Ẹbụ-ọma 38 - Ika

Isi Nke Mmẹsatọ Kwasị Ọgụn E Mẹọlẹ M Njọ Nke-esi, Dodo Gbubehi M

Ẹbụ-ọma Defidi; Arịrịọ.

¹ Euu Osolobuẹ, egizilẹ olulu i jụgbọ m; egizilẹ ọnụma ị ye m afụnfụn,

² nị ụta ị rị a gba m e zupusọnmẹgụọ m ẹhụ; ẹka ị e bitugụọ m.

³ Ẹhụ eshizini m ikẹn yeni ọnụma i gi e sọn m; ọkpụkpụ m arịzị ikẹn yeni njọ m.

⁴ Obi rị e gbu m mgbu a karịgụọ m ẹka, nọkẹ ibu nyịngbu enwẹn ẹ.

⁵ Ẹtẹ m hụ a ba, e rehi, e shin yeni njọ m zuzu mẹ.

⁶ Y'e hiemẹgụọ m, welụachanrịn m alị; ẹkwan-ẹkwan kẹ m'a kwan eki e we gi;

⁷ ukun rị e nwun m ọkụn; ẹhụ arịzị m ikẹn.

⁸ Ndụn arị m; ẹhụ ile e gụngwọnchanrịngụọ m; m hụ a sụn yeni ibu rị m obi.

⁹ Heuu Osolobuẹ, y'a marịnchanrịngụọ ihiẹn rị nwan a gụnnị m; udẹn m rị a sụn ezuerini ebe ị rị.

¹⁰ Obi m hụ a dụ kpum-kpum, ndụn hụ a gụ m; ẹnya e mẹ m hịọ.

¹¹ Ndị-ọwụ m lẹ ndị mmẹ lẹ wẹ wị a kpa arịzị a nọkunmẹ m, makẹ emu rị a kụnị m; ndị bikunmẹni m arịzị a bịa ebe m rị.

¹² Ndị chọkọ isi m hụ e shitọsọnmẹni m ọnyan, ndị rị a chọ m njọ hụ e ku oku itikpọnị m; eje-umẹ eje-umẹ kẹ w'e zuni m eki e we gi.

¹³ M nọ nwan kẹ onyẹ ntịn-okin, m'a ra nụ ihiẹn; m nọ nwan kẹ odin m'a ra ku oku;

¹⁴ M nọ nwan kẹ okẹnnyẹ ghalẹni a nụ ihiẹn, hụn ghalẹni a sa ẹka a shịarị oku.

¹⁵ Euu, Osolobuẹ, ịyụ kẹ m rịkwọ e che; Euu Osolobuẹ hụn wụ Chuku m, ị k'a za m.

¹⁶ Makẹni a sịgụọ m, “Anịlẹ ndịnị mụ m ẹmụ, ndịnị a ghọghọ nị ụkụ m e kpori.”

¹⁷ M'e d'a dan; m rị imẹ ụfụ ogẹn ile.

¹⁸ M rị e ku ẹ nị e mẹọlẹ m njọ; ọ fụ m afụ nị m mẹ njọ ahụn.

¹⁹ Ndị iṅẹnrẹn m bu ọda; ndị rị e we iwe m mmaka e bukẹ ọda.

²⁰ Ndị gi njọ a kụ m mma, hụ e kuja oku m ebe m rị a chọ nị m mẹ ihiẹn rị mma.

²¹ Heuu Osolobuẹ, a gbakịtọkwọlẹ m azụụn, Dodo Chuku m, anọtekwọlẹ ebe m rị.

²² Bịakẹnrin d'e yeni m ẹka, Osolobuẹ Onyẹ-nzụọpụha m.