Ẹbụ-ọma 33 - Ika

Isi Nke Mmẹtọ Kwasị Ọgụn Osolobuẹ Furu W'a Ja Mma

¹ Yini ni Osolobuẹ oro ịghọghọ, ụnụ ndị ezi-omumẹ; ịja Osolobuẹ mma e furukẹ ndị e bi obibi kụrụ ọtọ.

² Gi ni ụbọ-hapụ ja Osolobuẹ mma; gi ni ụbọ-layẹ nwọn eriri-iri kpọn'a egu.

³ Bụnị n'a ẹbụ ọhụn; kpọ nị egu ọhụnma, ụnụ e yi oro ịghọghọ.

⁴ Makẹni oku Osolobuẹ kụrụ ọtọ; ọrụn a ile wụzịkwọ ihiẹn wẹ gi e dọn ẹnya.

⁵ Imẹ ihiẹn furuni lẹ imẹ ịhịan k'o furu a sụọ Osolobuẹ ụsụọ; ihiẹn-ọsụsụọ a jun elu ụwa.

⁶ Oku-ọnụ Osolobuẹ k'o gi ke elu-igwere, uzun gha a ọnụ pụha k'o gi ke ihiẹn ndị rị igwere.

⁷ O wegbama mirin ohimin ụzọ ohu nọkẹ ikpọn-ihiẹn; o bu mirin ohimin e che ụzọ ohu kẹ wẹ dọn e dọnmẹ ihiẹn mmụlọ.

⁸ Elu ụwa ile wẹ tụ egun Osolobuẹ; ndị ile rị ụwa wẹ gbaye ẹ.

⁹ Makẹni oku k'o kuhụ, ụwa nọ rị; ọ sị a hụ pụha, ọ nọ pụha.

¹⁰ Osolobuẹ a kpayịya iroro ndị alị ichẹn-ichẹn; o wiwi ihiẹn ndị alị ichẹn-ichẹn bu obi.

¹¹ Kanị ihiẹn Osolobuẹ romẹ k'a rị a bụn jẹnrin ejẹn, ihiẹn o bu obi k'a rị a gha ihun gha agbọ pụ agbọ.

¹² Ngọzi wụ nke alị ahụn Osolobuẹ wụ Chuku wẹ, ndị ahụn ọ họrị nị wẹ wụrụ nke ẹ!

¹³ Osolobuẹ gha elu-igwee e lee ẹnya alị, a hụn ịhịan ile;

¹⁴ ọ gha ebe obibi ẹ e lee ndị ile bi elu-ụwa —

¹⁵ Osolobuẹ hụn ke obi wẹ ile, Osolobuẹ hụn a ghọtachanrịn ihiẹn ile w'e mẹ.

¹⁶ Ẹlẹni eze e nwọnkẹ ndị-agha k'o gi e mẹri; ẹlẹni odogun-agha e nwọnkẹ akwanran k'o gi e mẹri;

¹⁷ ẹlẹni ịhịan gi ẹshin-agha k'o gi e mẹri agha — kẹ ẹshin-agha e nwọnlẹ akwanran, ọ sakọ ẹka ye i mmẹri.

¹⁸ Kanị ẹnya Osolobuẹ rị ebe ndị a tụ egun ẹ rị, ndị gi ihiẹn-ọsụsụọ a e dọn ẹnya,

¹⁹ kẹn'ọ gbapụha wẹ imẹ ọnwụn lẹn'o dọnmẹ wẹ ndụn ogẹn ụnwụn.

²⁰ Ẹnyi rị e che Osolobuẹ; ịya wụ onyẹ e yeni ẹnyi ẹka lẹ akpaịn e che ẹnyi nche.

²¹ Imẹ ẹ kẹ obi ẹnyi nọ a ghọghọ, makẹni ẹnyi gi ẹfan nsọ a e dọn ẹnya.

²² Osolobuẹ, dodo e gi ihiẹn-ọsụsụọ ị e sọn ẹnyi, kẹ ẹnyi dọn rị e gi i e dọn ẹnya.