Ẹbụ-ọma 37 - Ika

Isi Nke Mmẹsa Kwasị Ọgụn Nke Defidi Ihiẹn E Kunrun Ndị-njọ Lẹ Ndị ezi-omumẹ

¹ Anịlẹ obi gbaka ị makẹ ndị-njọ; akanlẹni ndị e mẹ eje-ihiẹn,

² makẹni wẹ k'e shinwụnkẹnrin kẹ ẹfịfịa, wẹ k'e nwunbehi ẹhụhụọ-oyiyi ẹhụhụọ-oyiyi.

³ Gi Osolobuẹ dọn ẹnya, e mẹ mma; biri alị ị rị, e ri ihiẹn ezi-omumẹ rị e wẹhẹ.

⁴ A nị ihiẹn Osolobuẹ a sụọ ị, o k'e ye i ihiẹn ndị ahụn rị a gụn obi i ẹgụn.

⁵ We oku i che ẹka Osolobuẹ; gi ẹ dọn ẹnya, o k'e mẹ ihiẹn banyen'ẹ:

⁶ Osolobuẹ k'a ghọsị nị ẹka ị rị ọchan mẹ ẹ pụha ifọn nọkẹ ebe eki nọ fọn, o mẹ mma ị rị e mẹ pụha ifọn kẹ anwụn efinaị.

⁷ La ihiẹn ile tọnị Osolobuẹ, y'e nwọn ndidin cheri ẹ; agbakalẹ obi nị ọ hụ a ghanị onyẹ rị e mẹ ihiẹn ẹ, onyẹ rị e rotọ eje-ihiẹn e mẹ ẹ.

⁸ Ewelẹ iwe; latọ ọnụma; ehuelẹ uhue, eje-ihiẹn sụọ k'o buhẹ.

⁹ Makẹni wẹ k'e gbupụ ndị e mẹ eje-ihiẹn, kanị ndị gi Osolobuẹ e dọn ẹnya k'e nwọnrin alị.

¹⁰ Ọ họdụhụ ẹkẹrẹ onyẹ-njọ a la; ị chọ wẹ ntan, chọ wẹ imọn ebe wẹ te rị, y'a hụnkọzị wẹ.

¹¹ Kanị ndị e welụa enwẹn wẹ alị k'e weri alị, a gha ihun ọhụnma-ọhụnma.

¹² Umẹ-umẹ kẹ ndị-njọ e zuni ndị ezi-omumẹ, e rini wẹ nkwẹnrẹn-eze;

¹³ kanị ẹmụ kẹ Osolobuẹ a mụ ndị-njọ, makẹni ọ marịngụọ nị ụhụọhịn wẹ lala alala.

¹⁴ Ndị-njọ e sepụha ọpịa-agha, dọzị ụta — nị wẹ gbatu ndị e welụa enwẹn wẹ alị lẹ ndị wẹ rị a bịangbu, nị wẹ gbu ndị obibi wẹ kụrụ ọtọ.

¹⁵ Kanị ọpịa-agha wẹ k'e zupu wẹ lẹ enwẹn wẹ akpobi; ụta wẹ k'e gungwọnpụ.

¹⁶ Ẹkẹrẹ hụn ezigbo ịhịan nwọn ka mma karị okẹn-ihiẹn ndị-njọ nwọn;

¹⁷ makẹni wẹ k'a napụ ndị-njọ ikẹn, kanị Osolobuẹ k'e dọnmẹ ndị ezi-omumẹ.

¹⁸ Osolobuẹ rị ndị nwọnlẹni nkọrịanị azụụn ụhụọhịn-ụhụọhịn, ihiẹn wẹ k'a rị jẹnrin ejẹn.

¹⁹ Eshinwụnkọ wẹ ogẹn nsọngbu; wẹ k'e nwọn ihiẹn-oriri ọda ogẹn ụnwụn.

²⁰ Kanị ndị-njọ k'a la iwi; ndị-iṅẹnrẹn Osolobuẹ k'a nọ kẹ mma obobo ọfịa; wẹ k'e fopụ, fopụ kẹ ẹnwụnrụn.

²¹ Ndị-njọ e zinrin bụ w'a ra kụ, kanị ezigbo ịhịan a ha ẹka.

²² Alị k'e họnrin nke ndị hụn Osolobuẹ gọzi, kanị owepụ kẹ wẹ k'e wepụ ndị hụn ọ bụ ọnụ.

²³ Omẹni obibi ịhịan sụọ Osolobuẹ, o mẹ ụkụ onyẹ hụ e ze;

²⁴ ọ sụọn'a nị ọ kpọgburu akpọgburu, ọ dankọ, makẹni Osolobuẹ e gi ẹka a a ghọdọn ẹ.

²⁵ E mẹghọ m nwata, m wụ nwan ẹgẹdi, m'e ke hụn ebe Osolobuẹ nọ la ndị ezi-omumẹ tọ mọbụ nị ụmụ wẹ rịọma ihiẹn-oriri.

²⁶ W'a ha ẹka ogẹn ile, e zinye ndị ọzọ ihiẹn; ụmụ wẹ k'a wụ ngọzi.

²⁷ La eje-ihiẹn tọ, mẹmẹ mma, ya kẹ y'a nọ bi jẹnrin ejẹn.

²⁸ Makẹni ndị e mẹ ihiẹn furuni a sụọ Osolobuẹ a sụọ; ọ latọkọ ndị nsọ a. O che wẹ nche jẹnrin ejẹn, kanị wẹ k'e gbupụ ụmụ ndị-njọ;

²⁹ alị k'e họnrin nke ndị ezi-omumẹ, e biri wẹ ẹ jẹnrin ejẹn.

³⁰ Oku hụn a gha onyẹ ezi-omumẹ ọnụ a pụha wụ amamihiẹn-amamihiẹn; ezioku-ezioku k'o ku.

³¹ Iwu Chuku ẹ rị a imẹ obi, ụkụ a ara kpopụ.

³² Ndị-njọ a warị e che ndị ezi-omumẹ, a chọ nị wẹ gbu wẹ;

³³ kanị Osolobuẹ alakọ wẹ tọnị wẹ mọbụ nị wẹ hangbu wẹ eṅẹn imẹ ọgwa.

³⁴ Cheri Osolobuẹ, y'e sọnsọnmẹ ụzọ a. O k'e bushi i elu kẹni alị hụn ụzọ họnrin nke i; ị k'a hụn kẹ wẹ gbupụ ndị-njọ.

³⁵ A hụnghọ m eje-ịhịan hụn ghalẹni e mẹ omikẹn ịhịan kẹ ọ rị e mẹ wokowoko kẹ osisi rị alị ọ nọ e sue ọhụnma,

³⁶ kanị o bieni nke ẹ a gụ, ọ rịzị a; a chọ m'a, ahụnzịnị m'a.

³⁷ Lekpọ onyẹ nwọnlẹni nkọrịanị; leledẹle onyẹ obibi ẹ kụrụ ọtọ; o k'a masịnị onyẹ-udọn ihun.

³⁸ Kanị wẹ k'e tikpọchanrịn ndị-njọ ile; ọ masịkọnị ndị-njọ ihun.

³⁹ Ẹka Osolobuẹ kẹ nzụọpụha gha a bịanị ndị ezi-omumẹ; ịya e kpumẹ wẹ ogẹn nsọngbu.

⁴⁰ Osolobuẹ e yeni wẹ ẹka, a gbapụha wẹ; ọ gbapụha wẹ ẹka ndị-njọ, mẹ wẹ hụn isi makẹni ịya kẹ wẹ gbọnni.