Ẹbụ-ọma 66 - Ika

Isi Nke Isin Kwasị Ọgụn-ẹtọ Ẹbụ Ọjịja-mma

Wẹ ye onyẹ-ndu ẹbụ ẹbụnị. Ẹbụ rọ. E Dọnyegụọ w'a.

¹ Ụwa ile, yini ni Chuku oro ịghọghọ!

² Gi ni ẹbụ ja ẹfan a mma! Ja n'a mma ọhụnma-ọhụnma!

³ Sị nị Chuku, “Y'a rụnka ọrụn a tụ egun! Makẹni ikẹn i e hikẹ ogbe ya haịn ndị-iṅẹnrẹn i gi a man'ị piripiri.

⁴ Ụwa ile a kụn'ị isi alị; a bụn'ị ẹbụ ịja-mma; w'e gi ẹbụ a ja ẹfan ị mma.” Sẹla

⁵ Bịa nị d'e lee ihiẹn Osolobuẹ rụn; ọrụn a tụ egun ọ rụnnị ịhịan!

⁶ Ịya gi ohimin họnrin akpakalị; ndị nke ẹ nọ gi ụkụ fetu; nị ẹnyi gi ihiẹn o mẹ ebẹhụ ghọghọ;

⁷ Makẹ ikẹn hụn o nwọn, ọ kị jẹnrin e jẹn, ẹnya a hụ e lee alị ile: ndị nnupụ-isi wẹ ebushikwọlẹ enwẹn wẹ elu! Sẹla

⁸ Ndị alị ile, ja nị Chuku ẹnyi mma; jan'a hụn w'a nụ ọhụnma-ọhụnma.

⁹ Makẹni ịya dọnmẹ ẹnyi ndụn, ọ nịnị ẹnyi kpori.

¹⁰ Y'e lelegụọ ẹnyi, Osolobuẹ, kẹ wẹ e lele siliva imẹ ọkụn.

¹¹ Y'e bugụọ ẹnyi che imẹ ọnyan; y'a kpọmagụọ ẹnyi ẹgan ukun;

¹² y'a nịgụọ ịhịan zọ ẹnyi ụkụ isi; ẹnyi nọ gha imẹ ọkụn, gha imẹ mirin! Kanị, y'e wepụhagụọ nwan ẹnyi, bu ẹnyi che ebe ẹhụ a nọ fu ẹnyi.

¹³ M wela ẹjan w'a dụn ọkụn iwe i; m k'e mẹzu nkwa m kwe i,

¹⁴ ihiẹn m shịapụ ọnụ kwe i nkwa a kẹ m rị imẹ nsọngbu.

¹⁵ M k'e gi anụ m kachanrịn mma chụnyen'i ẹjan w'a dụn ọkụn, e gi m ebulu chụnyen'i ẹjan w'a dụn ọkụn, ẹnwụnrụn a alọshin'i elu, e gizi m okẹn-efin lẹ ewu chụnyen'i ẹjan. Sẹla

¹⁶ D'e gọn ni ntịn, ụnụ ile hụn a gbaye Chuku, nị m kọnị ụnụ ihiẹn o mẹni m!

¹⁷ A kpọkughọ m'a, gi ẹbụ ja a mma.

¹⁸ Omẹni m te rị e ro njọ, Osolobuẹ eke gọn m ntịn.

¹⁹ Kanị Chuku e gọnghọ m ntịn, ọ nụgụọ ekpere m.

²⁰ Chuku arịka mma ebe ọ nọlẹni jụ ekpere m mọbụ jụ n'ọ ghọsịkọ m ihiẹn-ọsụsụọ onyẹ nke ẹ.