Ẹbụ-ọma 62 - Ika

Isi Nke Ẹbụọ Kwasị Ọgụn-ẹtọ

Ye onyẹ-ndu ẹbụ ẹbụnị. Wẹ bụ a kẹ Jedutunu dọn a bụ. Ẹbụ Defidi rọ.

¹ Chuku sụọ kẹ m gi e dọn ẹnya; ịya wụ onyẹ a zụọpụhanị m.

² Ịya sụọ wụ ọmụma e che m nche lẹ onyẹ hụn a zụọpụhanị m; ịya kẹ m gbọnni: emẹhunmẹkọ m ọda.

³ Elee mgbe kẹ ụnụ k'a mayebehi ịhịan ọgụn? A chọ nị ụnụ gbu ẹ — nị ụnụ nutu ụsụọ-ẹjan ṅanrịnnị, mgbọn rị a chọ n'ọ dan.

⁴ Wẹ hụ e zu ni wẹ dọtu okẹn-ịhịan! Ịtụ-ntụ hụ a sụọ wẹ ụsụọ. Ọnụ wẹ hụ e ku oku i ọhụnma, obi wẹ hụ a bụ ị ọnụ. Sẹla

⁵ Chuku sụọ kẹ m tụkwasị obi, ịya kẹ m gi e dọn ẹnya.

⁶ Ịya sụọ wụ ọmụma e che m nche lẹ onyẹ a zụọpụhanị m; ịya kẹ m gbọnni: emẹhunmẹkọ m.

⁷ Chuku k'a zụọpụha m, ye m ọghọ; Chuku wụ okẹn-ọmụma hụn e che m nche, ịya wụ ebe m'a gbaban!

⁸ Ndị nke ẹnyi, e gi ni Chuku e dọn ẹnya ogẹn ile, a gwaghọsịchanrịn n'a k'ọ rị ụnụ, makẹni ịya kẹ ẹnyi gbọnni. Sẹla

⁹ Ịhịan mmaka wụhụ ube uzun ohu, kẹ onyẹ-uku kẹ onyẹ-nta; wẹ ile wụhụ ufori. Ị magbamadẹ wẹ ile, anyịnhannị wẹ kẹ ufere!

¹⁰ Egilẹ mmẹgbu dọn ẹnya; egilẹ ihiẹn wẹ zu dọn ẹnya, makẹni o k'e kpuye i, akụ-lẹ-ụba bawaye, egikwọl'a dọn ẹnya.

¹¹ Chuku e kuọl'a mgbe ohu, mmẹ nwẹn a nụgụọ a nwan mgbe ẹbụọ, nị ikẹn wụ nke Chuku

¹² lẹ ni y'e mẹsọnmẹ hụn run'i, Di-nwọnni-ẹnyi; ihiẹn onyẹ rụn k'i gi a kụ a ụgwọ.