụmụzọ rị igwere;

²⁴ hutuni wẹ mana lekẹ mirin rị e zueni nị wẹ ri, o ye wẹ ọka elu-igwee ri.

²⁵ Wẹ ile nọ ri ihiẹn ndị mmọn-ozi e ri! Chuku ye wẹ ihiẹn-oriri ọhụnma-ọhụnma!!

²⁶ O zi ufere ọwụwa-ẹnyanwụn femẹ imẹ elu, e gi ikẹn ẹ zizikwọ ufere gha ẹbamịn ndịdan e fehẹ;

²⁷ wẹ hụ e fehẹni wẹ anụ ọda-ọda lekẹ ẹjan, nnụnụ bugbu enwẹn ẹ ọda nọkẹ ẹjan rị mkpẹnrẹn ohimin;

²⁸ o mẹ nnụnụ ndị ahụn dantọsọnmẹ ebẹhụ wẹ ziẹntọ, dantọsọnmẹ ẹhụ ọdụ ile wẹ bi.

²⁹ E ri wẹ, rijunchanrịn ẹfọ, o ye wẹ ihiẹn rị wẹ ẹnya.

³⁰ Kanị, wẹ gini d'e rigụ ihiẹn nwẹn rị a la wẹ ẹnya, ebe ihiẹn-oriri ahụn rịkwọ wẹ ọnụ,

³¹ Chuku nọ gi olulu ẹ mẹ wẹ ihiẹn, gbupụ ndị ka ndụn e nwọn imẹ wẹ lẹ ikorọbịa Izrẹlụ gi e dọn ẹnya!

³² Ọsụọn'a nị ihiẹn ndịnị ile mẹ, wẹ hụkwọ e mẹ njọ, egini wẹ ọrụn atụmẹnya a kweyen'ẹ.

³³ Ọ nọ mẹ wẹ nwụnlasọnmẹ iwi, ọnwụn idẹnmizi hụn a tụ egun.

³⁴ O gbugụ ndị o gbu imẹ wẹ, ndị họdụnị a chọma a; e hutọ wẹ, chọma a ọda-ọda.

³⁵ A nyanhan wẹ nị Chuku wụ ọmụma hụn e che wẹ nche, nị Onyẹ Ahụn Kachanrịnnị wụ onyẹ hụn a gbapụhanị wẹ.

³⁶ Kanị wẹ rịhụ e ku ẹ nke ọnụnụ-ire; wẹ rịhụ a tụ a ntụ.

³⁷ Obi wẹ arị ebe ọ rị; ekwọndọnni wẹ nkwerigbama a hụn o tumẹni wẹ.

³⁸ Kanị, makẹni ọ wụ onyẹ-omikẹn, ọ gbagharịsọnmẹ wẹ njọ; o tikpọchanrịnnị ebọn wẹ; ọ tọ e kwọndọn enwẹn ẹ, o gichanrịnnị olulu rị a obi sọn wẹ.

³⁹ Ọ hụ a nyanhan nị wẹ wụhụ ịhịan, uzun hụn wẹ e kunpụhụ, o kinhẹnkọzị.

⁴⁰ Mgbe ole-lẹ-ole kẹ wẹ fen'ẹ isi imẹ atụ ahụn, kpasu ẹ iwe imẹ atụ ebẹhụ;

⁴¹ a tọ wẹ a chọ ihiẹn rị Chuku ọnụ, e mẹ ihiẹn a fụ Onyẹ-nsọ Izrẹlụ.

⁴² Anyanhanzịnị wẹ ikẹn ẹ hi-ogbe mọbụ ogẹn ahụn o gi gbapụha wẹ ẹka onyẹ-iwe,

⁴³ ogẹn ahụn o gi ghọsị ẹka a imẹ alị Ijiptu, rụn ọrụn atụmẹnya imẹ ẹgbẹrẹ Zụanị ebẹhụ:

⁴⁴ k'o dọn mẹ iyi ndị rị Ijiptu họnrinsọnmẹ ẹdeke, ndị Ijiptu asazịnị ẹka ra wẹ;

⁴⁵ k'o dọn zi nzinzin ye imẹ igunrun wẹ, nzinzin nọ kpụ wẹ; k'o dọnzi zi ẹwọ, wẹ nọ wiwi ndị Ijiptu ihiẹn;

⁴⁶ k'o dọn we ihiẹn-ugbo wẹ ye igurube, we ihiẹn wẹ rụnpụha imẹ ugbo ye igurube;

⁴⁷ k'o dọn gi ẹkwan-igwere magbusọnmẹ vaịnị ile ndị Ijiptu kụn, gi ọkpụkpụ mirin ahụn gbu osisi figi wẹ;

⁴⁸ k'o dọn gi ẹkwan-igwere gbu efin wẹ, gizi amụma gbu anụ wẹ;

⁴⁹ k'o dọnzi gi okẹn iwe lẹ ọnụma lẹ nsọngbu sọn ndị Ijiptu, zi igunrun ndị mmọn-ozi e gbuni d'e gbu wẹ.

