Ẹbụ-ọma 57 - Ika

Isi Nke Mmẹsa Kwasị Ọgụnnaị Chuku Dodo, Ịyụ Kẹ M Gbọnni

Ye onyẹ-ndu ẹbụ ẹbụnị. Ẹbụ Miktam Defidi rọ, hụn o de ogẹn o gi gbapụnị Sọlụ gbashi imẹ okporo d'a warị. Wẹ gi olu wẹ gi bụ “Etikpọlẹ” bụ a.

¹ Chuku, dodo mẹ omikẹn m, dodo mẹ omikẹn m, nị ịyụ kẹ m gbọnni. Okpuru nku i kẹ m k'a nọdị d'e ru ni ntikpọnị a ghafegụ!

² A kpọku m Chuku; a kpọku m Onyẹ hụn Kachanrịnnị, Chuku hụn a rụnzu ihiẹn ọ kwademẹni m.

³ O k'a gha elu-igwee zihẹni m nzụọpụha; o k'a jụgbọ ndị rị a bịangbuni m. Sẹla Osolobuẹ k'e mẹni m k'o dọn e mẹni ndị nke ẹ, o k'e mẹ k'o mẹ. Sẹla

⁴ M rị nwan imẹ igunrun ẹwọrọ; m dịnọ nwan imẹ igunrun ẹwọrọ ndị e ri ịhịan; obo lẹ ọbara-ụta kẹ eze wẹ wụ, ire wẹ wụ ọpịa-agha tụ nkọ!

⁵ Ọghọ ị ya pụha elu-igwere; ọghọ ị ya pụhazị elu-ụwa ile!

⁶ Wẹ te shitọnị m ọnyan kẹ ndụn gụgụ m; Wẹ gutọnị m mgbugbu ụzọ, kanị wẹ lẹ enwẹn wẹ a danyegụọ imẹ ẹ. Sẹla

⁷ Chuku, obi emẹhunmẹkọ m; obi emẹhunmẹkọ m! M k'a bụ ẹbụ; m k'a bụ ẹbụ ọjịja-mma!

⁸ Obi m, tẹnhin! Ụbọ mmaka lẹ ụbọ-layẹ tẹnhin ni! Mmẹ k'a kpọtiẹndẹ ụtụntụn!

⁹ M k'a kpanmịn ị Di-nwọnni-ẹnyi, imẹ igunrun ndị alị ichẹn-ichẹn; m k'e gi ẹbụ ja ị mma imẹ alị ndị ọzọ.

¹⁰ Makẹni ihiẹn-ọsụsụọ ị jẹnhandẹ elu kẹ igwere; kẹ orukpu dọn jẹn elu ọda-ọda, ẹrịra k'i dọn wụ Onyẹ w'e gi e dọn ẹnya ọda-ọda.

¹¹ Ọghọ ị ya pụha elu-igwere; ọghọ ị ya pụhazị elu-ụwa ile!