Ẹbụ-ọma 64 - Ika

Isi Nke Ẹnọ Kwasị Ọgụn Ẹtọ

Ye onyẹ-ndu ẹbụ ẹbụnị. Ẹbụ-ọma Defidi rọ.

¹ Chuku, dodo gọn ntịn, ebe m rị a gwaghọs'ị nsọngbu m! Egun ndị-iṅẹnrẹn m rị a tụ m, dodo, dọnmẹ m ndụn!

² Dodo, zuemẹ m, makẹ eje-umẹ ndị-njọ rị e zuni m, makẹ ọgbọ ndị-ejẹni rị a zụn ụzụn.

³ W'e sụọnchanpụ ire wẹ kẹ ọpịa-agha, e bu eje-oku wẹ wụ ọbara-ụta e zinmẹ,

⁴ kẹni wẹ zue nzuzue gba onyẹ nwọnlẹni ihiẹn o mẹ; w'a gba a ya idẹnmizi, egun ara tụdẹ wẹ!

⁵ W'e kudẹ ndụn e ye ibe wẹ obi, e ku oku ọnyan wẹ k'e shini ịhịan; a sị, “Onyẹ rị a hụn ẹnyi?”

⁶ W'e zu umẹ wẹ gi e mẹgbu ịhịan, a sị, “Umẹni ẹnyi zu arịka mma.” Obi lẹ iroro ịhịan e mikẹ nke-esi.

⁷ Kanị, Osolobuẹ gba wẹ hụ ụta a, idẹnmizi, o zugbu wẹ!

⁸ Ọnụ wẹ e gbu wẹ; onyẹ hụn wẹ, egun a tụ a;

⁹ egun k'a tụma ịhịan ile, a gwama wẹ ndị ọzọ ihiẹn Chuku mẹ; e rosọnmẹ wẹ ihiẹn Chuku mẹ.

¹⁰ Ndị ezi-omumẹ ile k'a ghọghọma makẹ ihiẹn Osolobuẹ mẹ, e gbọnni w'ẹ; ndị ile obi wẹ kụrụ ọtọ k'a ghọghọ, a nyan isi.