Ẹbụ-ọma 50 - Ika

Isi Nke Iri Kwasị Ọgụnnaị Ezigbo Ofufe Osolobuẹ Chọ

Ẹbụ ọjịja-mma Asafụ bụ

¹ Chuku Kachanrịnnị, hụn wụ Osolobuẹ, rị e ku; ọ rị a kpọ ụwa ile oku, gha ẹbamịn ọwụwa-ẹnyanwụn d'e ru ẹbamịn ọdịdan-ẹnyanwụn.

² Zayọnụ, obodo ahụn mma a zu oke, k'ọ gha nwunla kẹ ukpẹ.

³ Osolobuẹ ẹnyi lala, kanị o tukọ udọn: ọkụn e bu ihiẹn e ri rị a ihun, okẹn ẹbi rị a kpọnị fihunmẹ ẹ!

⁴ Ọ rị a kpọ igwere, a kpọ ụwa ọgwa n'o kin ndị nke ẹ ikpe.

⁵ Ọ sị, “Wẹhẹ ni ni m ndị nke m, ndị mmẹ lẹ wẹ mẹmẹ nkwerigbama, chụnye ẹjan wẹ gi biye ẹ ẹka!”

⁶ Elu-igwere rịdẹ e ku ni Chuku e furughọ, makẹni Chuku wụ Ọka-ikpe. Sẹla

⁷ Gọn ni ntịn, ndị nke m, nị m ku; ụnụ ndị Izrẹlụ, gọn ni ntịn, nị m shịagbu ụnụ ẹri. Mmẹ wụ Chuku, Chuku ụnụ.

⁸ Ẹlẹ ẹjan ụnụ rị a chụnyeni m kẹ m rị a jụgbọnị ụnụ, ẹlẹ ẹjan ụnụ rị a dụnnị m ọkụn ogẹn ile.

⁹ Onwọnni ihiẹn m gi okẹn-efin rị iwe ụnụ e mẹ; onwọnni ihiẹn m gi ewu ụnụ e mẹ.

¹⁰ Makẹni, anụmanụ ile rị ọfịa wụ nke m, efin ile rị elu òke nnụ-uku a kpa nni wụzị nke m.

¹¹ A marịngụọ m nnụnụ ile rị elu-ugu, ihiẹn ile a kpa ọfịa wụ nke m.

¹² Omẹni ẹgụn te gi m, agwakọ m ụnụ, makẹni ụwa lẹ ihiẹn ile rịn'a wụ nke m.

¹³ M'e ridẹ uru okẹn-efin ra? M'a radẹ ẹdeke ewu ra?

¹⁴ Chụnyeni Chuku ẹjan-ekele, y'e mẹzuni Onyẹ Kachanrịnnị nkwa hụn i kwe ẹ;

¹⁵ kpọku m ogẹn nsọngbu, m k'a zụọpụha ị, y'a ja m mma.

¹⁶ Nke ndị njọ, Osolobuẹ sị, “Onyẹ sị ụnụ ku oku Iwu m? Kịnị kẹ Iwu m rị ọnụ ụnụ e mẹ?

¹⁷ Ịjụgbọ ụnụ e ze ụnụ ize; ụnụ hụ e nu oku m e ye azụụn.

¹⁸ Ihiẹn onyẹ-ohin a sụọ ụnụ a sụọ; ụnụ lẹ ndị ughẹrẹ hụ a kpa.

¹⁹ Eje-oku eje-oku jun ụnụ ọnụ, ire ụnụ wụ ntụ-ntụ.

²⁰ Ụnụ hụ e kuja oku ndị nke ụnụ, e kujadẹ oku onyẹ ụnụ lẹ ịya wụ nnẹ ohu!

²¹ Ụnụ hụ e mẹ ihiẹn ndịnị ile, a gba m ụnụ nkịtịn, ụnụ hụ e ro nị m nọhụ kẹ ụnụ. Kanị m rị nwan a jụgbọ ụnụ, m rị nwan a gwapụ ụnụ ihiẹn ụnụ mẹ.

²² Rokwọ nị nwan ihiẹnni, ụnụ ndị rị a zọ Chuku, amamgbe m'a dọkịka ụnụ, ụnụ ahụnkọ onyẹ k'a zụọpụhanị ụnụ.

²³ Mkpamịn, ya wụ ezigbo ẹjan hụn e ye m ọghọ, a kwa ụzọ, m gi a ghọsị a nị Chuku a zụọpụha ịhịan.”