Ẹbụ-ọma 56 - Ika

Isi Nke Mmisin Kwasị Ọgụnnaị Chuku Kẹ M Marịn

Ye Onyẹ-ndu ẹbụ ẹbụnị. Wẹ gi olu wẹ gi a bụ “Nduru beri agalaba okuu teni” bụ a. Ẹbụ Miktam arịrịọ Defidi de rọ. Ogẹn ahụn ndị Filistia gi nwụndọn ẹ imẹ obodo Gatị k'o gi de ẹ.

¹ Chuku dodo, mẹni m omikẹn, nị ịhịan rị a bịangbu m; wẹ rị a lụsọn m ọgụn kẹ ụhụọhịn han.

² Ndị eṅẹnrẹn m rị a chụ m uhinhin lẹ efinnaị; wẹ bu ọda rị e mẹkarị enwẹn wẹ a lụsọn m ọgụn.

³ Egun tụma m, ịyụ kẹ m'a tụkwasị obi.

⁴ M k'a ja Chuku mma makẹ nkwa o kwe. Chuku kẹ m gi e dọn ẹnya; egun atụkọ m; kị ịhịan k'a s'ẹka mẹ m?!

⁵ W'a fịhutọ oku m Uhinhin lẹ efinnaị; a chọ ihiẹn w'e mẹ m!

⁶ Wẹ rị a maye m; wẹ hụ a warị, e ke m nke, a chọ nị wẹ gbu m!

⁷ N'ị nị wẹ la mmaka, wẹ lẹ eje-ihiẹnni wẹ rị e mẹ?! Chuku, gi iwe titu ndị ahụn!

⁸ Y'a hụngụọ ẹkwan ile m rị a kwan; ị hụ e butọ ẹnya-mirin m imẹ ọgọ ị. Y'e detugụọ wẹ ile imẹ ẹkụkwọ ị.

⁹ Ndị-iṅẹnrẹn m k'a gbakin azụụn, ogẹn m'e gi kpọ ị. Ihiẹn m marịn wụ nị Chuku rị azụụn nke m.

¹⁰ Nkwa Chuku kwe kẹ m'a ja mma; Nkwa Osolobuẹ kwe kẹ m'a ja mma;

¹¹ Chuku kẹ m gi dọn ẹnya; egun atụkọ m. Kị ịhịan k'a s'ẹka mẹ m?

¹² M k'e mẹzu nkwa m kwe i, Chuku; m k'a chụnyen'i ẹjan-ekele,

¹³ makẹni y'a zụọpụhagụọ m ẹka ọnwụn, y'a nịnị m dan. Ya haịn m gi nwan rị e jẹnhunmẹ ihun Osolobuẹ, e nwọn ukpẹ ahụn wụ ndụn.