Ẹbụ-ọma 55 - Ika

Isi Nke Mmisẹn Kwasị ọgụnnaị Ekpere Onyẹ Ọwụ A Re

Ye onyẹ-ndu ẹbụ ẹbụnị. Ẹbụ Maskilu Defidi rọ. Wẹ kpọ ụbọ ye ẹ.

¹ Euu Chuku, dodo gọn ntịn ekpere m; ebupụlẹ ihun arịrịọ m!

² Gọn m ntịn, n'ị za m makẹni nsọngbu m anịnị obi ru m alị; obi rị a gbaka m

³ yeni mban ndị-iṅẹnrẹn rị a ban, yeni ihiẹn ile ndị ẹfọ-njọ rị e mẹ — makẹni wẹ rị e nu nsọngbu e ye m isi, e gi olulu e sọn m.

⁴ Obi m rị a dụ ọda-ọda; egun ọnwụn a tụgbu m.

⁵ Egun hụ a tụ m, ẹhụ hụ a ma m nni; a ma m piripiri ọda-ọda.

⁶ M sị enwẹn m, “Omẹni m te nwọn nku kẹ nduru, nkẹ e fepụ m d'e zu ikẹn.

⁷ Nkẹ m'a gbate; nkẹ m'e biri imẹ atụ. Sẹla

⁸ Nkẹ m'a gbashi ebe m'a nọ wanahịn — wanahịn okẹn ufere lẹ ẹbini rị a kpọnị!”

⁹ Di-nwọnni-ẹnyi, dodo kpayịya wẹ — mẹ wẹ aghọtazịlẹ ihiẹn ibe wẹ rị e ku! Makẹni, m rị a hụn ẹka-ikẹn lẹ isusu imẹ obodo.

¹⁰ Uhinhin lẹ efinnaị ndị nche hụ a ghahunmẹ elu mgbọn ẹ, kanị eje-ihiẹn lẹ nsọngbu e jun imẹ ẹ.

¹¹ Ntikpọ jun imẹ ẹ; Mbịangbu lẹ ntụ ara kọ ọgbara-ogbe lẹ ọgwa a!!

¹² Omẹni eṅẹnrẹn rị a mụ m ẹmụ, nkẹ ọ nị m dingbu; omẹni onyẹ-iwe rị e mẹ m okẹn ihiẹnni, nkẹ m'a gbapụn'a.

¹³ Kanị, ịyụ rọ, ibe m, ezigbo ọwụ m hụn m gi e mẹ ẹhụ;

¹⁴ onyẹ mmẹ lẹ ịya te gba e shi inyẹnrẹn, e jẹngbamadẹ Ụlọ Chuku d'e sọn igunrun ndị nke Osolobuẹ e fe ofufe.

¹⁵ Wẹ nwụnchu! Wẹ li wẹ ebe wẹ rị ndụn! Makẹni eje-ihiẹn rị ụlọ wẹ lẹ imẹ igunrun wẹ.

¹⁶ Kanị m hụ a kpọku Chuku: Osolobuẹ jẹnkọ d'a zụọpụha m.

¹⁷ Kẹ uhinhin kẹ ụtụntụn kẹ efinnaị, m hụ a gwaghọsị a nsọngbu m, a sụn udẹn; ọ k'a nụ olu m.

¹⁸ O k'a gbapụha m, onwọnni ihiẹn aghanị k'e mẹ m, ọsụọn'a nị ndị bu ọda rị a lụsọn m.

¹⁹ Chuku k'a nụ ekpere m, shịarị wẹ; ịya rị a kị gha alị lala. Sẹla O k'e mẹ wẹ ihiẹn makẹni ekweni wẹ bihutọ ẹka, w'a ra tụ egun Chuku.

²⁰ Onyẹ mmẹ lẹ ya te wị e mẹgbama e bugụọ nụmanị m; o tikpọgụọ nkwa o kwe.

²¹ Oku-ọnụ a riẹnnahịndẹ udẹn-olivu, kanị agha rị a obi; oku-ọnụ a riẹnnahịndẹ ofugbọn, kanị ọpịa-agha wẹ sepụhagụ rọ!

²² Bu nsọngbu i ye Osolobuẹ, o k'e dọnmẹ i; onwọnni ogẹn o k'a nị wẹ mẹhunmẹ ndị ezi-omumẹ

²³ Kanị Osolobuẹ, i k'a tụ ndị-izighẹ ahụn lẹ ndị-ntụ ahụn ye ebe ka e mi imẹ mgbugbu ahụn; wẹ k'a nwụnchu! Kanị mmẹ nwẹn, m k'e gisọnmẹ i dọn ẹnya!