Ẹbụ-ọma 58 - Ika

Isi Nke Mmẹsatọ Kwasị Ọgụnnaị Ndị-ntụ Alakọ Ọfẹ

Ye onyẹ-ndu ẹbụ ẹbụnị. Ẹbụ Miktam Defidi rọ. Gi olu “Etikpọlẹ” bụ a.

¹ Ụnụ ndị oku rị ẹka, ụnụ rịdẹ nwan e kpumẹ ezioku ra? Ụnụ hụ nwan a hannị ịhịan ezigbo eṅẹn?

² Mba! Mmẹgbu-mmẹgbu kẹ ụnụ e ro, ẹka-ikẹn ẹka-ikẹn kẹ ụnụ gi e sọn ndị alịnị.

³ Ndị-ejẹni gha ẹfọ nnẹ wẹ kpahumẹ; imẹ ẹfọ kẹ wẹ gha tụma ntụ.

⁴ Ẹdide kẹ oku-ọnụ wẹ wụ, lekẹ ẹdide agwọ; ntịn kpọkin wẹ kẹ ẹjụ-alị —

⁵ ya haịn o gilẹni a nụ olu ndị a rẹrẹrị agwọ, ọsụọn'a nị ọkaa ịrẹrẹrị agwọ rọ.

⁶ Chuku, dodo tikwọnpụ eze rị wẹ ọnụ; Osolobuẹ, dodo huepụ ikoro-ẹwọrọ ndịnị eze!

⁷ Dodo, wẹ fori nọkẹ mirin tahịnị; wẹ dọ ụta, ya wiwi.

⁸ Ndụn wẹ ya hipụma kẹ mirin egi rị a lọpụha ebe ọ rịkọ; lekẹ nwa nwụntọ ẹfọ leghalẹni ẹnyanwụn.

⁹ Ite gini d'a nụ ọkụn, Osolobuẹ ya zachanpụ ndị eje-ịhịan, kẹ wẹ dọn a zachanpụ nkụn wẹ gi fiye ọkụn kẹ nke ndụn kẹ nke ọkpọ-nkụn.

¹⁰ Ndị ezi-omumẹ k'a ghọghọ n'a hụngụọ wẹ mmẹgwarị Chuku mẹgwarị wẹ; wẹ k'a nọ imẹ ẹdeke ndị-njọ chan ụkụ!

¹¹ Onyẹ ọwụlẹ k'a sị, “Ezioku, onyẹ ezi-omumẹ nwọn ụgwọ-ọrụn; Chuku hụn a han ezigbo eṅẹn elu-ụwa rị arị.”