Ẹbụ-ọma 76 - Ika

Isi Nke Mmisin Kwasị Ọgụn Ẹtọ Chuku Wụ Onyẹ-mmẹri

Ye onyẹ-ndu ẹbụ ẹbụnị. Wẹ kpọ ụbọ ye ẹ. Ẹbụ-ọma Asafụ rọ. Wẹ bụ a.

¹ Wẹ marịn Chuku ọhụnma imẹ Juda; o nwọnkẹ ẹfan imẹ Izrẹlụ.

² Imẹ Salẹm k'o bi; Imẹ Ugu Zayọnụ k'o bi.

³ Ebẹhụ k'ọ nọ kpagipụ ụta ndị iṅẹnrẹn lẹ akpaịn lẹ ọpịa-agha wẹ ọgụn nọ bi. Sẹla

⁴ Chuku y'e nwọnkẹ ọghọ; ọghọ ị ka nke ugu ndị ahụn, ugu ndị ahụn ị nọ gbu wẹ kẹ anụ!

⁵ Ị nọdẹ napụchanrịn ndị odogun-agha hụ ihiẹn wẹ, a dan wẹ ranhịn ụran wẹ ghalẹni e tẹnhin! Ndị-agha wẹ ile asanị ẹka mẹ ihiẹn-anaị.

⁶ Ogẹn yụ wụ Chuku Jekọpụ gi bigbọ, ndị-agha lẹ ẹshin-agha wẹ nọ ranhịn ụran wẹ ghalẹni e tẹnhin!

⁷ O furu nị w'a tụ egun i! Onyẹ k'a saẹka wuzo ihun i ebe ị rị e bu olulu?

⁸ Ị nọ gha elu-igwee ma ndị-iṅẹnrẹn i ikpe; alị nọ mama piripiri, gba nkịtịn,

⁹ ogẹn i gi lihi ọtọ n'i han eṅẹn, gi ẹ zụọpụha ndị ile wẹ rị a bịangbu elu-ụwa. Sẹla

¹⁰ Ịhịan bugụ olulu ẹ, y'e gi olulu ẹ nwọnrin ọjịja-mma — ndị iwe họdụnị e mẹ jụụ!

¹¹ Kwe ni Osolobuẹ wụ Chuku ụnụ nkwa, mẹzu ẹ; ndị ile nọhunmẹn'ẹ, wẹhẹsọnmẹ ni oyiye d'a gbaye Onyẹ Ahụn Rị Egun,

¹² Onyẹ hụn e welụa ndị ọkịkị alị, hụn ndị-nze ụwa gi a tụ egun ẹ.