Ẹbụ-ọma 77 - Ika

Isi Nke Mmẹsa Kwasị Ọgụn-ẹtọ Osolobuẹ K'a Za M Oku

Ye onyẹ-ndu ẹbụ ẹbụnị. Wẹ bụ a kẹ Jedutunu dọn a bụ. Ẹbụ-ọma Asafụ rọ.

¹ M rị a kwanghọsị Chuku; ẹghẹẹ, m k'e yi oro! M rị a kwanghọsị Chuku, n'ọ nụghọ olu m.

² Kẹ m rị imẹ nsọngbu, a rịọ m Osolobuẹ; a shịapụ m ẹka imẹ uhinhin, a rịọ a, anịnị m ẹka nyan m; anịnị m wẹ hụhụ m.

³ M nyanhan Chuku, a sụn m udẹn; a gwaghọsị m'a, ndụn a gụ m. Sẹla

⁴ Y'a anịnị m ranhịn, uhue hụ e hue m; asazịnị m ẹka ku oku.

⁵ M'e ro ogẹn mbụ; m'a nyanhansọnmẹ ogẹn mbụ-mbụ.

⁶ M'a nyanhan ẹbụ m'a bụ imẹ uhinhin; m hụ e ro, a jụ enwẹn m ajụjụ,

⁷ a sị, “Nị Osolobuẹ jụchanrịn ẹnyi ẹnịna jẹnrin ejẹn? O gikọzị ẹnya rị mma lee ẹnyi?

⁸ Onwọnkọzị ihiẹn-ọsụsụọ ndị nke ẹ? Ra ọ kagbugụọdẹ nkwa a?

⁹ Chuku a zọgụọ omikẹn? Ra o gigụọ olulu kpọkin obi ẹ?” Sẹla

¹⁰ M nọ sị, “Ọ fụka m nị Onyẹ Hụ Kachanrịnnị e gbehutọgụọ ẹka, ẹka a hụ hi ogbe o te gi e yeni ẹnyi ẹka.”

¹¹ M jẹnkọ d'a nyanhan ihiẹn Osolobuẹ rụnsọnmẹ; m k'a nyanhan ọrụn-atụmẹnya ndị ị rụn mbụ.

¹² M k'e rosọnmẹ ihiẹn ile ị rụn, m k'e ro ikẹn ile ị kpa:

¹³ Chuku, ihiẹn ile y'e mẹ rịchanrịn nsọ, elee mmọn han kẹ yụ?

¹⁴ Ịyụ wụ Chuku hụn a rụn ọrụn-atụmẹnya; y'a ghọsịgụọdẹ ikẹn i imẹ alị ndị ọzọ.

¹⁵ Y'e gigụọ ikẹn i gbapụha ndị nke i, ụmụ Jekọpụ lẹ Josẹfụ. Sẹla

¹⁶ Ogẹn mirin ohimin ahụn gi hụn ị, Chuku, ogẹn mirin Ohimin ahụn gi hụn ị, egun nọ tụma a, ọ mama piripiri!

¹⁷ Igwere nọ zue mirin; akpara hụ a han imẹ orukpu, ọbara ụta ị wụ amụma e begbarị azụụn ile;

¹⁸ okẹn akpara ị hụ a han kẹ ẹbi ahụn dọn rị a kpọ; amụma ị begbarị elu-ụwa; elu-ụwa nọ zinzin ọda-ọda!

¹⁹ Ị nọ gha Ohimin ahụn kẹ ụzọ, gha mirin ahụn migbu enwẹn ẹ kẹ ọkpụzọ, ahụnnị wẹ ụkụ ị!

²⁰ Ị nọ du ndị nke i kẹ atụnrụn ghahanị Mozizi lẹ Ẹrọnụ.