⁵⁰ O gichanrịn olulu ile rị a ẹfọ sọn ndị Ijiptu, o leni ẹnya azụụn; ọ nịnị ọnwụn ghafe wẹ, kama, ọ nị ihiẹn rị e gbuni weri ndụn wẹ.

⁵¹ Ọ nọ gbu ụmụ ibuzọ ile rị Ijiptu, gbu ọghọ ibuzọ ezi-lẹ-ụlọ wẹ ile, ezi-lẹ-ụlọ ndị ẹbozo Ham!

⁵² Ya k'ọ nọ dupụha ndị nke ẹ lekẹ atụnrụn, du wẹ imẹ atụ ahụn lekẹ igunrun atụnrụn.

⁵³ O du wẹ pẹrẹ, egun atụnị wẹ, kanị o mẹ ohimin e rukpumẹ ndị-iṅẹnrẹn wẹ;

⁵⁴ Ọ nọ we wẹ ru alị-nsọ a, Ugu hụn ọ kpa ikẹn nwọnhẹn;

⁵⁵ ọ chụpụsọnmẹni wẹ alị ndị ọzọ rịn'a; ọ nọ keni wẹ alị ahụn, ke ẹ ru alị, ye ebọn-ebọn rị Izrẹlụ alị wẹ biri.

⁵⁶ Kanị, wẹ hụ a chọ ihiẹn rị Chuku Kachanrịnnị ọnụ, a pasọnmẹ wẹ oku ẹ; edọnmẹni wẹ iwu ẹ.

⁵⁷ Kama, a gha wẹ ụzọ a pụ, gi aghịghọ sọn ẹ kẹ ndị nẹdi wẹ dọn mẹ, mẹ kẹ ụta zinrinlẹni.

⁵⁸ E gi wẹ mmọn wẹ rị a rụa ebe jẹn elu a kpasu ẹ iwe, gi mmọn wẹ kpụ e mẹ ẹnya a fụ a.

⁵⁹ Chuku a hụn ihiẹn wẹ rị e mẹ, ezigbo iwe nọ we ẹ, ọ nọ jụchanrịn Izrẹlụ.

⁶⁰ Ọ nọ latọ Ọdụ-ofufe ẹ rị Shilo, Ọdụ ahụn o tumẹ imẹ igunrun ịhịan.

⁶¹ Ọ latọ Ẹkpẹti ghọsị ikẹn ẹ lẹ ọghọ a, ọ nị ndị iṅẹnrẹn bunarịn wẹ ya.

⁶² O we ndị nke ẹ ye wẹ gi ọpịa-agha gbu, o gi olulu ahụn rị a obi mẹshi ndị nke ẹ ikẹn.

⁶³ Ọkụn nọ bu ikorọbịa wẹ ri, ịgbagba wẹ ahụnzịnị onyẹ a ja wẹ mma.

⁶⁴ E gi wẹ ọpịa-agha gbupụ ndị nchụn-ẹjan wẹ, inyẹnmẹ wẹ asanị ẹka kwan wẹ.

⁶⁵ Chuku nọ nwan felihi lekẹ onyẹ te rị ụran, lekẹ odogun-agha manya te gbuye ụran.

⁶⁶ Ọ nọ mẹri ndị-iṅẹnrẹn ẹ, chụkin wẹ; gbe ifẹnrẹn itẹbitẹ ye wẹ ihun.

⁶⁷ Kanị, ọ jụkwọ ikpụlọ Josẹfụ rịn'a; ọ họrịnị azụụn nke wẹ wụ Ifrem

⁶⁸ Ebọn Juda k'ọ họrị, Ugu-Zayọnụ o bu obi k'ọ họrị.

⁶⁹ Ọ nọ tụn Ụlọ-nsọ a n'o jẹn elu kẹ igwere: tụn a n'ọ tọ, k'o dọn mẹmẹ ụwa n'o turu jẹnrin ejẹn.

⁷⁰ Ọ nọ họrị odibo ẹ wụ Defidi, gha ebe ya lẹ atụnrụn rị weri ẹ;

⁷¹ ọ gha ebe ọ nọ e du atụnrụn wẹhẹ ẹ, d'e dumẹ ebọn Jekọpụ, ya wụ Izrẹlụ, ndị nke Chuku.

⁷² Defidi nọ gi obi ẹ ile du wẹ, gi ẹka onyẹ marịn ọrụn du wẹ.