Ẹbụ-ọma 65 - Ika

Isi Nke Isẹn Kwasị Ọgụn Ẹtọ Osolobuẹ A Gọzi Alị Ẹnyi

Ye onyẹ-ndu ẹbụ ẹbụnị. Ẹbụ-ọma Defidi rọ; w'a bụ a abụ.

¹ Euu Chuku, ẹnyi k'a ja ị mma imẹ obodo Zayọnụ; ẹnyi k'e mẹzu nkwa ẹnyi kwe i;

² euu ịyụ, hụn a za ekpere, ịyụ kẹ ịhịan ile a bịa d'e kunrun.

³ Njọ ẹnyi gbumẹ ẹnyi, y'a gbagharị ẹnyi agbagharị.

⁴ Onyẹ ị họrị buche ẹhụ ị n'o biri ezi-ọgwa ị e nwọnkẹkwọ ngọzi. Ẹnyi sikọ d'e ri ihiẹn rị mma rị Ụlọ-NSỌ ị rijun ẹfọ, ihiẹn rị mma hụn rị Ebẹhụ Rị Nsọ ị rị.

⁵ Chuku hụn a zụọpụhanị ẹnyi! Y'a rụnsọnmẹ ihiẹn bu ọda a tụ ẹnya i gi a ghọsị ẹnyi n'ị hụ a; ịyụ kẹ elu-ụwa ile rị e lee ẹnya, kẹ ndị rị nfetu ohimin tegbu enwẹn ẹ.

⁶ Ịyụ gi ikẹn i hi ogbe e dọnmẹ ugu ile ọnọdị wẹ; y'e nwọnkẹ ikẹn!

⁷ Ịyụ a kụsị okẹn-ụzụn ohimin, ụzụn hụn ẹbi ohimin rị a zụn; y'a kụsị mban alị ndị ọzọ rị a ban.

⁸ Egun hụ a tụ elu-ụwa ile, wẹ gha a hụn ihiẹn a tụ egun y'a rụn; y'e mẹ ụwa ile a ghọghọ kẹ ndị rị ebe anwụn n'a wa kẹ ndị rị ebe ọ n'a dan.

⁹ Y'e e lepụ akpak'alị ẹnya, e mẹ mirin e ru alị. Y'e mẹ mirin e jun ụzọ ile; e mẹ alị e mẹ ihiẹn; makẹni ẹrịra kẹ i mẹ n'ọ rị:

¹⁰ y'e mẹ mirin e zueye alị ugbo ọhụnma-ọhụnma, alị e dẹnhin; y'e gi mbụmbụ-mirin e mẹ alị a rị alụlụa, y'e mẹ ihiẹn ugbo e sue.

¹¹ Y'e gi ihiẹn-ugbo e tu ahụa ugọn; y'e mẹ ihiẹn-ugbo e jundẹ ọkpụzọ ile;

¹² ẹfịfịa e rujundẹ ebe anụ nọ a kpa nni imẹ atụ alị-ọkpọnkụn; elu òke ile hụzị a ghọghọ nị ẹfịfịa e jun wẹ,

¹³ atụnrụn e jun ebe ile anụ nọ a kpa nni; ọka e jun ugbo ndị rị ọdanmgbugbu, ọfịa anụ nọ a kpa nni lẹ ọdanmgbugbu hụ a ghọghọ, a bụ ẹbụ!