Ẹbụ-ọma 46 - Ika

Isi Nke Isin Kwasị Ọgụnnaị Osolobuẹ Nọyeni Ẹnyi Anọyeni

Ye onyẹ-ndu ẹbụ ẹbụnị. Ẹbụ Itu ụmụ Kora rọ. Wẹ gi olu “Ịgbagba” bụ a.

¹ Osolobuẹ wụ ikẹn ẹnyi lẹ onyẹ ẹnyi e gbọnni; eyemẹka a rịchanrịn ẹhụ-nsue ogẹn nsọngbu k'ọ wụ.

² Ya wụ, egun atụkọ ẹnyi, ọsụọn'a nị alị zinzin mọbụ nị ugu ile danyesọnmẹ ohimin;

³ ọsụọn'a nị mirin rị ohimin rị a zụndẹ okẹn ụzụn, a kpọ ẹbi, a gbọ ụfọfọ; e bulidẹ, e mẹhunmẹ ugu ọda-ọda. Sẹla

⁴ O nwọn iyi hụn mirin ẹ e mẹ wẹ a ghọghọ imẹ obodo Chuku, imẹ Ebẹhụ rị nsọ Onyẹ Kachanrịnnị bi.

⁵ Chuku rị imẹ obodo ahụn, onwọnni ihiẹn k'e mẹn'ẹ; Chuku k'a zọ ụzọ d'e yen'ẹ ẹka.

⁶ Alị ichẹn-ichẹn e susuhu; alị-eze wẹ hụ e mẹhunmẹ — olu Chuku hanhụ, ụwa ile e dẹnhin!!

⁷ Osolobuẹ ihiẹn ile rị okpuru ẹ nọyeni ẹnyi anọyeni; Chuku Jekọpụ rị e che ẹnyi nche. Sẹla

⁸ Bịa nị d'a hụn ihiẹn Osolobuẹ rị a rụn, k'o dọn rị e tikpọ ihiẹn elu-ụwa!

⁹ Ọ mẹ wẹ a lụbehi agha imẹ ụwa ile; ọ kpagisọnmẹ ụta, e gungwọnpụ obo, a dụn akpaịn ọkụn.

¹⁰ Ọ sị, “Kụsị nị! Gi n'ẹ dọn nị mmẹ wụ Chuku! Alị ile sikọ d'a gbaye m; Elu-ụwa ile k'a gbaye m!”

¹¹ Osolobuẹ ihiẹn ile rị okpuru ẹ nọyeni ẹnyi anọyeni; Chuku Jekọpụ rị e che ẹnyi nche! Sẹla